Read Plautdietsch (Low German) – De Bibel Jesaja 26 Bible Online

Jesaja 26 - Plautdietsch (Low German) – De Bibel bible

Jesaja 26

¹Wan dee Tiet kjemt, woat dit Leet en Juda jesungen woaren: Wie haben eene sechre Staut; de HAR rat ons; hee jeft ons groote Mieren.

²Moakt de Staut Puaten wieda op. Daut Volkj daut dän Gloowen helt un rajcht ver am besteit, saul nengonen.

³Wäa dän Gloowen aun die helt, un sikj gaunz opp die velat, däm jefst du Fräd, ennare Fräd.

⁴Velot die emma opp däm HARN, bie Gott däm HARN best du emma secha.

⁵Hee sat dee rauf, dee huach rut wonen, un ritt de prauzje Staut dol; hee brinjt dee enne Grunt un schmitt dee em Stoff han.

⁶De Feet von de oame un utjenuzte gonen äwa dee un veklunjen dee.

⁷De HAR moakt dän Wajch fa dän opprechtjen jlei; hee moakt dee äaren Wajch jlikj.

⁸Wie luaren no daut waut du deist, uk wan du strofen motst; mien jratstet velangen es die lowen un preisen.

⁹Enne Nacht bang ekj mie no die, un mien Jeist es hinjaraun no die. Wan du de Welt rechten deist, lieren de Menschen, waut rajcht es.

¹⁰Oba de gottloosa lieet doa nich von, wan du jnädich to an best; uk en een goodet Launt deit hee orrajcht un sitt nich woo harlich du, HAR, best.

¹¹HAR, du hast diene Haunt oppjehowen, oba dee seenen daut nich; wies an emol woo du fa dien Volkj oppkjemst. Wies an daut du kjeenem vedroagen kaust, buta dien Volkj, un dan woaren dee sikj schämen motten. Jo, lot an en daut Fia komen, waut du fa onse Fiend hast.

¹²Doch, du HAR woascht ons Fräd jäwen; aules waut wie soowiet haben kunt foadich brinjen, hast du fa ons jedonen.

¹³HAR, dee du ons Gott best, doa rejieren noch aundre Leidasch äwa ons, oba wie aunerkjanen bloos die.

¹⁴De aundre Leidasch stoawen un haben nich Läwen; dee sent aus Schauten un kjennen nich oppstonen, wiels du hast an bestroft un venicht, daut nich mea von dee jerät woat.

¹⁵HAR du hast ons Volkj jrata jemoakt. Du hast ons Volkj jrata jemoakt, un hast die harlich jewäsen; du hast aul onse Jrensen wieda rut jesat.

¹⁶HAR, en schwoare Tieden sieekj wie die; aus du ons bestrofen deetst, bäd wie die aun.

¹⁷Wäajen daut, waut du leetst opp ons komen, wia wie aus eene Fru dee doa schricht, un sikj en äare Weeen kjremt.

¹⁸Wie kjremden ons, aus de Fru en äare Weeen, oba waut doa väakjemt es bloos Wint. Wie haben ons Launt nich kunt wäaren, un haben de Menschen von de Lenda nich doljekjräajen.

¹⁹Oba diene Vestorwne, HAR, woaren läwen, diene Doodes woaren oppstonen; muchten dee, dee unjare Ieed ligjen, oppwakjen un fa freid sinjen; HAR du jefst Läwen soo aus de Deiw zemorjes, un du jefst dän Deiw opp dee waut oppe Ieed dol ligjen.

²⁰Got en june Hiesa, mien Volkj, un schlut de Däaren hinja junt too; vestäakjt junt een kortet stootje, bat sien Oaja sikj utjetoopt haft.

²¹De HAR kjemt väa von siene Städ, un bestroft de Menschen oppe Ieed, fa daut waut see orrajcht jedonen haben; dan woat de Ieed dee väabrinjen waut omjebrocht sent, un woat dee nich lenja vestäakjen.