Read Plautdietsch (Low German) – De Bibel Jesaja 27 Bible Online

Jesaja 27 - Plautdietsch (Low German) – De Bibel bible

Jesaja 27

¹Wan dee Tiet kjemt, woat de HAR met sien grootet stoakjet Schwieet däm hinjalestjen Leviatan ombrinjen; hee woat de groote Kjrät, dee sikj dan noch wajchschlikjen well, em Mäa doot schlonen.

²Wan dee Tiet kjemt, woaren see sajen: Ekj woa von eenen Wiengoaden sinjen von däm scheena Wien kjemt.

³Ekj sie de HAR, un ekj fläaj dän; ekj wessa dän pinkjlich. Ekj paus Dach un Nacht opp no dän, soo daut däm nuscht schlajchtet woaren woat.

⁴Mien Oaja haft sikj jedolt, oba wan wäa Distlen un Onkrut brinjen well, wudd ekj däm nogonen un däm opphoolen un daut aulatoop vebrennen.

⁵Oba dee waut sikj aun mie hoolen, daut ekj an halpen saul, dee woaren Fräd met mie moaken; jo, dee woaren seenen daut ekj frädlich sie.

⁶Daut woat noch soo romkomen, daut Jakob siene Nokomen sikj enwartlen woaren, un de Israeliten woaren blieejen un jalsta sennen, soo daut de gaunze Ieed woat voll von äare Frucht sennen.

⁷Word jie soo sea jeschloagen aus june Fiend jeschloagen worden? Wieren bie junt soo väl Doodes, aus doa bie dee wieren, waut junt ombrochten?

⁸Nä, hee bestroft junt met Mot un neem junt enne Jefangenschoft; hee vestreid junt eenen Dach, aus wan een hunjscha Oostwint äwa kjeem.

⁹Daut es gaunz kloa, daut toom de Israeliten äare Sind veseenen, un äare Schult wajchnämen, motten see de Steena von de Aultoaren fa de Jetta dolbräakjen aus een Hupen vebrockeldet Kaulkjsteen, un kjeen enjeweidet Steenmol ooda Ruakopfa Aultoa fa de Jetta mea stonen haben.

¹⁰Wäajen däm Jettadeenst ligjen vesechade Städen un schmocke Hiesa veloten; dee sent ladich un onbewont aus eene Wiltnis. Nu grosen de Kjalwa doa, lajen sikj doa dol, un befräten de Asta doa.

¹¹De Beem sent doljebroaken un de Asta vedrieejen; un de Frues läsen de Stakja toop to Brenholt. De Menschen doa haben soo weinich Vestentnis, daut dee waut an jemoakt haft kjeen Metlieden met an haft, un an kjeene Gonst wiesen woat.

¹²Wan dee Tiet kjemt, woat de HAR aule Velkja vom Eufrat Riefa bat dän Ägiptischen Riefa utkloppen. Un hee woat junt, Israeliten, eenselwies oppsaumlen.

¹³Wan dee Tiet kjemt, woat eene groote Trompeet jeblost woaren, un dee waut en Assur veschlapt sent un dee waut en Ägipten vestat sent, woaren no Jerusalem komen un däm HARN opp dän heiljen Boajch aunbäden.