Read Plautdietsch (Low German) – De Bibel Jesaja 31 Bible Online

Jesaja 31 - Plautdietsch (Low German) – De Bibel bible

Jesaja 31

¹Woo saul daut noch met dee, waut no Ägipten no Help ranen, un sikj opp Pieed un Woages veloten, wiels see väl von dee haben, un sikj opp Rittasch stetten, wiels dee stoakj sent, un kjieren sikj nich no däm, dee en Israel heilich es, un roopen nich däm HARN aun.

²Oba hee haft daut goot derchjedocht, un haft Onheil jebrocht; hee nemt sien Wuat nich trigj. Hee woat jäajen dee komen, dee orrajcht haundlen, un jäajen dee, dee daut beese unjastetten.

³De Ägipta sent Menschen un nich Gott, äare Pieed sent Fleesch un nich Jeist. De HAR woat siene Haunt utstrakjen, un dan woat dee, dee halpen saul, sikj vestaupen, un dee, dee jeholpen woat, woat hanfaulen. Dee woaren beid toop omkomen.

⁴Dit haft de HAR mie jesajcht: Soo aus een junga Leiw ooda een aundret jefäadeljet Tia äwa daut gnort, waut hee jeschlacht haft, un sikj vom Jeschrech nich wajch enjsten lat, wan uk een Deel Hoads am proowen auftojoagen, soo woat de HAR, dee aules rejieet, sien Enj faust hoolen, wan hee toom Kaumf opp dän Zions Boajch rauf kjemt.

⁵Soo aus een Voagel met de Flichten Schutz jeft, woat de HAR, dee aules rejieet, Jerusalem bewoaren; hee woat an bewoaren un raden, hee woat an veschoonen un friemoaken.

⁶Jie Israeliten, komt doch trigj no däm, däm jie soo schlemm verot haben.

⁷Un wan dee Dach kjemt, woa jie de selwane un goldne Jetta, dee jie to june ieejne Schaund jemoakt haben, aula wajchschmieten.

⁸Dan woat Assur hanjerecht woaren, oba nich derch eene Armee von Menschen; waut jratret aus een Schwieet von Menschen woat de Assiera venichten. Dee woaren ver dän Fient flichten, un äare junge Mana woaren to de Oabeit jedwungen woaren.

⁹Dee, opp wäm see sikj veloten, woat en Angst veschwinjen; un de Leidasch woaren veschrocken äare Posten veloten. Dit es waut de HAR sajcht, dee en Zion een Fia aum gonen haft, un en Jerusalem Gloot jlieejen haft.