Read Plautdietsch (Low German) – De Bibel Jesaja 32 Bible Online

Jesaja 32 - Plautdietsch (Low German) – De Bibel bible

Jesaja 32

¹Horcht emol. Doa woat een Kjennich rejieren, dee daut woat väahäwen, waut jerajcht es; un siene aunjestalde woaren rechtich haundlen.

²Dee woaren fa daut Volkj soo sennen aus Schulinj em Storm, ooda een Dak, wan de Räajen prosselt; soo aus een Stroom en eene drieeje Jäajent ooda de Schauten von eenen grooten Steen en een drieejet Launt.

³Dan woaren dee, dee seenen kjennen, nich de Uagen toohoolen; un dee, dee hieren kjennen woaren horchen.

⁴Dee oschuldje woaren kluak sennen, un dee, dee stomaden, woaren goot un kloa räden kjennen.

⁵Dee, dee schoslich es, woat nich mea huach aunjestalt woaren, un de Spetzbub woat nich huach jeacht woaren.

⁶De Schosel rät soont waut nich toophelt, un hee nemt sikj väa, waut orrajcht es: hee eeft een gottlooset Läwen, hee sajcht soont äwa däm HARN, waut nich soo es, hee lat de hungaje hungrich bliewen, un helt Wota trigj von dee waut darscht.

⁷Dän Spetzbub siene Wäaj sent bees; hee moakt eenen beesen Plon, daut hee de oame met siene Läajes utnuzt, uk wan dee verem Jerecht opp daut bestonen, waut rajcht es.

⁸Oba dee, wäa aunjeseenen es, nemt sikj waut aunjeseenet väa, un blift bie daut, waut aunjeseenen es.

⁹Jie Frulied, dee soo eendoontich sent, horcht emol no waut ekj saj; jie Mejales, dee jie junt soo secha sent, paust opp no waut ekj saj.

¹⁰En een bät äwa een Joa, woaren dee, dee sikj soo secha wieren, schudren, wiels doa woaren kjeene Wiendruwen toopjeläst woaren, un doa woat kjeene Frucht aun de Beem sennen.

¹¹Flautat, dee jie soo eendoontich sent, un schudat junt, dee jie soo secha sent; trakjt june schmocke Kjleeda auf un nämt junt daut Truakjleet om.

¹²Klaupt junt oppem Brostknoaken, wäajen, waut opp daut schmocke Flekj jeworden es, un waut em Wiengoaden vedorwen es;

¹³truat äwa mien Volkj äa Launt, wua nu Onkrut un Distlen waussen, un uk äwa de schaftje Hiesa en de jlekjelje Staut.

¹⁴Wiels de Paulausts woaren ladich stonen, un de Staut, wua soo väl Menschen wieren, woat onbewont sennen. En de vesechade Städa un Torms woaren bloos noch wille Tieren husen, un de Häaden woaren doa weiden.

¹⁵Wan de Jeist von bowen opp ons woat utjegoten woaren, woat de Wiltnis een fruchtboaret Launt sennen, un daut fruchtboare Launt woat driewen aus een Woolt.

¹⁶Dan woat enne Wiltnis un opp daut fruchtboare Launt aulawäajen nom rajcht jeseenen woaren.

¹⁷Un wiels daut rajchte jedonen woat, woat doa Fräd sennen; un daut woat opp emma stell un secha sennen,

¹⁸un mien Volkj woat en een rujet Launt wonen, wua äare Hiesa lang stonen woaren. See woaren onvestieet un tofräd sennen.

¹⁹De Hoagel woat dän Woolt dolschlonen, un de Staut woat enne Grunt jebrocht woaren.

²⁰Jie woaren sea jlekjlich sennen, daut jie emma biem Stroom akren kjennen, un jun Vee un june Äsels woaren frie oppe Weid gonen.