Read Plautdietsch (Low German) – De Bibel Jesaja 35 Bible Online

Jesaja 35 - Plautdietsch (Low German) – De Bibel bible

Jesaja 35

¹De Wiltnis un daut Drieechlaunt woaren sikj freien; daut drieeje Ollaunt woat jlekjlich sennen un met Bloomen dachen.

²Daut woat sea blieejen un lud un schaftich sinjen. Daut woat doa soo schmock sennen aus em Libanon, un soo groosoatich aus bie Karmel un Scharon. Dan woat daut kloa woaren, woo harlich de HAR es un woo prachtvoll Gott es.

³Moakt de schwake Henj wada stoakj, un de enjekjnekjte Kjnee wada stoakj.

⁴Sajcht to dee, woone äaren Moot veloaren haben: “Hoolt junt stoakj; habt nich Angst. Horcht emol. Jun Gott kjemt. Hee woat selfst komen un junt raden; hee woat Rach eewen un trigjtolen.”

⁵Dee, dee blint sent, woaren dan met äare Uagen seenen kjennen, un dee, dee doof sent, woaren de Uaren opgonen.

⁶Dee, dee lom sent, woaren aus een Ree sprinjen, un dee, waut nu stomm sent, woaren met freid sinjen. Enne Wiltnis woat Wota väakomen, un en daut drieeje Launt woaren Riefasch ranen.

⁷Wua bloos heeta Saunt es, woat daut pudlich woaren, un wua daut too drieech es, woaren Kjwalen sennen. Wua ieescht de Wilw lagen, woat daut sompich sennen, un met huaget Graus un Schelp bewaussen.

⁸Dan woat doa een gooda Wajch sennen, un see woaren dän, dän heiljen Wajch, nanen. Wäa nich em Hoat rein es, woat doa nich bowen gonen; dee es fa soone, dee sikj aun dän Wajch hoolen, de schoselje woaren doa nich bowen gonen.

⁹Doa woat kjeen Leiw sennen, un kjeen jefäadeljet Tia woat doa gonen; soont es opp dän Wajch nich to finjen. Dee es fa dee, dee friejekoft sent.

¹⁰Un dee, woone de HAR friejekoft haft, woaren no Zion komen un met freid sinjen; dee woaren opp emma schaftich sennen, aus eena dee eene Kroon drajcht; Freid un Jlekj woaren an to hoolen kjrieen, un Trua un stänen woaren von an ranen.