Read Plautdietsch (Low German) – De Bibel Jesaja 36 Bible Online

Jesaja 36 - Plautdietsch (Low German) – De Bibel bible

Jesaja 36

¹Aus Hiskia en sien 14. Joa Kjennich wia, kjeem Sanherib, de assierischa Kjennich met siene Armee jäajen Juda. Un hee neem aul de Städa en, waut eene Mia un Jewäa hauden.

²Dan schekjt de assierischa Kjennich dän Rabschake un väle Soldoten von Lachisch no Jerusalem, no däm Kjennich Hiskia. Un de Rabschake stald sien Loaga bie de Wotaleidinj von daut huage Wotaloch opp. Daut es opp dän Wajch no de Städ wua see Woll wauschen.

³Un Eljakim, dee de Äwasechta fa däm Paulaust wia, Hilkija sien Sän, un Schebna, dee de Schriewa wia, un Joach, Asaf sien Sän, dee de Bieekja von de Jeschicht von daut Kjennichrikj oppbewoad, jinjen no am.

⁴Un de Rabschake säd to an: Sajcht däm Kjennich Hiskia: Dit es waut de groota Kjennich, de Kjennich von Assierien sajcht: Woo best du die soo secha? Opp waut velatst du die?

⁵Kjennen een poa Wieed jäajen dän Plon von eenen Kommandaunt, ooda jäajen de Jewault von eene Armee stonen? Opp wäm velatst du die, nu daut du die onaufhenjich von mie jemoakt hast?

⁶Velatst du die opp Ägipten? Dee sent aus een vespellada Stock, soo daut wan sikj doa wäa bowen länt, spekjt am dee derch de Haunt. Daut es waut de ägiptischa Kjennich to aulem deit, dee sikj opp am veloten.

⁷Ooda proow jie junt opp däm HARN junen Gott to veloten. Haft Hiskia nich krakjt däm siene huage Opfastäden un siene Aultoaren oppjeriemt un to Juda un Jerusalem jesajcht, daut jie bloos bie däm Aultoa en Jerusalem aunbäden sellen?

⁸Mien Har, de assierischa Kjennich, es reed met die to waden, daut wan hee die 2.000 Pieed jeef, wurscht du nich opp jieda eent von de Pieed eenen Ritta stalen kjennen.

⁹Woo jleefst du daut du de Macht von dän Kapitän von onsen Kjennich siene schwakste Aufdeelunk trigj hoolen woascht, wan du die opp de Woages un Pieed von Ägipten veloten deist.

¹⁰Un dan uk noch, jleefst du daut wie sent onen däm HARN häa jekomen om junt to vedoawen. Daut es nich soo, wiels de HAR säd to mie: Go emol no daut Launt un vedoaw daut.

¹¹Dan säden Eljakim, Schebna un Joach to däm Rabschake: Räd doch to ons opp aramäisch. Daut vesto wie goot. Räd nich ver onse Lied, dee hia oppe Mia sent, opp Hebräisch.

¹²Un de Rabschake säd: Meest du daut mien Har mie no dienen Harn un no junt jeschekjt haft aul dit to sajen, un nich to dee waut oppe Mia sent. Dee woaren krakjt soo met junt toop äa ieejnet Aufgank fräten un äa ieejnet Pisch drinkjen.

¹³Dan stunt de Rabschake opp un roopt lud opp Hebräisch: Horcht waut de groota Kjennich, de Kjennich von Assierien, sajen lat.

¹⁴Dit es waut de Kjennich sajcht: Lot junt nich hinjat Licht fieren von Hiskia. Dee kaun junt nich raden.

¹⁵Un lot junt nich von Hiskia beräden, daut jie junt opp däm HARN veloten sellen, wan hee uk sajcht daut de HAR junt raden woat, un daut dise Staut nich woat von däm Kjennich von Assierien enjenomen woaren.

¹⁶Horcht nich no Hiskia. De assierischa Kjennich sajcht: Moakt een Äwareenkomen met mie un äwajäft junt mie. Dan woat een jiedra von siene Wienrank un von sienen Fiejenboom äten un von sienen Borm drinkjen,

¹⁷bat ekj kom un junt no een Launt näm, daut soo aus jun Launt es. Een Launt met Jeträajd un Wien, un een Launt met Broot un Wiengoades.

¹⁸Lot junt nich von Hiskia beräden, wan hee sajcht daut de HAR junt raden woat. Haben de Jetta von de aundre Lenda an jerat von däm assierischen Kjennich siene Macht?

¹⁹Wua sent de Jetta von Hamat un Arpad nu? Wua sent de Jetta von Sefarwajim? Un wua sent de Jetta opp woone de Lied von Samaria sikj veleeten? Haben dee Samaria raden kunt, jäajen miene Macht?

²⁰Es doa wua een Gott mank de Jetta von aule Lenda, dee sien Launt haft ut miene Jewault jerat? Wuarom jleew jie de HAR woat Jerusalem ver miene Macht bewoaren?

²¹Oba de Mana wieren stell un säden nuscht, wiels de Kjennich haud jesajcht, daut see nuscht to am sajen sullen.

²²Un Eljakim, Hilkija sien Sän, dee de Äwasechta fa däm Paulaust wia, un Schebna, dee de Schriewa wia, un Joach, Asaf sien Sän, dee de Bieekja von de Jeschicht von daut Kjennichrikj oppbewoad, jinjen no Hiskia. See hauden sikj, wiels see soo veläajen wieren, de Kjleeda tweijeräten, un vetalden am, waut de Rabschake jesajcht haud.