Read Plautdietsch (Low German) – De Bibel Jesaja 37 Bible Online

Jesaja 37 - Plautdietsch (Low German) – De Bibel bible

Jesaja 37

¹Aus de Kjennich Hiskia daut hieed, reet hee siene Kjleeda twei un trock sikj een Sak äwa. Hee jinkj en däm HARN sien Hus,

²un schekjt Eljakim, dee de Äwasechta fa däm Paulaust wia, un Schebna, dee de Schriewa wia, un uk de leidende Priestasch, aula en Sakj jekjleet, no däm Profeet Jesaja, Amoz sien Sän.

³Un see säden to am: Dit es, waut Hiskia sajcht: Dit es een schlemma Dach. Wie sent tosied jestat un beschämt worden. Daut es aus wan een Kjint saul to Welt komen, un doa nich de Krauft doatoo es.

⁴Veleicht haft de HAR, dien Gott, jehieet waut de Rabschake fa sienen Harn, dän assierischen Kjennich jesajcht haft, un woo hee dän läwendjen Gott toom Spott jebrukt haft. Veleicht bestroft de HAR, dien Gott, janem fa de Dinja, waut hee von am jehieet haft. Bäd fa dee, dee noch en Jerusalem äwajebläwen sent.

⁵Un aus Kjennich Hiskia siene aunjestalde Mana no Jesaja kjeemen,

⁶säd Jesaja to an: Sajcht junen Harn, dän Kjennich Hiskia: Dit es waut de HAR sajcht: Enjst die nich fa daut, waut du jehieet hast, daut, met waut de aunjestalde von däm assierischen Kjennich mie jelastat haben.

⁷Horch emol, ekj woa däm assierischen Kjennich waut loten groot woaren, soo daut wan hee eene jewesse Norecht hieet, woat hee trigj en sien Launt trakjen. Un doa en sien Launt, woa ekj am loten met daut Schwieet doljeschloagen woaren.

⁸Un de Rabschake hieed daut de assierischa Kjennich sikj haud von Lachisch trigjetrocken, un met siene Armee jäajen Libna jegonen wia. Un soo veleet de Rabschake Jerusalem.

⁹De Kjennich von Assierien haud jehieet daut de Kjennich Tirhaka von Kusch met siene Armee jäajen am jekomen wia. Un de assierischa Kjennich schekjt wada Mana no Hiskia un bestald aun dän,

¹⁰see sullen Hiskia, dän Kjennich von Juda, sajen: Lot dienen Gott, opp dän du die velatst, die nich hinjat Licht fieren, wan hee vesproaken haft, daut Jerusalem nich woat unja de Macht von däm assierischen Kjennich jejäft woaren.

¹¹Horch emol, du hast jehieet waut de assierische Kjennichs en aule Lenda jedonen haben, un woo see dee gaunz venicht haben. Jleefst du bloos du woascht jerat woaren.

¹²Haben de Jetta von dee Velkja, dee miene Vodasch venichten deeden, an jerat? Weetst du nich waut en Gosan, Haran, Rezef, un met de Lied von Eden, dee en Telasar wieren, jeworden es?

¹³Wua sent nu de Kjennich von Hamat ooda de Kjennich von Arpad un de Kjennichs von de Städa Sefarwajim, un Hena un Awa?

¹⁴Aus Hiskia disen Breef, woonen de Mana brochten, jekjräajen un jeläst haud, jinkj hee doamet no däm HARN sien Hus un muak dän doa ver däm HARN op.

¹⁵Un Hiskia bäd däm HARN aun un säd:

¹⁶HAR, dee du aules rejieescht, dee du en Israel Gott best, dee du dienen Troon huach äwa de Cheruben hast, du best de eensja Gott äwa aule Kjennichrikjs oppe Ieed. Du best deejanja wäa dän Himmel un de Ieed jemoakt haft.

¹⁷HAR, brinj dien Ua een bät noda un horch; HAR, moak diene Uagen op un kjikj emol. See emol aules, waut de Sanherib jeschräwen haft, un woo hee dän läwendjen Gott jelastat haft.

¹⁸Daut es soo, HAR, daut de Kjennichs von Assierien aule Lenda vedorwen haben.

¹⁹Daut es soo, daut see dee äare Jetta haben em Fia jeschmäten. Oba daut wieren je nuzloose Jetta. Daut wieren Dinja dee Menschenhenj von Holt un Steen jemoakt hauden. Daut es waut see vedorwen haben.

²⁰Un nu, HAR ons Gott, bäd ekj, rad ons von siene Macht, soo daut aule Velkja oppe Ieed enseenen woaren, daut du HAR auleen Gott best.

²¹Dan schekjt Jesaja, Amoz sien Sän, eene Norecht no Hiskia un säd to am: Dit es waut de HAR, Israel äa Gott sajcht: Ekj hab jehieet waut du jebät hast äwa Sanherib, dän assierischen Kjennich.

²²Dit es waut de HAR äwa am to sajen haft: Dee oschuldje scheene Zion veacht die un spott äwa die; un daut scheene Jerusalem scheddat dän Kopp hinja dien Rigjen.

²³Äwa wäm hast du jespott un jelastat? Äwa wäm hast du soo lud jerät, un opp wäm hast du soo rauf jekjikjt? Daut hast du jäajen dän Heiljen von Israel jedonen.

²⁴Du hast derch diene Mana dän HARN veacht un jesajcht: Ekj sie met aul miene Woages bat huach enne Boaj, un bat em hinjaschten Woolt en Libanon jewast. Ekj hab de jratste Zeeda un de baste Taunenbeem doljehakt. Ekj sie bat opp dän hinjaschten Boajch em Woolt, wua daut aum gaunz dichsten wia, jewast.

²⁵Ekj hab en framde Lenda no Wota jegroft un uk jedrunken, un ekj hab aul de ägiptische Riefasch met miene Steewel Solen utjezopt.

²⁶Hast du daut noch nienich jehieet, daut ekj mie lang doaropp reed jemoakt hab, un to jane Tiet aul doaropp jeplont hab, waut ekj nu äwadäl brinj, daut du Städa met Mieren dolbrakjst un en Steenahupes ligjen latst?

²⁷Un dee, dee doabennen wonden, hauden kjeene Krauft; see enjsten sikj un musten sikj schämen. See wieren aus daut Graus oppe Stap un daut jreene Krut; see wieren aus Graus waut oppem Dak kjient un vedrieecht ea daut groot es.

²⁸Ekj weet goot om, wua du blifst, un wanea du rut jeist un wanea du nenn kjemst, un daut du jäajen mie jetoopt hast.

²⁹Wiels du soo jäajen mie toopst, un ekj jehieet hab woo äwamootich du best, woa ekj die eenen Rinkj enne Näs nenmoaken un mien Jebett en dien Mul saten, un die trigj delenjd dän Wajch leiden, woonen du kjeemst.

³⁰Un dan säd Jesaja to Hiskia: Dit saul daut Tieekjen fa die sennen: At dit Joa waut von selfst waust, un daut näakjste Joa waut dan noch waust, un en daut dredde Joa saust du seien un arnten, du saust Wiengoades aunplaunten un von dee äten.

³¹Un daut, waut von daut Volkj Juda äwablift, woat unjen fresche Wartlen rutschmieten un bowen Frucht haben.

³²Doa woaren dee komen waut von Jerusalem äwabliewen, un vom Zion Boajch jerat sent. De HAR, dee aules rejieet, dee daut nich vedrajcht, daut see von sest wäm jenomen woaren, woat dit doonen.

³³Un doawäajen es dit waut de HAR äwa dän assierischen Kjennich sajcht: Hee woat nich en dise Staut nenkomen un woat kjeene Feil doa nenn scheeten. Hee woat sien Schilt nich no junt dreien un woat kjeene Ieed oppschedden jäajen june Mia.

³⁴Hee woat schmock dän Wajch trigj gonen, woonen hee jekomen es, un woat nich en dise Staut nenkomen. De HAR sajcht dit.

³⁵Ekj woa dise Staut mienen Schutz jäwen un dee raden. Dit doo ekj, soo daut et to seenen es, daut mie to vetruen jeit, un om David, dee mie deend, sient haulwen.

³⁶Dan jinkj däm HARN sien Enjel un schluach 185.000 Maun en daut assierische Loaga. Un tiedich zemorjes, sagen dee waut doa don wieren, daut aules voll Doodes lach.

³⁷Dan riemd Sanherib, de assierischa Kjennich, siene Sachen toop un jinkj wajch. Hee jinkj met aules no Hus un bleef en Ninive.

³⁸Un een Dach aus hee en däm Tempel fa sienen Gott Nisroch bäden deed, schluagen twee von siene Säns, Adramelech un Sarezer, am doot. See kjeemen met äa Läwen doavon un vestuaken sikj en daut Launt Ararat. Un sien Sän Asarhadon wort Kjennich no am.