Read Plautdietsch (Low German) – De Bibel Jesaja 39 Bible Online

Jesaja 39 - Plautdietsch (Low German) – De Bibel bible

Jesaja 39

¹Dan kjeem daut soo rom, daut de Kjennich von Babel, Merodach Baladan, Baladan sien Sän, daut hieed daut Hiskia wia krank jewast un wia wada jesunt jeworden. Un hee schekjt waut Mana no am, met eenen Breef un een Jeschenkj.

²Hiskia freid sikj, daut dee jekomen wieren, un wees an waut hee fa Schaza haud: Selwa, Golt, Kjriedarie, un feine Eelj, un daut Hus met daut Soldoten Jereetschoft, un waut hee sest noch wieetvollet haud. Doa wia nuscht en Hiskia siene Woninj ooda en daut Launt, waut Hiskia dee Mana nich wees.

³Dan kjeem Jesaja, de Profeet, no däm Kjennich Hiskia un säd: Waut säden dise Mana? Un von wua kjeemen dee? Hiskia säd: Dee sent von een Launt, daut wiet auf es, von Babel.

⁴Un Jesaja fruach: Waut haben dee en dien Hus jeseenen? Un Hiskia säd: Dee haben aules jeseenen, waut en mien Hus es. Ekj hab kjeen Schauz dän ekj an nich jewäsen hab.

⁵Dan säd Jesaja to Hiskia: Horch emol waut de HAR, dee aules rejieet, sajcht:

⁶Kjikj emol, de Tiet woat komen, wua aules, waut du en dien Hus hast, un waut diene Vodasch bat vondoag haben toopjesaumelt, no Babel jenomen woat woaren. Doa woat nuscht hia bliewen. Dit sajcht de HAR.

⁷Un von diene ieejne Säns, dee waut diene Kjinja sent, woaren eenje en däm Paulaust von däm Kjennich en Babel jeschnädne Deena sennen.

⁸Un Hiskia säd to Jesaja: Waut de HAR sajcht es goot. Hee freid sikj, daut et en siene Tiet wudd frädlich sennen.