Read Plautdietsch (Low German) – De Bibel Jesaja 4 Bible Online

Jesaja 4 - Plautdietsch (Low German) – De Bibel bible

Jesaja 4

¹Dan woaren säwen Wätfrues eenen Maun hinjaraun sennen un sajen: Wie woaren ons ieejnet Broot äten, un onse ieejne Kjleeda besorjen, oba lot ons diene Frues sennen, daut see ons nich veachten, wiels wie nich eenen Maun un Kjinja haben.

²Doa woat eene Tiet komen wan de HAR daut fresch woat kjienen loten. Daut woat schmock un harlich sennen, un waut von daut Launt kjemt, woat dee, dee en Israel äwajebläwen sent, moaken goot feelen un aunjeseenen sennen.

³Un von dee, dee doa dan jebläwen sent en Zion, un waut noch en Jerusalem wonen, woat daut jesajcht sennen, daut see een heiljet Läwen fieren. Dit sent dee, dee oppjeschräwen sent, daut see en Jerusalem wonen kjennen,

⁴no däm daut de Har daut Kolkj von de Lied von Zion wajchjewoschen haft, un de Blootschult von de Lied en Jerusalem wajch jebrocht haft derch eenen Jeist dee äare Schult bestrofen un utbeizen deit.

⁵Un de HAR woat äwadach eene Ruak Wolkj un de Nacht Licht aus von een Fia moaken, äwa dän Zion Boajch un de Vesaumlunk. Äwa daut, waut doa soo harlich es, woat een Dak sennen

⁶un woat een Schutz sennen jäajen de heete Sonn äwadach, un eene Krupunja en Owwada un Räajen.