Read Plautdietsch (Low German) – De Bibel Jesaja 46 Bible Online

Jesaja 46 - Plautdietsch (Low German) – De Bibel bible

Jesaja 46

¹De Aufgott Bel kjneet sikj, un de Aufgott Nebo schmitt sikj han; daut waut fa an oppjestalt wia un stolt romjedroacht wort, woat von meede Äsels un Ossen en Klompes wajchjedroacht.

²De Jettabilda stukren un nekjkoppen; dee kjennen sikj selfst nich halpen un woaren enne Jefangenschoft jefieet.

³Horcht emol no mie, dee jie von Jakob aufstaumen, un aul jie, dee von de Israeliten äwajebläwen sent: Ekj hab junt von kjlien aun jedroacht; ekj hab junt noch emma besorcht.

⁴Un bat jie oolt sent, sie ekj deeselwja, un woa junt droagen bat jie greiwe Hoa kjrieen. Ekj muak junt un woa junt hoolen, ekj woa junt droagen un raden.

⁵Met wäm well jie mie vejlikjen? Wäa es soo aus ekj sie? Aun wäm denkj jie, daut ekj soo saul sennen aus dee?

⁶Menschen schedden Golt utem Pinjel, un wäajen daut Selwa opp eene Wichtschol; see nämen sikj een Goltschmett aun, daut dee an een Gott doavon moakt, ver däm see sikj kjneeen un aunbäden.

⁷See häwen sikj dän oppem Schulla un droagen dän, see stalen dän wua han un dee blift doa; dee kaun sikj nich bewäajen. Wan däm wäa aunroopt, jeft dee kjeene Auntwuat, un kaun kjeenem en sien Trubbel halpen.

⁸Jie, dee jie orrajcht doonen, besent junt; denkjt dit äwa un vejät daut nich;

⁹waut deed ekj lang trigj, don emol? Ekj sie Gott, un doa es kjeen aundra. Ekj sie Gott un sie met sest kjeenem to vejlikjen.

¹⁰Ekj saj von väaren nenn, waut passieren saul, un hab von jee häa jesajcht, waut komen woat; un saj noch wada: Waut ekj jeplont hab, woa ekj foadich moaken, un daut waut ekj mie väajenomen hab, woa ekj doonen.

¹¹Von en een framdet Launt em Oosten, roop ekj eenen Odla häa; ekj brinj eenen Maun dee mien Plon utfieet. Soo aus ekj daut jesajcht hab, woat daut woaren; waut ekj jeplont hab, woa ekj doonen.

¹²Horcht emol häa, jie heltablesje Menschen, dee jie wiet auf von jerajcht sent:

¹³Ekj kom jerajcht moaken, daut es dicht bie. Ekj woa raden un nich siemen; ekj woa Zion Heil jäwen, un Israel harlich moaken.