Read Plautdietsch (Low German) – De Bibel Jesaja 47 Bible Online

Jesaja 47 - Plautdietsch (Low German) – De Bibel bible

Jesaja 47

¹Stie emol rauf, du scheene Mejal Babel, vejat von dien Troon un sett oppe Ieed em Stoff, du scheenet Chaldäa Volkj. Daut woat nich mea von die jesajcht woaren, daut du wieekjlich un vewant best.

²Hia, nemm de Hauntmäl un mol waut Mäl; nemm dien Schleia un diene schmocke Kjleeda auf; wies diene kole Been un go derch daut Wota.

³Du woascht dien kolet Fleesch wiesen, un diene Schaund woat openboa woaren. Ekj woa Rach eewen un kjeena woat mie aufwäaren.

⁴Soo sajcht dee, wäa ons von onsen Fient rat, hee heet, de HAR, dee aules rejieet; hee es de Heilja en Israel.

⁵Sett stell em diestren un saj nuscht, du scheenet Chaldäa Volkj; du woascht nich mea “De Wieetsche äwa de Velkja” sennen.

⁶Aus ekj veläajen met mien Volkj wia, jeef ekj an äwa en diene Macht, un leet an toschaund moaken; oba du hautst kjeen Jaumahoat fa an, un muakst daut soogoa fa de oole sea schwoa.

⁷Du dochst daut du emma wurscht de Wieetsche bliewen, un dochst nich aun woo daut aum Enj utkomen wudd.

⁸Nu horch emol no dit, dee du die soo väl latst scheen gonen, un die soo secha best aus een Kjint enne Wieej: Du jleefst aules dreit sikj rom die, un daut kjeena die waut aundoonen kaun, un jleefst du woascht nienich onen Maun un Kjinja sennen.

⁹Dit woat die beides bejäajnen, un daut plazlich, en eenen Dach: Du woascht Wätfru un onen Kjinja sennen. Du woascht de volle Mot opp eemol kjrieen, krakjt eendoont wooväl Zaubarie un stoakje Hakjsarie du driewen woascht.

¹⁰Die wia daut eendoont wäajen diene Sinden, un dochst kjeena sach daut. Diene Weisheit un dien jelieedet veleiden die, un du jleewsd du wieescht de eensja, un daut du aun kjeenen aundren denkjen brukst.

¹¹Oba nu woat een Schoden opp die komen, dän du nich met Zaubarie aufwäaren woascht; grootet Onheil woat die äwafaulen, woont du nich bekjeepen woascht; du woascht plazlich vedorwen woaren, soo aus du nich jedocht hast.

¹²Doawäajen eew du diene Hakjsarie un aul dien Zauba Gloowen, dän du noch von junk opp soo sea jeeeft hast, un see auf dee die Schutz jäwen ooda de Jefoa wajch enjsten woaren.

¹³Du hast die, met aul dien Rot sieekjen, meed jemoakt; nu lot dee, woone dän Himmel studieren un de Stierns kjanen un bie jieda Niemon sajen, waut nu fa die komen saul, äwadäl komen un die raden.

¹⁴Nu woa jie seenen, wuatoo dee goot sent. Dee woaren veschwinjen aus Stoppel em Fia, dit es een Braunt, bie woonen see sikj nich raden woaren. Dit es kjeen Gloot, daut eena sikj doa oppwoamt, ooda Fia ver woont eena setten kaun.

¹⁵Soone Help sent aul dee, met woone jie junt bemieecht haben; dee, derch woone jie noch emma haben no Rot jesocht. Dee sent aula opp däm Errwajch; kjeena von dee kaun junt halpen.