Read Plautdietsch (Low German) – De Bibel Jesaja 50 Bible Online

Jesaja 50 - Plautdietsch (Low German) – De Bibel bible

Jesaja 50

¹Dit es waut de HAR sajcht: Wua es de Breef, dee doa sajcht, daut ekj jun Volkj wajchjeschekjt hab, soo aus een Maun sikj von siene Fru scheeden deit? Ooda wua es deejanja, däm ekj waut schuldich wia? (Doa es nuscht soont! ) Jie worden wäajen june Sinden vekoft, un jun Volkj wort wäajen äa Vegonen wajchjeschekjt.

²Wuarom wia doa kjeena aus ekj kjeem? Wuarom wia kjeene Auntwuat aus ekj roopt? Es mien Oarm too kort, daut dee nich frie moaken kaun? Hab ekj nich mea de Krauft junt to raden? Ekj bruck bloos schellen, un dan drieecht daut Mäa ut, un de Riefasch woaren eene Wiltnis, soo daut de Fesch doot gonen un stinkjen, wiels doa nich jenuach Wota es.

³Ekj moak dän Dach gaunz diesta, un bedakj dän Himmel met Truakjleeda.

⁴Gott de HAR jeft mie en, waut ekj sajen saul, soo daut dee, dee meed sent, jeholpen sent. Hee wakjt mie aule Morjen opp, un spezt mien Ua, daut ekj horch, aus eena biem Unjarecht.

⁵Gott, de HAR, haft mie Uaren doatoo jejäft, un ekj sie nich onjehuarsom un go nich trigj.

⁶Ekj jeef mienen Rigjen han toom vewippen, un miene Baken no dee, dee mie dän Boat utreeten; ekj vestuak mien Jesecht nich ver dee, waut mie vespotten un bespäajen.

⁷Oba Gott, de HAR, halpt mie, un doawäajen bruck ekj mie nich schämen; ekj stal mien Jesecht han, aus wan daut een Fiasteen wia, un weet daut ekj nich woa toschaund jemoakt woaren.

⁸Dee wäa fa mie gootsajcht, es dicht bie. Wäa well waut jäajen mie sajen? Well wie beid ons Stekj sajen. Wäa es mien Jäajna? Lot am väakomen.

⁹Gott de HAR halpt mie; wäa woat mie beschuljen? Dee woaren aula veschwinjen aus Kjleeda dee von Motten vefräten woaren.

¹⁰Wäa haft Forcht fa däm HARN un jehorcht waut sien Deena sajcht? Uk wan hee em diestren jeit un kjeen Licht haft, lot am sikj opp däm HARN sienen Nomen veloten un siene Hopninj opp Gott saten.

¹¹Dee waut doa Fia aunstekjen un met Fiastakja rom gonen, lot bie daut Licht von äa Fia gonen, daut see selfst aunjestekjt haben. Dee woaren miene Haunt noch to feelen kjrieen un en Kwol to ligjen komen.