Read Plautdietsch (Low German) – De Bibel Jesaja 53 Bible Online

Jesaja 53 - Plautdietsch (Low German) – De Bibel bible

Jesaja 53

¹Wäa wudd daut uk jejleeft haben, waut wie jehieet haben? Wäa wudd daut enjeseenen haben, daut de HAR dit aun Haunt haud?

²Hee leet am väakomen aus een frescha Aust un aus eene Wartel ut de drieeje Ieed. Doa wia nuscht besondret aun am, daut wie am hauden sult kjanen, un nuscht auntrakjendet, daut ons no am trakjen deed.

³Wie sagen am aus een Utbunt un aus veacht; hee haft väl jeläden un es krank jewast. Hee wia aus eena, dee sien Jesecht nich wees; hee wia een Utbunt un wie räakjenden am nuscht.

⁴Doch de Krankheit, dee hee druach, wia onse; daut lieden, waut ons troff, druach hee. Oba wie dochten Gott muak am lieden un bestroft am.

⁵Doch wia hee wäajen onse Sinden velazt; hee bruak unja ons vegonen dol. Opp am lach de Strof dee ons heel muak; doaderch daut hee de Schläaj kjrieech, sent wie jesunt.

⁶Wie wieren aula oppem Errwajch, soo aus Schop, dee jieda sienen ieejnen Wajch gonen. Oba de HAR läd aul ons ojjerajcht sennen opp am.

⁷Däm haben see sea toojesat un am daut schwoa jemoakt, oba hee haft niemols jekloacht. Krakjt soo aus een Schop, daut no de Schlachtstäd jeleit woat, ooda aus een Muttaschop, wan daut jeschoaren woat, neem hee daut stell han.

⁸Hee wort faustjenomen un veuadeelt; un wäa säd waut, aus see am wajchleiden? Hee must sien Läwen hanjäwen fa de Schult waut mien Volkj vedeent haud.

⁹Sien Grauf wia mank de Sinda un rikje, un doch haud hee kjeenem Jewault aunjedonen, un haud kjeene Läajes jerät.

¹⁰Däm HARN jefoll daut, däm Kjnajcht to schlonen un lieden to loten. Wan hee sien Läwen aus een Schultopfa jejäft haft, dan woat hee Nokomen haben un lang läwen; un de HAR woat sikj freien daut et soo schauft.

¹¹Wiels siene Seel sikj soo hanjejäft haft, woat hee daut Licht seenen un tofräd sennen. Derch daut, waut hee weet, woat mien jerajchta Deena väle jerajcht moaken, wiels hee äare Sinden drajcht.

¹²Un doafäa woa ekj am mank de groote talen; hee woat met de stoakje dän Jewenst toojedeelt kjrieen. Hee haft sien Läwen bat däm Doot hanjejäft, un leet sikj met Sinda jlikj jetrocken woaren. Hee nemt väle äare Sinden auf, un steit fa de Sinda en.