Read Plautdietsch (Low German) – De Bibel Jesaja 54 Bible Online

Jesaja 54 - Plautdietsch (Low German) – De Bibel bible

Jesaja 54

¹Frei die, dee du kjeene Kjinja hautst, bliew nich mea stell; komm äwadäl met sinjen, dee du nich schwanga jewast best. Dee waut nu tosied jesat es, woat mea Kjinja haben aus de Befriede, sajcht de HAR.

²Moak dän Hoff fa dien Zelt jrata. Rakj de Zeltdakjen wieda rut un spoa nich; bruck lenjre Strenj, un stoakjre Zeltstekjels.

³Du woascht nu rajchtsch un linkjsch utbreeden. Diene Nokomen woaren Velkja oawen, un du woascht velotne Städa besiedlen.

⁴Hab nich angst, du woascht die nich schämen brucken; du woascht nich vespott woaren, du woascht nich veacht sennen. Du woascht de Schaund von diene junge Joaren vejäten, un nich mea doaraun denkjen, woo du aus Wätfru veacht wieescht.

⁵Dee wäa die jemoakt haft es dien Maun, sien Nomen es, de HAR, dee aules rejieet. Dee wäa fa Israel heilich es, rat die vom Fient; hee es Gott äwa de gaunze Welt.

⁶De HAR roopt sikj die nu, krakjt aus wan du eene aufjestade Fru wieescht, dee gaunz doljeschloagen wia; kaun wäa de Fru von siene Jugent tosied saten? frajcht dien Gott.

⁷Ekj hab die fa een stootje tosied jesat, oba woa sea leeftolich sennen, wan ekj die trigj toopsaumel.

⁸Een stootje rand mie de Oaja äwa, soo daut ekj mie von die wajchdreid; oba ekj woa emma leeftolich un jenstich to die sennen, sajcht de HAR, dee die vom Fient rat.

⁹Soo aus ekj emol to Noah säd: Daut Wota woat nienich wada de Ieed bedakjen, soo jäw ekj nu mien faustet Vespräakjen, daut ekj nich woa veläajen met junt woaren un nich mea schellen woa.

¹⁰Wan uk de Boaj vegonen wudden ooda Humpels wieda jesat worden, wudd miene truhoatje Leew fa die nich vegonen, un mien Frädens Bunt nich tosied jesat woaren, sajcht de HAR, dee waut äwrich fa die haft.

¹¹Du ojjlekjelje, dee kjeen Troost funk, dee du aules hanhoolen must, ekj woa kostboare Steena en diene Mieren saten, un Safiersteena fa dien Fundament lajen.

¹²Diene Däakja sellen von Rubinen sennen, diene Puaten von kostboaret Steen, un de gaunze Mia von diere Steena.

¹³Aul diene Kjinja woaren sikj vom HARN lieren loten, un dee woaren tofräd un sea jlekjlich sennen.

¹⁴Daut woat bie die von Grunt opp rajcht häagonen. Doa woat kjeena sennen waut die unjadrekjt, die woat kjeena enjsten ooda grulen.

¹⁵Wan wäa met die stritt, dan es daut nich von mie; wäa die aunjript, woat derch die tofaul komen.

¹⁶Ekj sie deejanja, wäa dän Schmett häajestalt haft, dee met de Blosbaulj oppe Kolen blost, un daut Jewäa fa dän Kjrich häastalt; un ekj sie deejanja, wäa dän häastald, dee daut groote vedoawen brocht.

¹⁷Kjeena kaun soont häastalen, waut junt venichten woat; un een jiedra, dee die wäajen waut vekloacht, däm woascht du met diene Auntwuat stell moaken. Soo woat dee, dee däm HARN deenen, daut gonen; soo woa ekj daut enfieren, daut Sachen rajcht gonen, sajcht de HAR.