Read Plautdietsch (Low German) – De Bibel Jesaja 55 Bible Online

Jesaja 55 - Plautdietsch (Low German) – De Bibel bible

Jesaja 55

¹Nu komt, wäm doa darscht! Hia es Wota fa junt. Jie, dee kjeen Jelt haben, komt, kjeept, un ät. Komt un kjeept Wien un Malkj onen Jelt ooda betolen.

²Wuarom vebruck jie jun Jelt fa soont, waut nich Broot es, ooda jun Vedeenst fa daut, waut nich tofräd stalen kaun? Horcht no waut ekj saj, dan woa jie goodet to äten kjrieen, un junt to daut scheenste em Läwen freien.

³Horcht no daut, waut ekj saj, un komt no mie; lot junt dit groot woaren, dan woa jie Läwen haben. Ekj woa eenen Bunt met junt moaken, dee opp emma bestonen woat, un junt truhoatich goot sennen, soo aus ekj David wia.

⁴Ekj sad junt han, daut jie Zeijen wieren, dee de Velkja leiden un jebeeden deeden.

⁵Nu woa jie Velkja roopen, waut junt framd sent; soone waut junt nich kjanen, woaren aunjerant komen, wiels de HAR jun Gott, dee waut fa Israel heilich es, junt soo harlich jemoakt haft.

⁶Sieekjt junt däm HARN, soo lang aus hee sikj finjen lat; roopt am wan hee noch dicht bie es.

⁷De beesa saul nich mea soo läwen aus ieescht, un de Sinda saul aundre Jedanken fieren. Lot am trigj nom HARN komen, daut hee am kaun jenstich sennen. Lot am sikj no Gott kjieren, dee väl vejeft.

⁸Jie denkjen nich soo aus ekj denkj, un june Wäaj sent nich soo aus miene Wäaj, sajcht de HAR.

⁹Soo väl hecha aus de Himmel äwa de Ieed es, soo väl hecha sent miene Wäaj aus june Wäaj, un es mien denkjen aus jun denkjen.

¹⁰Krakjt soo aus de Räajen un daut Schnee vom Himmel faulen, un doa nich wada trigj hangonen, oba de Ieed wessat, daut dee fruchtboa es un waussen lat, un Sot toom seien un Broot toom äten jeft,

¹¹soo saul mien Wuat, woont ekj räd, sennen. Daut woat nich ladich no mie trigjkomen; daut woat daut doonen, waut ekj haben wull, un daut doonen, wuatoo daut jejäft es.

¹²Jie woaren junt freien wan jie rutgonen, un jie woaren frädlich jeleit woaren. De Boaj un de Humpels woaren ver junt oppschrieen un sinjen, un de Beem woaren äare Henj klautschen.

¹³De Ziepres woat dan enne Städ von Spekjasch, un enne Städ Struck woaren de Mirten waussen. Daut woat eene Aunerkjanunk fa däm HARN sennen, daut opp emma blift un nich wajchjeit.