Read Plautdietsch (Low German) – De Bibel Jesaja 56 Bible Online

Jesaja 56 - Plautdietsch (Low German) – De Bibel bible

Jesaja 56

¹Dit es waut de HAR sajcht: Hoolt junt aun daut, waut rajcht es, un haundelt opp eenen jerajchten Wajch, wiels mien Heil kjemt boolt, un daut rechtje Läwen, woont ekj junt lia, woat boolt openboa sennen.

²Daut woat goot fa däm sennen, wäa dit deit un sikj aun dit helt, daut hee dän Sabat helt un dän nich jemeen helt, un daut hee no sikj oppaust un nich orrajcht deit.

³Lot daut nich von de framde jesajcht woaren, dee sikj nom HARN jekjieet haben, daut de HAR an woat tosied saten von sien Volkj; un lot daut nich von dän jeschnädnen jesajcht woaren, daut hee mau een drieeja Boom es.

⁴Wiels de HAR sajcht: De jeschnädne, dee mienen Sabat hoolen un soo läwen aus mie daut jefelt, un sikj to mienen Bunt hoolen,

⁵dee woa ekj een Aundenkjen un Aunerkjanunk benna de Wenj von mien Hus jäwen. Daut woat mea Wieet sennen aus wan see Säns un Dajchta jehaut hauden. Dee woaren aunerkjant sennen un nienich tosied jesat woaren.

⁶Framde woaren sikj nom HAR kjieren un am deenen un am goot sennen. See woaren siene Deena woaren un dän Sabat hoolen un dän nich jemeen moaken. See woaren mienen Bunt hoolen,

⁷un ekj woa an no mienen heiljen Boajch brinjen un an daut loten scheen gonen en mien Hus, wua jie aunbäden. Äare Brauntopfa un Schlachtopfa woaren opp mienen Aultoa aunjenomen sennen, wiels mien Hus woat fa aule Velkja een Bädhus sennen.

⁸Gott de HAR, dee de vestade von Israel toopbrinjt, sajcht: Ekj woa noch mea toopbrinjen aus nu aul jesaumelt sent.

⁹Lot de Velkja komen mien Volkj aunjriepen, soo aus Tieren von de Stap un vom Woolt fräten komen.

¹⁰De Wajchta en Israel sent aula blint, dee haben kjeen Vestentnis; dee sent aus stomme Hunj, waut nich balen kjennen. Dee ligjen un dreemen; an jeit daut schlopen sea scheen.

¹¹Dee sent soo bejierich aus Hunj, dee nienich jenuach kjrieen. De Hoads, dee Israel leiden, vestonen äare Oabeit nich, un sent jieda äaren ieejnen Wajch jegonen. Een jiedra jeit doahan, wua hee daut mieeschte kjricht.

¹²See sajen: Komt emol häa. Well wie ons Wien holen, un ons goot voll drinkjen. Morjen woat soo scheen gonen aus vondoag, un veleicht noch väl scheena.