Read Plautdietsch (Low German) – De Bibel Jesaja 59 Bible Online

Jesaja 59 - Plautdietsch (Low German) – De Bibel bible

Jesaja 59

¹Horcht emol. Däm HARN sien Oarm es nich too kort, daut hee nich raden kaun. Siene Uaren sent nich doof jeworden, daut hee nich mea hieren kaun.

²Doa es waut tweschen junt un Gott jekomen, waut jie selfst veschulcht haben; june Sinden haben am doatoo jebrocht, sikj wajchtodreien un nich no junt to horchen.

³Jie sent schuldich von Jewault eewen, un daut doonen waut orrajcht es; waut jie sajen, es nich soo, un jun fuschlen es schlajcht.

⁴Kjeena es jerajcht en waut hee velangt, kjeena rät de Woarheit em Jerecht. Dee beroopen sikj opp Zeijen, dee nuscht weeten, un bliewen nich bie de Woarheit. Dee nämen sikj daut väa, waut nich goot es, un fieren daut ut, waut eene Sind es.

⁵Daut es aus wan see Schlangen Eia brooden, un een jeftjet Spandenjewäw spennen; wäa de Eia at, stoaft doavon un wan daut Ei tweijeschloagen woat, kjemt doa eene jeftje Schlang rut.

⁶Waut see wäwen, es nich fa Kjleeda to brucken, un waut see spennen, daucht nich toom toodakjen. Waut see foadich brinjen, es waut beeset, un äare Henj doonen, waut schlajcht es.

⁷See spooden sikj, wan see orrajcht doonen kjennen, un sent boolt reed een Läwen to nämen; äare Jedanken sent schlajchte Jedanken, un wua see gonen, woat velazt un vedorwen.

⁸See vestonen nich frädlich to haundlen, un vesieekjen nich daut rajchte to doonen. See haben veschiednet krommet väa, waut nich to dän Fräd deenen kaun.

⁹Met aul dit, sent wie wiet auf von daut waut rajcht es, un wie komen nich bat doa, wua wie jerajcht sent. Wie luaren daut saul oppkloaren, un daut blift dunkel; wie wachten, daut saul dach woaren, un gonen em diestren rom.

¹⁰Wie langen em diestren aus een blinja, soo aus dee, dee nich seenen kjennen; wie stolpren äwadach aus em Tweediesta, un mank de stoakje aus Doodje.

¹¹Wie gnorren aula aus de Boaren un gurren aus de wille Duwen; wie luaren, daut rajcht jehaundelt saul, oba soont jeft daut nich. Wie hopen opp de Radunk, oba daut es wiet auf.

¹²Du weetst woo foaken wie jefollen sent, un onse Sinden stonen jäajen ons. Ons Vegonen es ons sea em Stich, un wie weeten, waut wie orrajcht jedonen haben.

¹³Wie sent nich jehuarsom jewast, un haben däm HARN nich siene Städ jejäft; wie haben ons von Gott sienen Wajch jedreit. Wie räden von aundre auflaupsen un jäajenaun sennen; wie räden Läajes, dee wie ons trajchtjelajcht haben.

¹⁴Daut rajchte doonen es ons nich wichtich, un jerajcht sennen blift wiet auf; daut opprechtich sennen stolpat oppe Gaussen, un de Woarheit haft kjeenen Plauz.

¹⁵Opprechtich sennen es nich mea, un wäa nich orrajcht deit, woat utjenuzt. <h>De HAR woat halpen</h> De HAR sitt daut un am jefelt daut nich, daut nich nom rajchten jeseenen woat.

¹⁶Hee sach, daut doa kjeena wia, un am wundat daut, daut kjeena doa waut met deed. Dan rad hee met sienen ieejnen Oarm, un wiels hee jerajcht es, kunn hee daut derchfieren.

¹⁷Hee kjeem äwadäl met rajcht doonen, aus wan daut sien Brostschilt un sien radenda Hoot wia; runtom kunn eena seenen, woo veläajen hee wia, un daut hee Rach eewen wudd.

¹⁸Hee woat bestrofen, doano aus see jedonen haben; dee waut jäajen am sent, woaren sienen Oaja kjrieen. Siene Fiend woat hee jäwen, waut see vedeent haben; hee woat wiet un breet trigjtolen.

¹⁹Dan woaren see em Wasten Forcht haben fa sienen Nomen, un dee em Oosten fa woo harlich hee es; hee woat aus een rietendet Wota komen, daut vom HARN sien Odem jeschowen es.

²⁰Hee woat dee raden, dee en Zion sent, un Jakob siene Nokomen, dee sikj von de Sind wajchdreien. Dit sajcht de HAR.

²¹Fa mien Poat es dit mien Bunt met an, sajcht de HAR. Mienen Jeist, dee en die es, un de Wieed, dee ekj die en dien Mul jejäft hab, woaren nich von die jenomen woaren, un nich von diene Kjinja jenomen woaren, un dee woaren fa aule Tieden nich von june Nokomen jenomen woaren, sajcht de HAR.