Read Plautdietsch (Low German) – De Bibel Jesaja 6 Bible Online

Jesaja 6 - Plautdietsch (Low German) – De Bibel bible

Jesaja 6

¹Daut Joa aus de Kjennich Usija storf, sach ekj däm HARN huach erhowen un opp eenen groosoatjen Troon setten. Un daut unjaschte Enj von sien Rock bedakjt de gaunze Flua vom Tempel.

²Rom am stunden Serafen, dee jieda sas Flichten hauden. Met twee Flichten bedakjten see sikj de Jesechta, met twee bedakjten see sikj äare Feet, un met twee fluagen see.

³Dee roopten eena nom aundren: Heilich, heilich, heilich! es de HAR, dee aules rejieet! De gaunze Welt wiest, woo harlich hee es!

⁴Un wan dee soo roopten dan scheddad de Schwal, un daut Jebied wia gaunz voll Ruak.

⁵Un ekj säd: Woo saul daut noch met mie! Dit kunn mien Enj sennen. Soo aus ekj räd, es nich rajcht, un ekj sie eena von een Volkj, dee nich daut rajchte sajen; oba nu hab ekj met miene Uagen dän Kjennich jeseenen, dän HARN, dee aules rejieet.

⁶Dan fluach eena von de Serafen no mie, un dee haud eene Tang enne Haunt, un en de Tang haud hee een jlieejendet Stekj Gloot, daut hee vom Aultoa jenomen haud.

⁷Un dee schieed met daut aun miene Leppen naun un säd: Nu daut dit diene Leppen aunjeschieet haft, veschwinjt diene Schult von die, un diene Sinden sent vejäft.

⁸Un ekj hieed däm HARN waut sajen. Hee säd: Wäm saul ekj schekjen? Wäa woat fa ons gonen? Un ekj säd: Ekj sie hia. Du kaust mie schekjen.

⁹Un hee säd: Go saj dise Lied: Jie woaren daut emma wada hieren, oba woaren daut nich vestonen; jie woaren emma wada kjikjen, oba nich Ensecht kjrieen.

¹⁰Moak an daut Jewessen stomp un stopp äare Uaren too un bedakj äare Uagen, soo daut äare Uagen nich seenen kjennen un de Uaren nich hieren kjennen un äa Jewessen nich schauft. Wan dee schaufen wudden, wudden see sikj aundasch enstalen un bäta woaren.

¹¹Dan fruach ekj: Opp woo lang, Har? Un hee säd: Bat de Städa Schuntklompes jeworden sent, un doa kjeena mea wont; bat de Hiesa aula ladich stonen, un daut Launt wilt vewossen es.

¹²De HAR woat de Menschen wajchfieren, daut doa väl Städen em Launt onbewont bliewen.

¹³Un wan een Tieendel äwabliewen, woat daut Poat uk vebrent woaren. Oba soo aus doa een Stobben blift wan een Ieekjenboom ooda Lindenboom doljehakt woat, woat doa waut äwabliewen. De Stobben es daut heilje Sot.