Read Plautdietsch (Low German) – De Bibel Jesaja 60 Bible Online

Jesaja 60 - Plautdietsch (Low German) – De Bibel bible

Jesaja 60

¹De HAR sajcht: Jerusalem, sto opp, un lot dien Jesecht fa Freid strolen! Een Licht es fa die oppjedacht, un daut es äwa die oppjekomen, woo harlich de HAR es.

²Paus goot opp. Daut diestre woat de Ieed bedakjen, daut de Velkja nich weeten, aun waut see sent. Oba mien Licht woat äwa die strolen, un daut woat aun die to seenen sennen, woo harlich de HAR es.

³De Velkja woaren no dien Licht komen, un Kjennichs woat daut oppfaulen, woo dach du strolst.

⁴Kjikj emol opp un rom die. Aule vesaumlen sikj un komen hia toop; diene Säns woaren von wiet auf komen un diene Dajchta woaren em Oarm häajedroacht woaren.

⁵Dan woascht du romkjikjen un dien Jesecht woat strolen; dien Hoat woat butzen un du woascht die sea freien. Dan woaren wieetvolle Sachen no die, von äwarem Mäa jebrocht woaren, un waut de Velkja soo groosoatich muak, woat die tookomen.

⁶Doa woaren väl Kameelen en dien Launt sennen, un junge Kameelen von Midian un Efa. Aul dee von Saba woaren komen un woaren Golt un Weiruak brinjen, un dee woaren däm HARN lowen un preisen.

⁷Aul de Schop Häaden von Kedar woaren jebrocht woaren, un de Bakj von Nebajot woaren die deenen; dee woaren aunjebrocht sennen fa mienen Aultoa, un daut Hus, woont doa wiest woo harlich ekj sie, woa ekj sea straum moaken.

⁸Wäa sent dee, dee aus de Wolkjen flieejen, un aus Duwen, dee no äare Städen komen?

⁹Aule Lenda luaren no mie, aul ieeschtens de Tarsis Schäp met diene Kjinja von wiet auf; dee woaren äa Selwa un Golt met sikj brinjen, daut see däm HARN, dienen Gott, dee wäa fa Israel heilich es, ieren kjennen, wiels hee die soo harlich jemoakt haft.

¹⁰Framde woaren diene Mieren oppbuen, un äare Kjennichs woaren die toojedonen sennen. Ekj hab die en mienen Oaja doljeschloagen, oba ekj woa een jenstjet Metleet äwa die haben.

¹¹Diene Puaten woaren emma op stonen; dee woaren Dach un Nacht nich too jemoakt woaren, soo daut de Kjennichs von de Lenda no de Rieej nenn komen kjennen, met daut, waut an groosoatich muak.

¹²Daut Launt un daut Rikj, daut die nich deenen woat, woat omkomen un gaunz enne Grunt jebrocht woaren.

¹³Daut waut Libanon soo harlich muak, de Ziepressen, Buchsbeem un Taunen, woaren die jebrocht woaren, daut mien Heilichtum kaun straum jemoakt woaren. Ekj well de Städ fa miene Feet, to eene groosoatje Städ moaken.

¹⁴Dee waut die doljehoolen haben, dee woaren nu äwajebekjt komen; un dee waut die veachten deeden, woaren sikj ver diene Feet hanschmieten. Dee woaren dise Städ, “Däm HARN siene Staut”, nanen, un uk, “Daut Zion von däm, dee fa Israel heilich es”.

¹⁵Wua du veloten un nuscht jeräakjent wieescht, un wua kjeena derchreisen deed, woa ekj daut moaken, daut du opp emma schmock latst, un opp aule Tieden eene Freid best.

¹⁶Soo aus eene Mutta äa Kjint de baste Malkj jeft, soo woaren de Velkja die fläajen, un du woascht daut scheenste von de Kjennichs kjrieen. Du woascht enseenen, daut ekj, de HAR, die von diene Fiend rad, daut ekj die looskjeep, un daut ekj dee sie, wäa Jakob stoakj moakt.

¹⁷Enne Städ Brons, woa ekj die Golt brinjen, un enne Städ Iesa, woa ekj Selwa brinjen; enne Städ Holt, Brons, un enne Städ Steena, Iesa. Ekj woa Fräd aunstalen aus diene Rejierunk, un jerajcht sennen aus diene Oppsechta.

¹⁸Doa woat nich mea vebräakjen en dien Launt sennen un nuscht vedorwen ooda beschädicht woaren. Diene Mieren woascht du “Heil” nanen un diene Puaten “Preis”.

¹⁹Äwadach woat nich de Sonn dien Licht sennen, un de Nacht woat nich de Mon die Licht jäwen; de HAR woat dan dien eewjet Licht sennen, un du woascht harlich sennen, wiels hee dien Gott es.

²⁰Diene Sonn woat nich mea unjagonen, un diene Mon woat nich kjlanda woaren; de HAR woat dien eewjet Licht sennen, un diene Truadoag woaren to Enj sennen.

²¹Aul diene Lied woaren rajcht haundlen, un du woascht opp emma dien Launt haben. Du best daut Jewaus, daut ekj jeplaunt hab, daut waut miene Henj jemoakt haben, soo daut ekj woa veharlicht woaren.

²²De kjlansta enne Famielje saul een groota Staum woaren; de jerinjsta saul een stoakjet Volkj sennen; ekj, de HAR, woa dit haustich to de rajchte Tiet soo komen loten.