Read Plautdietsch (Low German) – De Bibel Jesaja 61 Bible Online

Jesaja 61 - Plautdietsch (Low German) – De Bibel bible

Jesaja 61

¹Gott däm HARN sien Jeist es opp mie jekomen, daut ekj daut doonen kaun, wuatoo de HAR mie jesaulft haft. Hee schekjt mie no dee, dee lieden, daut ekj an eene goode Norecht brinj; no dee, dee derch waut schwoaret gonen, daut ekj an Moot toospräakj; daut ekj de faustjenomne saj, see kjennen looskomen un friewoaren von daut, waut an binjt.

²Ekj saul bekaunt jäwen, daut daut Joa von däm HARN siene Gonst un de Dach, wua Gott de Sind bestroft, nu aunfangt; daut hee aul dee Troost jeft, waut nu truaren.

³De HAR sajcht, daut dee, dee en Zion wonen, woaren waut aunstendjet enne Städ Ausch oppem Kopp droagen, un Eelj aus to een Fast, enne Städ toom truaren brucken. Daut woat von an jesajcht woaren, daut see aus Ieekjen fa daut rajchte enstonen; un daut see vom HARN aunjeplaunt sent, daut see wiesen woo harlich hee es.

⁴See woaren opp daut oole Fundament fresch buen un daut opprechten, waut enne Grunt jebrocht wia; see woaren de doljebroakne Städa oppbuen, waut aul Jennerazionen vebroaken wieren.

⁵Lied von aundre Velkja woaren komen june Schop weiden, un framde woaren jun Launt fa junt oabeiden un june Wiengoades besorjen.

⁶Un jie woaren aus däm HARN siene Priesta bekaunt sennen, un jie woaren onsen Gott siene Deena jenant woaren. Jie woaren junt to de Schaza von aundre Velkja freien, un jie woaren junt derch äa Rikjtum waut meenen.

⁷Doafäa daut mien Volkj dobbelt jeläden haft, un haft must Schaund lieden, woaren see nu een dobbeldet Poat en äa Launt kjrieen, un eene Freid haben, dee opp emma blift.

⁸Ekj sie de HAR, dee daut jleicht Sachen rechtich derchtofieren un daut orrajchte un stälen nich vedroagen kaun; ekj woa bestendich doano jäwen aus see vedeent haben, un woa eenen Bunt met an moaken, dee opp emma väahelt.

⁹Äa Volkj woat mank de Velkja bekaunt sennen, un äare Nokomen en de Lenda; dee waut daut seenen, woaren vestonen daut dit Volkj vom HARN eenen Säajen jekjräajen haft.

¹⁰Ekj frei mie jehierich fa däm HARN, un miene Seel jeit daut sea scheen met mienen Gott. Sien Heil es om mie, soo aus een Rock, un sien jerajcht sennen, soo aus een Äwarock. Wie sent soo jlekjlich aus Brutlied, dee sikj to Kjast aunjetrocken haben.

¹¹Krakjt soo aus de Ieed daut Kjiensel väabrinjt, ooda aus daut Sot em Goaden oppjeit, soo lat Gott de HAR jerajcht sennen oppkomen, un goodet von sikj jesajcht woaren en aule Lenda.