Read Plautdietsch (Low German) – De Bibel Jesaja 62 Bible Online

Jesaja 62 - Plautdietsch (Low German) – De Bibel bible

Jesaja 62

¹Ekj woa om dient haulwen, Zion, nich stell sennen, un om dient haulwen, Jerusalem, woa ekj nich stell hoolen, bat dien jerajcht sennen jlenzt, un dien Heil aus eene dache Flaum to seenen es.

²De Lenda woaren enseenen, daut du jerajcht best, un de Kjennichs enseenen, waut aun die soo harlich es; du saust eenen nieen Nomen kjrieen, dän de HAR die jäwen woat.

³Du woascht eene straume Kroon en däm HARN siene Haunt sennen, eenen schmocken wieetvollen Steen, dän Gott en siene Haunt helt.

⁴Du woascht nich mea “De Velotne” heeten, ooda dien Launt “De ladje Wiltnis”. Nä, du saust “Miene scheenste”, heeten, un dien Launt saul “De befriede” heeten; wiels de HAR haft sien Jefaulen aun die un soo aus een Maun met siene Fru, woat hee eent met die sennen.

⁵Soo aus een Jung sikj met eene Mejal befriet, soo woat dee, dee die oppbut, met die eent sennen; soo aus een Briegaum sikj to siene Brut freit, woat sikj dien Gott to die freien.

⁶Jerusalem, ekj hab Wajchta opp diene Mieren aunjestalt, dee Dach un Nacht nich woaren stell sennen; dee sellen nich opphieren met däm HARN denkjen halpen.

⁷See sellen am nich loten nojäwen, bat hee Jerusalem häajestalt haft, un dee oppe Ieed jeloft woat.

⁸De HAR haft met eenen Eit opp siene Krauft vesproaken, daut hee woat june Fiend nich mea loten jun Jeträajd nämen, un uk nich junen Wien, fa woonen jie sea jeschauft haben.

⁹Dee, dee daut arnten, sellen daut to äten kjrieen, un dän HARN lowen; un dee, dee de Wiendruwen toopläsen, sellen opp däm Hoff von mien Heilichtum doavon to drinkjen kjrieen.

¹⁰Got mau! Got derch de Puaten. Moakt dän Wajch reed fa daut Volkj. Moakt eenen grooten Wajch reed! Moakt dän foadich! Riemt de Steena tosied. Wiest de Lied june Flag.

¹¹Horcht! De HAR lat aulawäajen oppe Ieed bekaunt jäwen: Sajcht to daut scheene Zion: Kjikjt emol! Jun Heil es oppem Wajch. Hee haft daut, waut hee jewonnen haft, met sikj, un daut Volkj, woont hee frie jemoakt haft, kjemt am veropp.

¹²See woaren “Daut heilje Volkj” un uk “Dee, woone de HAR vom Fient jerat haft” jenant woaren; un du woascht “Dee, woone jesocht woat”, un “De Staut, dee nich veloten es” heeten.