Read Plautdietsch (Low German) – De Bibel Jesaja 63 Bible Online

Jesaja 63 - Plautdietsch (Low German) – De Bibel bible

Jesaja 63

¹Wäa kjemt hia, däm siene Kjleeda soo root jeworden sent? Dee jeit steil, es stoakj, haft goode Kjleeda un kjemt von de Staut Bozra en Edom. “Daut sie ekj, dee wäa jerajcht es en waut hee rät; ekj hab de Macht, daut ekj raden kaun.”

²Wuarom sent diene Kjleeda soo root, aus wan du hast Wiendruwen utjeklunjt?

³“Ekj sie auleen biem Wiendruwen veklunjen jewast; kjeena von mank de Velkja haft mie doabie jeholpen. Ekj veklunjd an en mienen Oaja un vetraumpeld an en Wutt; un daut sprezt aun miene Kjleeda, daut dee gaunz root worden.

⁴Ekj haud mie eenen Dach väajenomen, aun däm ekj veräakjnen wull; daut Joa wia jekomen, wua miene sullen trigjestalt woaren.

⁵Ekj kjikjt, un doa wia kjeena toom mie halpen; mie wundad daut, oba kjeena stunt mie bie. Un soo holp mien Oarm mie, un miene Wutt stunt mie bie.

⁶Ekj hab de Velkja en mienen Oaja vetraumpelt un jeef dee mea aus jenuach von miene Veläajenheit; ekj hab äa Läwens Bloot oppe Ieed utranen loten.”

⁷Mie es daut groot, woo tru däm HARN siene Leew es, ekj preis am fa de Wunda waut hee jedonen haft; ekj low däm HARN fa daut waut hee fa ons jedonen haft, fa väl goodet, waut hee fa Israel jedonen haft, en sien grootet Metleet un siene truhoatje Leew.

⁸Hee säd: See sent doch mien Volkj; miene Säns woaren doch nich hinjarigjsch sennen. Un doawäajen rad hee an

⁹en aul äare schwoare Tieden. Hee schekjt nich een Enjel ooda sest wäm; hee wia selfst doa un rad an, wiels hee an goot wia un am daut äwa an jaumad. Doawäajen koft hee an loos, un hoof an rut un druach an de gaunze Tiet, aul von ieescht emma.

¹⁰Oba see wieren jäajenaun, un haben doamet sienen Heiljen Jeist jestat; un soo wort hee an fientlich, un hee kjamft jäajen an.

¹¹Un dan dochten see wada, woo daut emol jewast wia, un aun däm HARN sienen Kjnajcht Moses. See fruagen: Wua es dee, wäa de Leidasch von sien Volkj utem Wota trock; wua es dee, wäa an sienen Heiljen Jeist jeef?

¹²Wäa jinkj met siene stoakje Macht aun Moses siene rajchte Sied? Wäa es opp emma doafäa bekaunt, woo hee daut Mäa ver an deeld

¹³un an derch dän Boddem leid? Soo aus Pieed sikj enne Wiltnis nich vestaupen,

¹⁴un soo aus Vee, daut sikj en een Tol loagat, leet däm HARN sienen Jeist an reiwen. Soo hast du dien Volkj jeleit, un die eenen harlichen Nomen jemoakt.

¹⁵Kjikj emol vom Himmel, un see die daut aun von dienen heiljen un harlichen Plauz. Woo kaust du daut vedroagen? Wua es diene Macht? Dien Metleet un diene Jnod woaren von mie jehoolen.

¹⁶Du best doch ons Voda. Abraham weet nuscht von ons, un Israel kjant ons nich. Oba du, HAR, best ons Voda; von ieescht emma es dien Nomen “Ons Rada” jewast.

¹⁷Wuarom latst du, HAR, ons von dienen Wajch raufgonen? Un wuarom latst du ons eendoontich woaren, daut wie nich mea Forcht fa die haben? Kjia die wada no ons, wäajen dee, dee die deenen, wäajen de Stam, dee noch emma diene jewast sent.

¹⁸Een kortet stoot haben see daut Volkj, daut die heilich es, enjenomen; de Fiend haben dien heiljet Hus vetraumpelt.

¹⁹Un wie sent nu aus een Volkj, woont du nienich rejieet hast; un aus wan dien Nomen nienich äwa ons jewast es. Muchst du doch emol dän Himmel opprieten un rauf komen, soo daut de Boaj sikj ver die schudaden.