Read Plautdietsch (Low German) – De Bibel Jesaja 64 Bible Online

Jesaja 64 - Plautdietsch (Low German) – De Bibel bible

Jesaja 64

¹Sie du soo aus wan Fia em Struck nenn fot, ooda Wota opp een Fia aunfangt to rollen, soo daut dien Nomen mank de Fiend bekaunt wort, un de Velkja sikj ver die schudren musten.

²Komm soo aus to de Tieden, aus wie ons enjsten musten, un du daut deetst waut wie nich jedocht hauden. Dan kjeemst du rauf, un de Boaj schudaden sikj ver die;

³soont haud kjeena ea jeseenen. Kjeen Ua haft mol jehieet, un kjeen Uag haft jeseenen, daut doa een Gott wia buta du, dee soont deit fa dee, dee sikj no am kjieren.

⁴Du kjemst dee wellich entjäajen, waut daut rajchte doonen, un waut doaräwa bedocht sent, woo du haben west, daut wie läwen. Du worscht veläajen aus wie orrajcht deeden; un wie haben von jee häa soo jeläft. Kaust du ons noch raden?

⁵Wie sent aula soo aus dee, dee jesazlich orrein sent. Dee dee ons sull rajcht bewiesen, es aus een schwienschet Kodda. Wie sent aus vedrieejde Bläda, un onse Sinden fäajen ons tosied soo aus een Wint.

⁶Un doch bät kjeena die aun, kjeena bemieecht sikj, sikj aun die to hoolen; du hast dien Jesecht von ons wajch jedreit, un latst ons unja onse Schult veschmachten.

⁷Oba HAR, du best doch ons Voda. Wie sent daut Leem un du best de Toppstrikja; wie sent daut, waut du von ons moakst.

⁸HAR, sie nich gaunz veläajen, un droag ons onse Sinden nich opp emma no. Horch doch, wie prachren die, denkjt doaraun, daut wie aula dien Volkj sent,

⁹un diene heilje Städa eene Wiltnis jeworden es. Zion es enne Grunt jebrocht, un Jerusalem es en Ruinen.

¹⁰Ons heiljet un harlichet Hus es vebrent. De Städ wua onse Vodasch die lowden, un aul daut, waut wie fa Straums hauden, es nu vedorwen.

¹¹HAR, woascht du die en aul dit bloos trigjhoolen un stell bliewen, un ons loten soo schlemm bestroft woaren?