Read Plautdietsch (Low German) – De Bibel Jesaja 7 Bible Online

Jesaja 7 - Plautdietsch (Low German) – De Bibel bible

Jesaja 7

¹Daut passieed emol aus Ahas, Jotam sien Sän un Usija sien Grootsän, Kjennich en Juda wia, daut Rezin, de Kjennich von Aram, un Pekach, Remalja sien Sän, de Kjennich von Israel, jäajen Jerusalem kjeemen, om de Staut entonämen. Oba see kunnen dee nich ennämen.

²Oba aus see noch mau aunkjeemen, wort däm Kjennich, dee David sien Nokomen wia, daut jesajcht daut de Aramäa un Efraim sikj toopjeschloten hauden. Dan flautad däm Kjennich sien Hoat, soo aus de Bläda aun een Boom, wan daut windich es, un krakjt soo aule Menschen em Volkj.

³Dan säd de HAR to Jesaja, daut hee met sienen Sän, Schear Jaschub toop, sull no daut Enj von de Wotaleitinj von dän hechren Daum gonen. Daut wia aun dän Wajch dee no de Woll Kjamla äa Hoff jinkj. Doa wudd hee Kjennich Ahas trafen.

⁴Un Jesaja sull to däm Kjennich sajen: Paus opp waut du deist. Bliew ruich un enjst die nich, daut Rezin un de Aramäa un Remalja sien Sän sikj soo flaument oajren. Dee Twee sent aus twee Stekja Brenholt, dee aul mau bloos schwälen.

⁵Wan Aram un Efraim un Remalja sien Sän uk schlemmet jäajen die jeplont haben, un sajen,

⁶see woaren met äare Soldoten en Juda nengonen un de Menschen doa veenjsten un sikj daut Launt tooieejnen, un woaren Tabeal sienen Sän doa aus Kjennich aunstalen,

⁷Gott de HAR sajcht: Soo steit de Sach oba nich; daut bruck jie nich jleewen.

⁸Aram es nich stoakja aus Damaskus, un Damaskus es nich stoakja aus Rezin. En 65 Joa woat Efraim veschwungen sennen, see woaren nich mea een Volkj sennen.

⁹Efraim es nich stoakja aus Samaria, un Samaria es nich stoakja aus Remalja sien Sän. Wan jie nich eenen fausten Gloowen haben, dan woa jie nich bestonen bliewen.

¹⁰De HAR haud uk noch een aundret mol eene Norecht fa dän Kjennich Ahas. Hee wort oppjefoddat,

¹¹no een Tieekjen von däm HARN, sien Gott, to froagen. Hee durf von deep unjare Ieed bat huach aum Himmel irjent waut velangen.

¹²Oba Ahas säd hee wudd no nuscht froagen, wiels hee wull dän HARN nich aufproowen.

¹³Dan säd Jesaja: Horcht emol, dee jie David siene Nokomen sent. Es daut nich jenuach daut jie de Jedult von Profeeten, dee Menschen sent, aufproowen? Well jie uk mienen Gott aufproowen?

¹⁴Na, de HAR, dän ekj deen, woat ut sikj selfst een Tieekjen jäwen: Kjikjt emol. Eene junge Fru woat schwanga, un woat een Junkje haben. Un see woat dän Immanuel nanen.

¹⁵Ea hee weet daut hee daut schlajchte tochloten un daut goode doonen saul, woat hee nich mea aus Gloms un Honnich to äten haben.

¹⁶Un ea hee weet daut hee daut schlajchte tochloten un daut goode doonen saul, woat daut Launt von de twee Kjennichs, dee die enjsten, ladich un gaunz vedorwen ligjen.

¹⁷De HAR woat die un diene gaunze Kjennichs Famielje un dien gaunzet Volkj soont schekjen, aus jie nich jehaut haben von don aus Efraim un Juda sikj tranden. Un de assierischa Kjennich woat daut opp junt brinjen.

¹⁸Wan dee Tiet kjemt, woat de HAR piepen, daut de ägiptische Armee aus eene Bramsflieej, un daut assierische Häa aus een Schwoarm Bieen, aunjriepen sellen,

¹⁹un sikj en jieda Tol, eendoont woo deep daut es, un en jieda Spoolunk enne Boaj, en jieda Hakj von Distlen un bie jieda Drenkj hansaten.

²⁰Wan dee Tiet kjemt, woat de HAR von jantsied vom Riefa, von Assierien, een Massa komen loten un junt dän Kopp kol schäaren, un jieda Hoa aum Kjarpa aufschäaren, un soogoa dän Boat.

²¹Wan dee Tiet kjemt woat een Maun eene junge Koo un twee Schop aum Läwen hoolen,

²²un doa woat jenuach Malkj sennen toom Gloms moaken. Wäa noch en daut Launt äwablift, woat Gloms un Honnich äten.

²³Wan dee Tiet kjemt, woat daut rom komen, daut de Städ wua ieescht 1.000 Wienranken wossen un 1.000 Stekja Selwa wieet wia, woat met Distlen un Onkrut bewaussen.

²⁴Wäa doa noch gonen woat, woat een Boagen un Feilen droagen toom sikj wäaren, wiels daut gaunze Launt woat vekrut un vewossen sennen.

²⁵Un opp aul de Eewasch wua jie nu noch met de Hak weeden gonen, woa jie junt nich woagen to gonen, wiels dee soo vekrut un vewillat sent, daut jie eefach daut Vee un de Schop daut veklunjen loten.