Read Plautdietsch (Low German) – De Bibel 3. Mose 11 Bible Online

3. Mose 11 - Plautdietsch (Low German) – De Bibel bible

3. Mose 11

¹De HAR räd met Moses un Aaron un säd to an:

²Rät met de Israeliten un sajcht: Dit sent de Tieren, waut jie von aul de Tieren opp daut Launt äten derwen:

³Aules, waut jespoolde Kleiwen haft, werkjlich gaunz derchjespoolde Kleiwen, un wadakeift von de Tieren, dee derw jie äten.

⁴Bloos dise derw jie von dee nich äten, waut wadakeiwen un jespoolde Kleiwen haben: Daut Kameel, wiels daut es een Wadakeiwa, haft oba nich derchjespoolde Kleiwen, doawäajen saul junt daut orrein sennen.

⁵Daut Mäaschwienkje, daut es een Wadakeiwa, haft oba kjeene derchjespoolde Kleiwen; doawäajen saul junt daut orrein sennen.

⁶De Hos, daut es uk een Wadakeiwa, haft oba kjeene derchjespoolde Kleiwen; doawäajen saul junt dee orrein sennen.

⁷Daut Schwien, daut haft woll derchjespoolde Kleiwen, es oba kjeen Wadakeiwa; doawäajen saul junt daut orrein sennen.

⁸Von dise Tieren äa Fleesch derw jie nich äten un dee uk nich aunfoten, wan dee dootjegonen sent. Dee sellen junt orrein sennen.

⁹Von daut waut em Wota läft, derw jie dit äten: Aules, waut Flotten un Scheepen haft em Wota, em Mäa un en de Riefasch, derw jie äten.

¹⁰Aules, waut nich Flotten un Scheepen haft, von aules waut em Wota, em Mäa un en de Riefasch schwoarmt un läft, saul junt äakjlich sennen.

¹¹Von äa Fleesch derw jie nich äten un äa Os saul junt jäajenaun sennen, dee sent fa junt waut Äakjeljet.

¹²Aules, waut em Wota nich Flotten un Scheepen haft, saul junt jäajenaun sennen.

¹³Von de Väajel sellen junt dise jäajenaun sennen, daut jie dee nich äten, wiels dee sent waut Äakjeljet: De Odla, de Lamahofkje, de Feschodla,

¹⁴de Hofkjes un Raupväajel met äare veschiedne Sorten

¹⁵un aule Sorten Kraujen.

¹⁶Uk dän Straus un de Nachtul, de Meewen un dän Faulkj met siene veschiedne Sorten,

¹⁷de Kautenuarenul, dän Pielekaunt, dän Bieenfräta,

¹⁸de kjliene Ulen un Owent Väajel un dän Oshaka.

¹⁹Dän Storch, dän Reia met siene veschiedne Sorten, dän Sauntrana un de Flautamus.

²⁰Uk aul daut Ojjezeffa, waut Flichten haft un opp vea Feet jeit, saul junt jäajenaun sennen.

²¹Bloos dit derw jie äten von aules, waut sikj bewäacht un Flichten haft un opp vea Feet jeit: Waut bowa de Feet noch twee Schinkjes haft, wuamet daut oppe Ieed hupsen kaun.

²²Von de Graushoppa derw jie äten; doa sent de Arbe met äare veschiedne Sorten, de Solam met äare veschiedne Sorten, de Hargol met äare veschiedne Sorten un de Hagab met äare veschiedne Sorten.

²³Oba sest aulet Ojjezeffa, waut Flichten un vea Feet haft, saul junt een Äakjel sennen.

²⁴Aun dise woa jie junt veorreinjen. Wäa äa Os aunschieet, dee woat orrein sennen bat aum Owent;

²⁵un Wäa äa Os drajcht, saul siene Kjleeda wauschen un woat orrein sennen bat aum Owent.

²⁶Jieda Tia, waut jespoolde Kleiwen haft, oba nich gaunz derchjespoolde, un nich wadakeift, saul fa junt orrein sennen. Un wäa daut aunschieet, woat orrein sennen.

²⁷Un uk aules, waut opp Tauzen jeit von de Tieren, waut opp vea Feet gonen, sellen junt orrein sennen. Wäa äa Os aunschieet, woat orrein sennen bat aum Owent.

²⁸Un wäa äa Os drajcht, saul siene Kjleeda wauschen un orrein sennen bat aum Owent, wiels dee sent junt orrein.

²⁹Von de Tieren, waut oppe Ieed krupen, sellen junt dise orrein sennen: De Moltwarm, de Mies, de Rauten, aul de Sorten Äajdakjsen,

³⁰de Krokodiel, de Poggen, de Schlangen, un aule Sorten von Schiltkjräten un Paunzaschwien.

³¹Dise sent junt orrein von aule krupende Tieren. Wäa äa Os aunschieet, woat orrein sennen bat aum Owent.

³²Un aules, wua soon doodjet Tia noppfelt, woat orrein, eendoont auf daut heltane Dinja, Kjleeda, Lada ooda Sakj sent. Jieda Sach waut to irjentwaut jebrukt woat, saul em Wota jelajcht woaren, wiels daut es orrein bat aum Owent un woat dan wada rein.

³³Es daut een ieednet Dinkj, wua soon doodjet Tia nenn felt, dan woat aules orrein, waut doa bennen es, un daut sell jie tweischlonen.

³⁴Aul daut Äten, waut met daut Wota von en soon Dinkj jereet woat, es orrein, un uk aule Jedrenkjen sent orrein, waut ut soon Dinkj jedrunken woaren.

³⁵Un aules, wua soon doodjet Tia noppfelt, woat orrein. Wan daut een Hieet ooda een Bakowen es, saul dee oppjeräten woaren, wiels dee es orrein, un saul junt orrein bliewen.

³⁶Bloos de Borms un Zistren, wua sikj Wota bennen saumelt, bliewen rein. Wäa daut Os doabennen aunfot, es orrein.

³⁷Un wan soon Os opp Sot felt, waut jrod wäa plaunten well, dan blift daut Sot doawäajen rein.

³⁸Wan wäa Wota äwa daut Sot jegoten haft un doa dan soon Os noppfelt, dan woat junt daut orrein.

³⁹Wan eent von de Tieren dootjeit, waut jie äten derwen, dan woat dee janja bat aum Owent orrein, waut daut Os aunschieet.

⁴⁰Wäa von soon doodjet Tia at, dee saul siene Kjleeda wauschen, un woat orrein sennen bat aum Owent. Uk wäa soon doodjet Tia drajcht, saul siene Kjleeda wauschen, un woat orrein sennen bat aum Owent.

⁴¹Aule Tieren, waut oppe Ieed krupen, sellen junt jäajenaun sennen. Un derwen nich jejäten woaren.

⁴²Aules, waut opp däm Buck kjript, un aules waut opp vea ooda mea Feet jeit, mank aul daut, waut oppe Ieed kjript, derw jie nich äten; daut saul junt waut Äakjeljet sennen.

⁴³Moakt junt nich selfst to waut oppscheiseljet derch aul de krupende Kjlientieren, un moakt junt nich orrein aun dee, soo daut jie doaderch orrein woaren.

⁴⁴Ekj sie de HAR, jun Gott. Doawäajen sell jie junt heiljen, soo daut jie heilich woaren, wiels ekj sie heilich; un jie sellen junt nich orrein moaken aun irjent een Tia, waut oppe Ieed kjript.

⁴⁵Ekj sie de HAR, dee junt ut Ägipten rutjebrocht haft, om daut ekj jun Gott sie. Doawäajen sell jie heilich sennen, wiels ekj heilich sie.

⁴⁶Dit es daut Jesaz äwa de veabeensche Tieren un Väajel un äwa aule Tieren, waut em Wota läwen, un uk äwa aule Tieren, waut oppe Ieed krupen.

⁴⁷Om daut jie unjascheeden tweschen daut orreine un reine, tweschen de Tieren, waut jie äten derwen, un dee, dee jie nich äten derwen.