Read Plautdietsch (Low German) – De Bibel 3. Mose 18 Bible Online

3. Mose 18 - Plautdietsch (Low German) – De Bibel bible

3. Mose 18

¹De HAR räd met Moses un säd:

²Saj de Israeliten waut ekj an to sajen hab: Ekj sie de HAR, jun Gott.

³Jie sellen nich soo läwen aus daut en Ägipten wort, wua jie jewont haben, uk nich soo aus daut en daut Launt Kanaan woat, wua ekj junt hanbrinjen woa. Dise Velkja äare Sitten sellen junt nuscht aungonen.

⁴Jie sellen junt no miene Ordnungen rechten un miene Aunwiesungen jehorchen. Ekj sie de HAR, jun Gott.

⁵Doawäajen sell jie miene Ordnungen un Aunwiesungen befoljen. Wiels dee Mensch, dee daut deit, woat doaderch läwen; ekj sie de HAR!

⁶Kjeena von junt saul sikj irjent eenem em Frintschoft nodren, om met an Jeschlajchtsvekjia to haben. Ekj sie de HAR!

⁷Du doascht nich bie diene Mutta schlopen un doaderch dienen Voda toschaund moaken. Wiels daut es diene Mutta.

⁸Du saust met dienen Voda siene Fru nich Jeschlajchtsvekjia haben; doamet deist du dienen Voda schenden.

⁹Du saust met diene Sesta, waut dien Voda ooda diene Mutta äare Dochta es, nich Jeschlajchtsvekjia haben, eendoont auf daut rajchtet ooda toopjebrochtet Jeschwista es.

¹⁰Du saust met diene Grootdochta, de Dochta von dienen Sän ooda diene Dochta, nich Jeschlajchtsvekjia haben, wiels doamet deist du die selfst schenden.

¹¹Du saust met de Dochta von dienen Voda siene Fru, waut dienen Voda jebuaren es un diene Haulfsesta es, nich Jeschlajchtsvekjia haben.

¹²Du saust met dienen Voda siene Sesta nich Jeschlajchtsvekjia haben, wiels see es frintschoft met dienen Voda.

¹³Du saust met diene Mutta äare Sesta nich Jeschlajchtsvekjia haben, wiels see es Frintschoft met diene Mutta.

¹⁴Du saust dienen Voda sienen Brooda nich doamet schenden, daut du siene Fru nemst. Daut es diene Taunte.

¹⁵Du saust met diene Schwieedochta nich Jeschlajchtsvekjia haben, wiels see es dien Sän siene Fru; doawäajen saust du doa nich biegonen.

¹⁶Du saust met dienen Brooda siene Fru nich Jeschlajchtsvekjia haben, wiels doamet deist du dienen Brooda schenden.

¹⁷Wan du met eene Fru Vekjia hast, dan saust du nich uk noch bie äare Dochta ooda Grootdochta schlopen, waut de Dochta von äaren Sän ooda Dochta es, wiels see sent frintschoft, un doawäajen es daut waut schaundhauftet.

¹⁸Du saust diene Fru äare Sesta nich aus Näbenfru nämen un met ar Vekjia haben, soolang aus diene Fru noch läft.

¹⁹Du saust nich bie eene Fru ligjen, om met ar Jeschlajchtsvekjia to haben, soolang aus see äare moonatliche Doag haft, wiels en dee Tiet es see orrein.

²⁰Du saust uk nich bie dienen näakjsten siene Fru ligjen, daut wudd die orrein moaken.

²¹Du saust uk nich eent von diene Kjinja däm Aufgott Moloch aus Opfa vebrennen, wiels doamet deist du Gott sienen Nomen veonieren. Ekj sie de HAR!

²²Du saust nich met eenen Maun jeschlajchtlichen Vekjia haben soo aus met eene Fru, wiels daut es waut oppscheiseljet.

²³Kjeen Maun uk kjeene Fru saul met een Tia jeschlajchtlichen Vekjia haben, wiels daut es eene schentelje Veorreinjunk.

²⁴Jie sellen junt met kjeene von soone Doten veorreinjen. Met aul daut haben de Velkja sikj veorreinicht, waut ekj ver junt vedriewen well.

²⁵Doamet haben see daut Launt orrein jemoakt; un ekj trakj daut Launt to Räakjenschoft, soo daut daut Launt de Enwona utspicht un wada rein woat.

²⁶Doawäajen sell jie junt no miene Jebooten un Aunwiesungen rechten, de framde, waut bie junt wonen, krakjt soo aus june Menschen. Un doot kjeene soone oppscheiselje Doten

²⁷aus de Lied deeden, waut ver junt en daut Launt wonden un daut orrein muaken.

²⁸Sest woat daut Launt junt krakjt soo utspieen, wan jie daut orrein moaken, aus daut de väaje Enwona utjespäajen haft.

²⁹Aul dee, dee soon oppscheiseljet doonen, woaren ut äa Volkj utjerot woaren.

³⁰Doawäajen befolcht miene Aunwiesungen, un recht junt nich no de oppscheiselje Sitten von de Velkja, waut ver junt daut Launt bewonden. Doot junt nich derch soon vehoolen veorreinjen. Ekj sie de HAR, jun Gott!