Read Plautdietsch (Low German) – De Bibel 3. Mose 19 Bible Online

3. Mose 19 - Plautdietsch (Low German) – De Bibel bible

3. Mose 19

¹De HAR räd met Moses un säd:

²Räd met de gaunze Vesaumlunk von Israel un saj to an: Jie sellen heilich sennen, wiels ekj, de HAR, jun Gott, heilich sie.

³Jieda eena saul Ieaforcht haben fa siene Mutta un sienen Voda un dän Rudach, mienen Sabat, hoolen. Ekj sie de HAR, jun Gott!

⁴Jie sellen nich no aundre Jetta gonen un moakt junt kjeene jegotne Jettabilda; ekj sie de HAR, jun Gott!

⁵Wan jie däm HARN een Dankopfa brinjen wellen, sell jie daut soo opfren, daut hee jefaulen doaraun haft.

⁶Jie sellen daut Fleesch aun däm Dach äten, wan jie daut opfren, ooda uk noch aum näakjsten Dach; waut oba bat däm dredden Dach äwablift, saul vebrent woaren.

⁷Wan aum dredden Dach noch doavon jejäten woat, es mie daut jäajenaun, un daut gaunze Opfa es mie nich aunjenäm.

⁸Wäa doavon at, lot eene Schult opp sikj, wiels hee daut veonieren deit, waut biem HARN heilich es. Un soon Mensch woat utjerot woaren ut sien Volkj.

⁹Wan du dien Launt arnten deist, saust du nich aules bat en de Akjen von dien Flekj aufschnieden, uk nich noch noläsen gonen.

¹⁰Uk en dienen Wiengoaden saust du nich aules rein aufplekjen un de aufjefolne Druwen nich oppläsen. Lot doa waut äwa fa de oame un framde, waut en jun Launt wonen. Ekj sie de HAR, jun Gott!

¹¹Jie sellen nich stälen uk nich lieejen, un uk nich eena met däm aundren faulschen Haundel driewen.

¹²Jie sellen nich faulsch schwieren bie mienen Nomen un junen Gott sienen Nomen veonieren. Ekj sie de HAR!

¹³Du saust dienen näakjsten nich unja Druck saten ooda bestälen. Un dienen Doages Oabeida sien Loon saust du nich äwa Nacht bie die hoolen.

¹⁴Du saust nich eenen Fluch opp eenen doowen utspräakjen, un eenen blinjen nich eenen Kjneppel em Wajch lajen. Du saust die fa dienen Gott ferchten; ekj sie de HAR!

¹⁵Du saust em Jerecht nich ojjerajcht haundlen; du saust dän eefachen nich väatrakjen, oba uk dän Enflussrikjen nich bejensjen. Du saust dienen näakjsten rajcht rechten.

¹⁶Du saust nich Pludarie driewen mank diene Metmenschen. Du saust uk nich waut oppbrinjen toom dienen näakjsten daut Läwen to vedoawen. Ekj sie de HAR!

¹⁷Du saust nich hotdroagent sennen jäajen dienen Brooda, sträw doano de Sach to beräden, om daut du die nich wäajen am eene Schult opplotst.

¹⁸Du saust nich Rach eewen, ooda irjent waut jäajen diene Metmenschen haben. Du saust dienen Noba soo goot sennen aus die selfst: Ekj sie de HAR.

¹⁹Miene Ordnungen sell jie hoolen: Von dien Vee saust du nich twee veschiedne Sorten sikj poaren loten. Sei nich opp een Flekj twee veschiedne Sorten Sot. Trakj die uk nich een Kjleet aun, waut von twee veschiedne Sorten Twierem jewäft es.

²⁰Wan een Maun bie eene Sklowenmejal schlapt, waut eenen aundren Maun aus Ehefru toojesajcht es, oba noch nich loosjekoft ooda friejeloten es, dan saul daut bestroft woaren. Oba dee sellen nich met däm Doot bestroft, wiels de Fru noch nich frie wia.

²¹De Maun saul een Schopsbock fa sikj aus Schultopfa no däm HARN brinjen ver dän Engank von daut Vesaumlungszelt;

²²un de Priesta saul am veseenen met een Schultopfa von een Schopsbock ver däm HARN wäajen siene Sind, un dan woat Gott am siene Sind, waut hee jedonen haft, vejäwen.

²³Wan jie en daut Launt komen un aule Sorten Oftbeem plaunten, wua jie von äten kjennen, dan lot de ieeschte Frucht toch, aus wan dee orrein un onbeschnäden es. Dree Joa sell jie de Frucht fa orrein hoolen, un dee nich äten.

²⁴Em vieeden Joa sell jie aula june Frucht met freiden däm HARN weien.

²⁵Un vom feften Joa aun derw jie de Frucht äten. Wan jie daut soo doonen woaren, woaren june Beem doafäa dolla droagen. Ekj sie de HAR, jun Gott!

²⁶Jie sellen kjeen Fleesch äten, wua noch Bloot bennen es. Jie sellen nich Woasajarie ooda Zaubarie driewen.

²⁷Jie sellen june Kopphoa aun de Sieden nich veschnieden un junen Boat nich kortschnieden.

²⁸Jie sellen junt wäajen eenen Dooden kjeene Ranen em Kjarpa schnieden un uk kjeene Tieekjens en june Hut nenmoaken. Ekj sie de HAR!

²⁹Du saust diene Dochta nich to Huararie aunleiden, om daut sikj de Huararie nich em gaunzen Launt vebreet, un jun Launt voll Schaunden woat.

³⁰Mienen Sabat sell jie hoolen, un mien Heilichtum sell jie ferchten. Ekj sie de HAR!

³¹Got nich no de Woasajasch un no dee, dee de Doodje äare Jeista befroagen. Wäa daut deit, moakt sikj orrein. Ekj sie de HAR, jun Gott!

³²Ver greiwe Hoa saust du oppstonen un eene elre Persoon saust du ieren, un saust die ferchten ver dienen Gott. Ekj sie de HAR!

³³Wan een framda bie junt em Launt wont, sell jie däm nich unjadrekjen.

³⁴Dee saul bie junt soo wonen aus eena von junt, un du saust däm goot sennen soo aus die selfst, wiels jie sent en Ägipten uk framde jewast. Ekj sie de HAR, jun Gott!

³⁵Jie sellen nich ojjerajcht haundlen, met däm Motstock, met daut Jewicht un de Motdinja, wan jie waut aufmäten.

³⁶June Wichtschol, un de Jewichta sellen stemmen, un jie sellen rajchte Motstakja un Motschoopen haben. Ekj sie de HAR, jun Gott, dee junt ut Ägipten jefieet haft!

³⁷Recht junt bie aules no miene Jebooten un Aunwiesungen un läft doano. Ekj sie de HAR!