Read Plautdietsch (Low German) – De Bibel 3. Mose 2 Bible Online

3. Mose 2 - Plautdietsch (Low German) – De Bibel bible

3. Mose 2

¹Wan wäa däm HARN een Ätesopfa brinjen well, dan saul hee wittet Mäl nämen, un doa Olieweneelj nopp jeeten un Weiruak doanopp lajen,

²un daut no de Priesta, Aaron siene Säns, brinjen. Un de Priesta saul eene Hauntvoll von daut Mäl un Eelj met dän gaunzen Weiruak toop nämen un disen Deel von de Gow opp däm Aultoa vebrennen aus een Jedenkjopfa, daut de gaunze Opfagow däm HARN jehieet. Soo es daut een Brauntopfa to een scheenet Jeroch fa dän HARN.

³Daut äwaje von daut Ätesopfa saul Aaron un siene Säns jehieren. Daut sent heilje Gowen, wiels däm HARN daut es aus Fiaopfa jebrocht worden.

⁴West du waut Jebaktet ut däm Owen aus Ätesopfa brinjen, dan saul daut von wittet Mäl sennen, un onen Suadieech; entwäda Eeljkuaken onen Suadieech, ooda plautet onjesuadet Broot, met Eelj bestrikjt.

⁵Es dien Ätesopfa waut oppe Paun Jebaktet, dan saul daut von wittet Mäl reedjemoakt sennen, waut met Eelj enjerieet woat, un uk onen Suadieech sennen.

⁶Du saust daut en Stekja bräakjen un doa Eelj äwajeeten. Soo jehieet sikj daut fa een Ätesopfa.

⁷Es dien Ätesopfa soont waut en eenen Gropen jereet woat, dan saust du daut von wittet Mäl met Eelj moaken

⁸un saust daut Ätesopfa, waut du doavon reedjemoakt hast, däm HARN brinjen. Du saust daut däm Priesta äwarieekjen, un hee saul daut nom Aultoa droagen.

⁹Un de Priesta saul von daut Ätesopfa daut Poat, waut aus Jedenkjopfa vebrent woat, nämen un daut opp dän Aultoa en Ruak oppgonen loten aus een Fiaopfa, to een scheenet Jeroch fa dän HARN.

¹⁰Daut äwaje saul Aaron un siene Säns jehieren, aus heilje Gowen, wiels daut fa däm HARN es aus Fiaopfa jebrocht worden.

¹¹Aule Ätesopfa, waut jie däm HARN opfren wellen, sell jie onen Suadieech moaken; nich Suadieech uk nich Honnich sell jie däm HARN aus Fiaopfa en Ruak oppgonen loten.

¹²Wan jie de ieeschte Gowen von june Arnt nom HARN brinjen, derwen uk Suadieech un Honnich jebrocht woaren; oba aus Opfa, waut opp däm Aultoa vebrent woat, derwen dee nich komen.

¹³Aule Opfagowen von dien Ätesopfa saust du solten, un saust dienen Gott sien Bundessolt opp dien Ätesopfa nich fälen loten; bie aul diene Opfagowen saust du Solt doabie haben.

¹⁴West du däm HARN een Ätesopfa brinjen von daut ieeschte waut du jearnt hast, dan saust du fresche Jeträajd Kjieena nämen un dee biem Fia reeschen un staumpen un dee aus Ätesopfa von daut ieeschte von diene Arnt brinjen.

¹⁵Un du saust Eelj doanopp jeeten un Weiruak doanopp lajen. Soo jehieet sikj daut fa een Ätesopfa.

¹⁶Un de Priesta saul fa daut Jedenkjopfa, waut von de jestaumpte Kjieena un von de Eelj, toop met dän gaunzen Weiruak, en Ruak oppgonen loten. Daut es een Fiaopfa fa dän HARN.