Read Plautdietsch (Low German) – De Bibel 3. Mose 21 Bible Online

3. Mose 21 - Plautdietsch (Low German) – De Bibel bible

3. Mose 21

¹De Priesta, Aaron siene Säns, leet de HAR derch Moses sajen: Een Priesta saul sikj aun kjeenen Dooden ut sien Volkj orrein moaken

²buta aun siene notste Aunjehieeje: Aun siene Mutta, aun sienen Voda, aun sienen Sän, aun siene Dochta, aun sienen Brooda

³un aun siene Sesta, waut noch onbefriet es un en daut selwje Hus läft wua hee. Aun dee äare Leichen doaf hee sikj orrein moaken.

⁴Sest saul hee sikj aun kjeent von sien aunjefriedet Frintschoft orrein moaken, daut hee sikj nich veonieren deit.

⁵Een Priesta doaf sikj bie eenen truajen Faul uk nich dän Kopp kol schäaren, dän Boat kortschnieden ooda Ranen en sienen Kjarpa schnieden.

⁶De Priesta sellen een Läwen fieren, waut mie, äaren Gott, jeweit es, un sellen mienen Nomen nich veonieren. See brinjen de Fiaopfa, waut opp mienen Aultoa vebrent woaren, daut Äten fa äaren Gott; doawäajen sellen see heilich sennen.

⁷See sellen kjeene Hua to Fru nämen, uk kjeene Mejal, dee nich friejebläwen es, uk kjeene Fru, waut von äaren Maun jeschieden es, wiels see sent äaren Gott heilich.

⁸Doawäajen saust du dän Priesta fa heilich hoolen, wiels hee brinjt junen Gott daut Opfabroot. Hee saul die heilich sennen, wiels ekj sie heilich, de HAR, dee junt heilicht.

⁹Wan eenen Priesta siene Dochta sikj derch Huararie veorreinicht, deit see äaren Voda veonieren; un see saul met Fia vebrent woaren.

¹⁰De väaschta mank de Priesta, opp däm sien Kopp de Saulweelj jegoten wort un dee jeweit es, om de heilje Kjleeda auntotrakjen, dee saul bie eenen truajen Faul nich siene Hoa vezultat henjen loten un siene Kjleeda verieten.

¹¹Hee saul no kjeenen Dooden komen, wiels hee sikj doaderch veorreinicht, uk nich, wan daut sien Voda ooda siene Mutta es.

¹²Hee saul nich ut daut Heilichtum rutgonen, daut hee Gott sien Heilichtum nich veonieren deit, wiels hee es met sienen Gott siene heilje Saulweelj jesaulft. Ekj sie de HAR.

¹³Hee doaf sikj bloos eene Mejal frieen, waut noch met kjeenen Maun toop jeschlopen haft,

¹⁴kjeene Wätfru ooda Jeschiedne ooda eene dee sikj derch Huararie haft orrein jemoakt. Hee mott sikj eene Mejal ut sien ieejnet Volkj to Fru nämen,

¹⁵soo daut hee siene Nokomen mank sien Volkj nich veonieren deit, wiels ekj sie de HAR, dee am jeheilicht haft.

¹⁶De HAR räd met Moses un säd:

¹⁷Saj to Aaron: Wan eena von diene Nokomen en Tookunft eenen Fäla haft, doaf hee nich nom Aultoa komen, om daut Äten fa sienen Gott to opfren.

¹⁸Kjeena doaf eenen Opfadeenst doonen, waut eenen kjarpalichen Fäla haft: Een blinja ooda loma ooda eena met eene jespoolde Näs ooda waut irjentwua kjräplich es.

¹⁹Uk kjeena, däm een Oarm ooda een Been vekjräpelt es,

²⁰ooda eenen Buckel haft, ooda dee em waussen sea hinjenjebläwen es, un kjeena dee eene Uagen ooda Hutkrankheit haft, un uk kjeena waut beschädichte Hooden haft.

²¹Wäa mank däm Priesta Aaron siene Nokomen eenen kjarpalichen Fäla haft, doaf niemols komen, däm HARN siene Fiaopfa to opfren, wiels hee eenen Fäla haft. Hee saul nich komen, om sienen Gott sien Äten to opfren.

²²Hee doaf von de Opfa äten, waut sienen Gott jebrocht woaren, von de heilje uk von de besonda heilje Opfagowen.

²³Oba wiels hee eenen kjarpalichen Fäla haft, doaf hee nich no de Gardien gonen ooda sikj däm Aultoa nodren. Hee saul dise Städen dee mie jeheilicht sent nich veonieren, wiels ekj sie de HAR, dee an heilich moakt.

²⁴Un Moses säd dit to Aaron un siene Säns un to aule Israeliten.