Read Plautdietsch (Low German) – De Bibel 3. Mose 22 Bible Online

3. Mose 22 - Plautdietsch (Low German) – De Bibel bible

3. Mose 22

¹De Har räd met Moses un säd:

²Saj Aaron un siene Säns: Got väasechtich met de heilje Gowen om, waut de Israeliten mie brinjen, om daut see mienen heiljen Nomen nich veonieren. Ekj sie de HAR.

³Saj an uk: Wäa von june Nokomen sikj de heilje Gowen nodat, waut de Israeliten däm HARN weien, un haft eene Onreinheit aun sikj, dee woat ver miene Uagen utjerot woaren. Ekj sie de HAR.

⁴Wäa von Aaron siene Nokomen Lepra haft ooda irjent waut haft, waut doa kjietat, dee saul nich von daut heilje äten, bat hee wada rein es.Wäa eenem aunschieet, waut aun eenen Dooden orrein jeworden es, ooda em Schlop de Somen aufjegonen es,

⁵ooda wäa irjent eent von de Tieren ooda Ojjezeffa aunjefot haft, wuavon hee orrein woat, ooda eenen Mensch, derch däm hee orrein woat, eendoont von waut dee orrein es,

⁶wäa soont aunschieet, dee es bat aum Owent orrein un doaf soolang nich von de heilje Opfagowen äten, un saul ieescht sienen Kjarpa met Wota aufwauschen.

⁷Un wan de Sonn ieescht unjajegonen es, dan es hee rein. Dan doaf hee doavon äten, wiels daut siene Noarunk es.

⁸Een Tia waut dootjegonen ooda veräten es saul hee nich äten, om daut hee nich orrein woat. Ekj sie de HAR!

⁹Doawäajen sellen see miene Ordnungen hoolen, daut see nich Sinden opp sikj loden un doawäajen stoawen, wan see daut veonieren. Ekj sie de HAR, dee an heilicht.

¹⁰Bloos wäa to eene Priesta Famielje jehieet, doaf von de heilje Opfagowen äten, sest kjeena, uk kjeen framda ooda Oabeida, waut bie am läft.

¹¹Wan de Priesta sikj fa Jelt eenen Sklow kjaft, dee doaf doavon äten. Un de Sklow, waut en däm Priesta sien Hus jebuaren es, doaf uk von siene Noarunk äten.

¹²Wan däm Priesta siene Dochta sikj met eenen Maun befriet, dee nich ut dän Priesta Staum es, dan saul see nich von de heilje Opfagowen äten.

¹³Wan see aus Wätfru ooda aus eene Jeschiedne, waut kjeene Kjinja haft, trigj no äa Voda sien Hus kjemt, dan doaf see von äaren Voda siene Noarunk äten soo aus verhäa. Oba kjeena saul doavon äten, dee nich to de Priesta Famielje jehieet.

¹⁴Wäa onweetent von daut heilje at, dee saul däm Priesta de Opfagow aufjäwen un noch een Feftel doabie lajen.

¹⁵De Priesta sellen daut heilje von de Israeliten, de Opfagowen fa dän HARN, nich veonieren loten,

¹⁶un de Israeliten doaderch met Schult beloden, daut dee äa Jeheilichtet to äten kjrieen, wiels ekj sie de HAR, dee an heilicht.

¹⁷De HAR räd met Moses un säd:

¹⁸Saj Aaron un siene Säns un aule Israeliten: Wäa ut daut Volkj Israel ooda von de framde en Israel een Opfa brinjen well, om sien Vespräakjen to erfellen ooda däm HARN friewellich waut toom Brauntopfa jäwen well.

¹⁹Dan mott daut, om daut de HAR jefaulen aun junt haft, een menlichet Tia onen Fäla sennen, von Rinda, Schop ooda Kosen.

²⁰Aules, waut eenen Fäla haft sell jie nich opfren, wiels daut woat junt nich aunjenäm moaken.

²¹Un wan wäa däm HARN een Dankopfa brinjen well, om sien Vespräakjen entohoolen ooda een frieweljet Opfa, von Rinda ooda Schop, dan saul daut onen Fäla sennen, wiels am daut mau aunjenäm moakt, wan daut Opfatia fälafrie es.

²²Wan daut blint ooda vekjräpelt es, ooda eene Wund ooda een Schwäa ooda Hutkrankheiten haft, dan sell jie däm HARN daut nich opfren un kjeen Brauntopfa doavon opp däm HARN sienen Aultoa brinjen.

²³Rinda ooda Schop, waut too lange ooda too korte Kjarpadeelen haben, dee kaust du friewellich opfren, oba fa een Vespräakjen sent dee nich aunjenäm.

²⁴Du saust däm HARN uk kjeen Tia toom Opfa brinjen, waut de Hooden vedrekjt ooda veschloagen ooda rutjeräten ooda utjechnäden sent. Jie sellen en jun Launt äwahaupt kjeen Tia endren.

²⁵Jie sellen soone Tieren uk nich von Utlenda kjeepen un aus Äten fa junen Gott opfren, wiels dee daugen nich un haben eenen Fäla. Doawäajen woat junt daut nich aunjenäm moaken.

²⁶Wieda leet de HAR derch Moses sajen:

²⁷Wan een Rint ooda Schop ooda eene Kos jebuaren es, dan saul daut Kaulf ooda Laum säwen Doag bie äare Mutta bliewen; oba aum achten Dach ooda no däm doaf däm HARN daut jeopfat woaren, daut es am aunjenäm.

²⁸Jie derwen uk nich daut Muttatia met äa junget tojlikj aun eenen Dach schlachten.

²⁹Wan jie däm HARN een Dankopfa brinjen wellen, waut junt aunjenäm moakt,

³⁰dan sell jie daut aun däm selwjen Dach oppäten un nuscht äwaloten bat morjen. Ekj sie de HAR!

³¹Doot opp miene Jebooten achtjäwen un doano läwen. Ekj sie de HAR!

³²Doot mienen heiljen Nomen nich veonieren, soo daut ekj heilich jehoolen woa mank de Israeliten. Ekj sie de HAR, dee junt heilicht.

³³Ekj hab junt ut Ägipten rutjefieet, om jun Gott to sennen. Ekj sie de HAR!