Read Plautdietsch (Low German) – De Bibel 3. Mose 23 Bible Online

3. Mose 23 - Plautdietsch (Low German) – De Bibel bible

3. Mose 23

¹De HAR räd met Moses un säd:

²Saj to de Israeliten: Dit sent däm HARN siene Fasta, waut jie aus heilje Vesaumlungen bekaunt moaken sellen, waut am jeweit sent:

³Sas Doag saust du oabeiden; oba de säwenda Dach es een gaunz fastlicha Sabat, eene heilje Vesaumlunk. Dan sell jie kjeene Oabeit doonen, wiels daut es een Sabat fa dän HARN, äwaraul wua jie wonen.

⁴Dit sent dän HARN siene Fasta, waut jie aun äare Doag aus heilje Vesaumlungen bekauntmoaken sellen:

⁵Aum 14. Dach en de 1. Moonat jäajen Owent es däm HARN sien Passafast.

⁶Un aum 15. Dach en de selwje Moonat es däm HARN to Ieren daut Fast met daut onjesuade Broot. Dan sell jie säwen Doag soon Broot onen Suadieech äten.

⁷Aum ieeschten Dach sell jie eene heilje Vesaumlunk aufhoolen; un sellen dan kjeene auldoagsche Oabeit doonen.

⁸Un jie sellen däm HARN säwen Doag Fiaopfa brinjen. Aum säwenden Dach saul wada eene heilje Vesaumlunk sennen, wua jie uk kjeene auldoagsche Oabeit doonen sellen.

⁹De HAR räd met Moses un säd:

¹⁰Räd met de Israeliten un saj to an: Wan jie en daut Launt komen, waut ekj junt jäwen woa, un daut aufarnten, dan sell jie de ieeschte Goaw von june Arnt nom Priesta brinjen.

¹¹Un dee saul de Goaw aus een Opfa, waut oppjehowen woat, ver däm HARN opphäwen, daut dee junt aunjenäm moakt. Daut saul de Priesta aun däm Dach nom Sabat doonen.

¹²Un jie sellen aun däm Dach, wan june Goaw oppjehowen woat, däm HARN een Brauntopfa brinjen von een eenjoaschet Schop, waut onen Fäla es,

¹³un aus Ätesopfa doatoo: twee tieendel Efa wittet Mäl, met Eelj jemischt, aus een Fiaopfa fa dän HARN to een scheenet Jeroch; un doatoo noch aus Drinkjopfa: eene vieedel Kaun Wien.

¹⁴Un jie sellen von de fresche Arnt kjeen Broot ooda jereeschte ooda reiwe Kjieena äten, bat däm Dach, wan jie junen Gott siene Goaw brinjen. Dise Ordnunk jelt fa june Nokomen opp emma, äwaraul, wua jie wonen.

¹⁵Von däm Dach nom Sabat, aun däm jie däm HARN de ieeschte Goaw aus een Opfa, waut oppjehowen woat, jebrocht haben, sell jie säwen volle Wäakjen talen.

¹⁶Bat däm Dach no däm säwenden Sabat, aulsoo 50 Doag, sell jie talen un dan däm HARN een Ätesopfa von de fresche Arnt brinjen.

¹⁷Jieda Famielje saul twee Bulkjes Broot nom Heilichtum brinjen, waut beid von twee tieendel Efa wittet Mäl met Suadieech jebakt sent. Dee sellen aus Ieeschtlinjsgow von de Weitarnt däm HARN jehieren.

¹⁸Un buta daut Broot sell jie noch säwen eenjoasche fälaloose Schop un eenen jungen Boll un twee Schopsbakj metbrinjen un däm HARN daut aus Brauntopfa brinjen. Un jie sellen de väajeschräwne Ätesopfa un Drinkjopfa met de Brauntopfa brinjen; een Fiaopfa to een scheenet Jeroch fa dän HARN.

¹⁹Un opfat uk noch eenen Kosenbock aus Sindopfa un twee eenjoasche Schop aus Dankopfa.

²⁰Un de Priesta saul daut aus een Opfa, waut oppjehowen woat, met daut ieeschte Broot toop ver däm HARN opphäwen. Dit es eene heilje Gow fa dän HARN un saul de Priesta jehieren.

²¹Disen Dach sell jie aus eenen heiljen Dach bekauntmoaken, wua jie kjeene auldoagsche Oabeit doonen. Dise Ordnunk jelt june Nokomen fa emma, äwaraul, wua jie wonen.

²²Wan jie jun Launt aufarnten, sell jie nich aules bat en de Akjen von de Flekja aufarnten, uk nich noläsen gonen. Lot waut äwa fa de oame un de framde, waut en jun Launt wonen. Ekj sie de HAR, jun Gott!

²³De HAR räd met Moses un säd:

²⁴Saj to de Israeliten: Aum 1. Dach en de 7. Moonat sell jie eenen besondren Heljedach hoolen, un aus heilje Vesaumlunk, toom Aunjedenkj met de Posaunen blosen.

²⁵Dan sell jie kjeene auldoagsche Oabeit doonen un däm HARN Fiaopfa brinjen.

²⁶Un de HAR leet an wieda derch Moses sajen:

²⁷Aum 10. Dach en de 7. Moonat es de Veseenungsdach. Dan sell jie eene heilje Vesaumlunk aufhoolen met fausten, un däm HARN Fiaopfa brinjen.

²⁸Jie derwen aun däm Dach kjeene Oabeit doonen, wiels daut es de Veseenungsdach, wua jie ver däm HARN junen Gott veseent woaren.

²⁹Wäa aun däm Dach nich fausten un sikj deemootjen deit, dee woat ut sien Volkj utjerot woaren.

³⁰Un wäa aun däm Dach irjent eene Oabeit deit, däm woa ekj ut sien Volkj venichten.

³¹Doawäajen sell jie kjeene Oabeit doonen. Dise Ordnunk jelt bie june Nokomen fa emma, äwaraul, wua jie wonen.

³²De Veseenungsdach es fa junt een fastlicha Heljedach, aun däm jie fausten sellen. Vom Owent, aum näajenden Dach en dee Moonat, bat aum Owent aum tieenden Dach sell jie disen Heljedach hoolen.

³³Un de HAR säd wieda to Moses:

³⁴Saj to de Israeliten: Aum 15. Dach en dise 7. Moonat es daut Loofboodenfast. Daut woat däm HARN to Ieren säwen Doag lank jefieet.

³⁵Aum ieeschten Dach saul eene heilje Vesaumlunk sennen; dan sell jie kjeene auldoagsche Oabeit doonen.

³⁶Säwen Doag sell jie däm HARN Fiaopfa brinjen. Aum achten Dach sell jie wada eene heilje Vesaumlunk aufhoolen un däm HARN Fiaopfa brinjen. Aun disen Dach kom jie to eene groote Fastvesaumlunk toop wua jie kjeene auldoagsche Oabeit doonen sellen.

³⁷Dit sent däm HARN siene Fasta, waut jie aus heilje Vesaumlungen bekauntmoaken sellen, om dän HARN Fiaopfa to brinjen: Brauntopfa, Ätesopfa, Schlachtopfa un Drinkjopfa, jieda Opfa aun sienen Dach,

³⁸buta däm HARN siene Sabaten, un june aundre Opfagowen un Vespräakjungen un friewelje Gowen, waut jie däm HARN brinjen wellen.

³⁹Aum 15. Dach en de 7. Moonat, wan jie de Arnt vom Launt enbrinjen, sell jie däm HARN een Fast fieren von säwen Doag. Aum ieeschten Dach es een besondra Heljedach un aum achten Dach es uk een besondra Heljedach.

⁴⁰Aum ieeschten Dach sell jie de baste Frucht von june Beem nämen, Paulmbläda un Beemasta met väl Bläda un Wieden von daut Wotastruck un säwen Doag, däm HARN, junen Gott, een Freidenfast fieren.

⁴¹Jieda Joa sell jie en de säwende Moonat dit Fast fieren; dise Ordnunk jelt fa june Nokomen, opp emma.

⁴²Säwen Doag sell jie en Loofbooden wonen. Aul dee waut en Israel tusjehieren, sellen en Loofbooden wonen,

⁴³daut june Nokomen weeten, woo ekj de Israeliten emol hab en Booden wonen loten, aus ekj an ut Ägipten no dit Launt brocht. Ekj sie de HAR, jun Gott!

⁴⁴Un Moses jeef dise Aunwiesungen fa däm HARN siene Fasta aun daut Volkj wieda.