Read Plautdietsch (Low German) – De Bibel 3. Mose 24 Bible Online

3. Mose 24 - Plautdietsch (Low German) – De Bibel bible

3. Mose 24

¹De HAR räd met Moses un säd:

²Saj de Israeliten, daut see die reine Olieweneelj von utjedrekjte Oliewen brinjen fa dän Laumpenhoola, daut em Heilichtum jieda Nacht Lichta brennen.

³Aaron saul dee jieda Owent ver de Gardien, waut ver de Kjist met daut Bundesjesaz henjt, besorjen un doano kjikjen, daut dee bestendich ver däm HARN dachen. Dit es eene Ordnunk fa emma fa june Nokomen.

⁴Aaron saul de Laumpen besorjen opp däm Laumpenhoola von feinet Golt, daut dee bestendich ver däm HARN dachen.

⁵Un du saust twalf Brootkuaken baken, jieda Brootkuak saul von twee tieendel Efa wittet Mäl sennen,

⁶un du saust dee en twee Rieejen, sas en eene Rieej, opp dän Desch von feinet Golt, ver de Gardien ver däm HARN hanlajen.

⁷Un saust opp jieda Rieej reinen Weiruak nopplajen, aus een Jedenkjopfa, daut daut Broot däm HARN jehieet, een Fiaopfa fa dän HARN.

⁸Aun jieda Sabat saul hee dee ver däm HARN reedmoaken aus eene bestendje Gow von de Israeliten; daut es eene Ordnunk fa emma.

⁹Un dee sellen Aaron un siene Nokomen jehieren. Dee sellen dee opp eene heilje Städ äten; aus eene heilje Gow, von däm HARN siene Fiaopfa, jehieren Aaron dee aus sien Poat fa emma.

¹⁰Een Sän von eene israelitische Fru, waut eenen ägiptischen Voda haud, jinkj medden mank de Israeliten un zankt sikj doa em Loaga met eenen israelitischen Maun

¹¹un lastad däm HARN sienen Nomen un hilt dän jemeen. Dan brochten see däm no Moses. Siene Mutta wia Schelomit, Dibri siene Dochta, ut däm Staum Dan.

¹²Un see stopten däm en, bat de HAR an kloare Auntwuat jäwen wudd, waut met däm passieren sull.

¹³Un de HAR räd met Moses un säd:

¹⁴Brinj dän Maun, waut soo lastat, ut däm Loaga rut un lot aul dee, dee daut jehieet haben, äare Henj opp sienen Kopp lajen; un dan lot de gaunze Vesaumlunk däm steenjen

¹⁵un saj to de Israeliten: Wäa sienen Gott lastat, dee saul siene Schult droagen.

¹⁶Wäa däm HARN sienen Nomen lastat, dee saul stoawen; de gaunze Vesaumlunk saul däm steenjen. Daut jelt fa de framde uk fa de Israeliten, wäa Gott sienen Nomen lastat, mott stoawen.

¹⁷Wäa eenen Mensch dootschleit, mott met däm Doot bestroft woaren.

¹⁸Wäa een Stekj Vee dootschleit, dee saul daut ersaten, Läwen fa Läwen.

¹⁹Wäa sienen Metmensch eenen kjarpalichen Schoden aundeit, mott aus Strof dänselwjen Schoden aunjedonen woaren.

²⁰Wäa däm aundren eenen Knoaken brakjt, däm woat doafäa uk een Knoaken jebroaken; wäa däm een Uag ooda eene Tän utschleit, velist doafäa selfst uk een Uag ooda eene Tän. Doa jelt de Räajel: Uag fa Uag, Tän fa Tän. Soo aus eena däm aundren vewunden deit, soont saul däm selfst aunjedonen.

²¹Wäa een Stekj Vee dootschleit, dee saul daut ersaten; wäa eenen Mensch dootschleit, dee saul stoawen.

²²Dit Jesaz jelt fa aulem onen Unjascheet, fa junt Israeliten uk fa de framde, waut bie junt wonen. Ekj sie de HAR, jun Gott!

²³Moses säd de Israeliten dit aula, un see brochten dän Maun, waut Gott jelastat haud, ut daut Loaga un steenijden däm. De Israeliten deeden daut soo, aus de HAR Moses daut väajesajcht haud.