Read Plautdietsch (Low German) – De Bibel 3. Mose 26 Bible Online

3. Mose 26 - Plautdietsch (Low German) – De Bibel bible

3. Mose 26

¹Jie sellen junt uk kjeene Jetta moaken un soone Jetta Bilda en jun Launt oppstalen un dee aunbäden, eendoont, auf daut utjeoabeide ooda jegotne Figuaren, ooda en Steen nenjehakte ooda nenjekrauzte Bilda sent; ekj sie de HAR, jun Gott.

²Hoolt miene Sabatdoag en ieren un doot mien Heilichtum nich veonieren. Ekj sie de HAR!

³Wan jie junt no miene Aunwiesungen rechten un miene Jebooten befoljen woaren,

⁴woa ekj junt to de rajchte Tiet Räajen jäwen, un daut Launt saul eene goode Ennom brinjen un de Beem sellen Frucht droagen.

⁵Un de Draschtiet saul bat de Wienarnt rieekjen, un de Wienarnt saul bat de näakjste Akatiet rieekjen. Jie sellen jenuach to äten haben un en jun Launt en Sechaheit wonen.

⁶Ekj woa doano kjikjen, daut en jun Launt Fräd es. Wan jie schlopen gonen, bruck jie junt nich ferchten, daut junt wäa stieren woat. Ekj woa de wille Tieren ut jun Launt wajchschaufen, un kjeene framde Armee woat jun Launt äwafaulen.

⁷Jie sellen june Fiend vedriewen, un dee sellen ver junt derch daut Schwieet faulen.

⁸Fief von junt sellen 100 vedriewen, un 100 von junt sellen 10.000 vedriewen; june Fiend sellen ver junt bie Häaden faulen.

⁹Un ekj woa opp june Sied sennen un doano kjikjen, daut jie väl Kjinja haben un emma mea woaren. Ekj woa to mienen Bunt stonen un aules erfellen, waut ekj junt vesproaken hab.

¹⁰Jie woaren noch von de väaje Arnt to äten haben, wan de fresche Arnt aul doa es, un daut tojoasche wajchschmieten motten.

¹¹Ekj woa medden mank junt wonen un well junt nich wajchschmieten.

¹²Un ekj woa mank junt bliewen un well jun Gott sennen, un jie sellen mien Volkj sennen.

¹³Ekj sie de HAR, jun Gott, dee junt ut Ägipten rutjebrocht haft, wua jie Sklowen wieren. Ekj hab jun Sklowenjoch vebroaken un leet junt oppjerecht gonen.

¹⁴Wan jie mie nich jehorchen un miene Jebooten nich hoolen

¹⁵un miene Aunwiesungen veachten un miene Ordnungen auntsied heiwen woaren, soo daut jie nich aul miene Jebooten doonen un mienen Bunt bräakjen,

¹⁶dan woa ekj junt dit doonen: Ekj woa eenen sea grooten Schrakj äwa junt komen loten, jie woaren Feeba kjrieen un utdrieejen, soo daut june Uagen blint woaren un jun Läwen langsom to Enj jeit. Vejäfs woa jie june Flekja beseien, wiels june Fiend woaren daut oppäten.

¹⁷Un ekj woa mie selfst jäajen junt stalen, un jie woaren von june Fiend besiecht woaren; un dee waut junt nich lieden kjennen, sellen äwa junt rejieren, un jie woaren oppe Flucht sennen, onen daut junt wäa hinjaraun es.

¹⁸Wan jie mie uk dan noch nich jehorchen woaren, dan well ekj junt wieda noch säwen mol soo hoat bestrofen, wäajen june Sinden.

¹⁹Om junen Stolt un junen Ieejensenn to bräakjen woa ekj daut nich mea räajnen loten; de Himmel bowa junt woat aus Iesa sennen un de Ieed unja june Feet soo hoat aus Steen.

²⁰Un june Mieej un Oabeit saul vejäfs sennen; opp june Flekja woat nuscht mea waussen un de Beem oppem Launt woaren kjeene Frucht droagen.

²¹Wan jie mie dan emma noch nich jehorchen wellen un wieda jäajenaun sent, woa ekj de Strof, fa june Sinden, noch säwen mol hoada moaken.

²²Dan woa ekj wille Rauptieren mank junt schekjen, waut june Kjinja fräten un jun Vee verieten un väle von junt ombrinjen woaren, soo daut june Gaussen woaren ladich sennen.

²³Wan jie mie dan emma noch nich jehorchen wellen un junt wieda jäajen mie stalen,

²⁴dan well ekj mie uk jäajen junt stalen un junt noch säwen mol hoada bestrofen.

²⁵Un ekj woa daut Schwieet äwa junt brinjen, waut de Strof, fa mienen Bunt bräakjen, derchfieren woat. Un wan jie junt en june Städa vekrupen woaren, woa ekj eene jefäadelje Krankheit mank junt schekjen, un jie woaren en june Fiend äare Henj jejäft woaren.

²⁶Wan ekj junt dän Väarot aun Broot wajchnäm, woaren tieen Frues en eenen Owen äa Broot baken, un jun Broot woat met de Wichtschol toojedeelt woaren. Un wan jie äten, woa jie lang nich saut woaren.

²⁷Woa jie mie dan uk noch nich jehorchen un junt wieda jäajen mie stalen,

²⁸dan woa ekj mie em Oaja jäajen junt stalen, un woa june Sinden noch säwen mol hoada bestrofen,

²⁹daut jie fa Hunga daut Fleesch von june ieejne Kjinja äten woaren.

³⁰Ekj woa june huage Opfastäden venichten un june Ruakopfa Aultoaren utroden un june Doodes opp de vekjielde Jettabilda schmieten. Un ekj woa mie veäakjelt von junt wajchdreien.

³¹Un ekj woa june Städa to Prellklompes moaken un june Opfastäden vestieren un woa daut goode Jeroch von june Opfa nich mea rikjen.

³²Ekj woa jun Launt soo enne Grunt brinjen, daut june Fiend, waut doabennen wonen, daut gruslen woat.

³³Junt woa ekj mank de Velkja vestreien, un ekj woa junt met een schoapet Schwieet hinjaraun sennen. June Goades woaren to eene Wiltnis un june Städa to Prellklompes woaren.

³⁴Dan woat daut Launt de Sabat Joaren noholen, waut jie daut nich jegonnen haben. En dee Tiet, waut daut fa wilt licht, un jie wiet auf bie june Fiend läwen motten, woat daut Launt sikj reiwen un de vesiemde Sabat Joaren noholen kjennen.

³⁵Soolang aus daut fa wilt licht, woat sikj daut reiwen, wiels sikj daut nich reiwen kunn, aus jie daut reiwen loten sullen, wäarent jie doa wonden.

³⁶Un dee, dee von junt äwabliewen, well ekj en daut Launt von äare Fiend soone Forcht em Hoat jäwen, daut see aul ranen woaren wan see een Blaut ruschlen hieren. An woat daut soo sennen aus wan an daut Schwieet hinjaraun es, soo daut see sikj vestaupen un hanfaulen woaren, wan an uk kjeena vefolcht.

³⁷See woaren eena däm aundren unjaranen, aus wan an daut Schwieet hinjaraun es, wua an äwahaupt kjeena vefolcht. Jie woaren ver kjeenen Fient mea bestonen kjennen

³⁸un togrunt gonen mank de framde Velkja, un daut Launt von june Fiend woat junt oppfräten.

³⁹Dee waut von junt äwabliewen, woaren en de Lenda von äare Fiend aun de Foljen von äare un äare Vodasch äare Schult togrunt gonen.

⁴⁰Oba dan woaren see äare Schult un de Schult von äare Vodasch bekjanen, un woaren Leet droagen doawäajen, daut see mie ontru jewast sent un sikj jäajen mie jestalt haben.

⁴¹Doawäajen hab ekj mie uk an jäajenaun jestalt un an en daut Launt von äare Fiend jedräwen. Doa woat äa stoltet Hoat sikj deemootjen, un see woaren de Strof fa äare schlajchte Doten doa droagen motten.

⁴²Un ekj woa aun mienen Bunt met Jakob denkjen un aun mienen Bunt met Isaak un met Abraham un woa aun daut Launt denkjen, waut ekj an fa äare Nokomen vesproaken haud.

⁴³Oba daut Launt woat von an veloten sennen un siene Sabat Joaren noholen, soolang aus daut fa wilt licht, un see woaren de Strof fa äare schlajchte Doten droagen, wiels see miene Ordnungen veachten un sikj om miene Aunwiesungen nich kjemmaden.

⁴⁴Oba wan see uk en äare Fiend äa Launt sent, schmiet ekj dee doawäajen noch nich wajch, un see sent mie uk goanich een Äakjel, soo daut et met an to Enj gonen mott un mien Bunt nich mea talt. Ekj sie de HAR, äa Gott.

⁴⁵Un ekj woa an togood aun mienen Bunt met äare Vodasch denkjen, dee ekj ver de Velkja äare Uagen ut Ägipten rutfieed, om äa Gott to sennen. Dis Bunt blift bestonen; ekj sie de HAR!

⁴⁶Dit sent de Jesazen, Aunwiesungen un Ordnungen, waut de HAR tweschen sikj un de Israeliten opp dän Boajch Sinai derch Moses oppjestalt haft.