Read Plautdietsch (Low German) – De Bibel 3. Mose 27 Bible Online

3. Mose 27 - Plautdietsch (Low German) – De Bibel bible

3. Mose 27

¹De HAR räd met Moses un säd:

²Räd met de Israeliten un saj to an: Wan wäa däm HARN een Vespräakjen jemoakt haft, waut oppjeleest woaren saul, un sikj daut om eenen Mensch haundelt,

³dan saul de Pries fa eenen Maun von 20 bat 60 Joa 50 Selwastekja no daut Jewicht biem Heilichtum sennen,

⁴un wan daut eene Fru es, dan 30 Selwastekja.

⁵Von fief bat 20 Joa saust du, wan daut een Jung es, dän Pries opp 20 Selwastekja faustlajen, un bie eene Mejal opp tieen Selwastekja.

⁶Von eene Moonat bat fief Joa saust du, wan daut een Jung es, dän Pries opp fief Selwastekja faustlajen, un bie eene Mejal opp dree Selwastekja.

⁷Wan daut wäa von 60 Joa un doaräwa es, saust du fa eenen Maun 15 Selwastekja räakjnen, un fa eene Fru tieen Selwastekja.

⁸Wan hee too oam es, om disen Pries to tolen, dan saul hee de Persoon, waut hee däm HARN vesproaken haft, ver däm Priesta stalen, un de Priesta saul däm schazen; hee saul däm doano schazen, waut dee oppbrinjen kaun, dee daut Vespräakjen jemoakt haft.

⁹Wan daut een Tia es, waut eena däm HARN aus Opfa brinjen kaun, dan saul aules waut eena däm HARN jeft, am jeweit sennen.

¹⁰Daut doaf nich met een schlajchtret ooda bätret Tia omjetuscht woaren. Wan daut wäa met een aundret Tia omtuschen deit, dan sellen de Tieren beid däm HARN jehieren.

¹¹Wan wäa däm HARN een orreinet Tia vesprakjt, waut nich aus Opfa jebrocht woaren doaf, dan mott hee daut nom Priesta brinjen.

¹²Un de Priesta saul daut schazen un dän Pries faustlajen; un doabie saul de Pries bliewen.

¹³Well daut wäa trigjkjeepen, dee saul noch een Feftel mea tolen aus de jeschazta Pries es.

¹⁴Wan wäa däm HARN sien Hus vesprakjt, un am daut weien deit, dan saul de Priesta dän Wieet aufschazen; un soo aus de Priesta daut schazt, soo saul daut bliewen.

¹⁵Wan dee, dee daut vesproaken haft, daut trigjkjeepen well, dan saul hee een Feftel von däm jeschazten Pries, noch opp dän Pries tootolen, un dan jehieet am daut wada.

¹⁶Wan wäa een Stekj Akalaunt von sien Oafgoot däm HARN vesprakjt, dan saul de Pries doano, aus daut Launtstekj groot es, jeschazt woaren. Wan daut een Flekj es wua eena eenen Sakvoll Joascht utseien kaun, dan saul daut Launt 50 Selwastekja jellen.

¹⁷Wan daut Launtstekj fuaz vom Entlotungsjoa aun däm HARN vesproaken es, dan talt de volle Schazungswieet, un doabie saul daut bliewen.

¹⁸Haft hee daut lota no daut Entlotungsjoa vesproaken, dan saul de Priesta daut Jelt no de äwaje Joaren bat daut näakjste Entlotungsjoa beräakjnen un dän Pries doano läaja schazen.

¹⁹Well hee daut Launt trigjkjeepen, waut hee vesproaken haft, dan saul hee noch een Feftel von däm jeschazten Pries mea tolen, un dan jehieet am daut wada.

²⁰Wan hee daut Launtstekj nich trigjkjaft un vekjaft daut aun eenen aundren, dan velist hee daut Trigjkjeepsrajcht fa emma.

²¹Wan daut Akaflekj dan em Entlotungsjoa frie woat, saul daut däm HARN jeweit sennen, soo daut daut niemols mea loostokjeepen jeit, un saul de Priesta jehieren.

²²Wan wäa däm HARN een Flekj Akalaunt vesprakjt, waut hee jekoft haft un goanich to sien Oafgoot jehieet,

²³dan saul de Priesta daut beräakjnen, waut daut noch fa eenen Wieet haft bat daut näakjste Entlotungsjoa, un hee saul däm HARN de Somm aun däm selwjen Dach aum Heilichtum tolen.

²⁴Oba em Entlotungsjoa saul daut Launtstekj wada aun däm trigjfaulen, von wäm hee daut jekoft haft, wäm daut aus Oafgoot jehieet.

²⁵Aule Schazungen sellen no daut Jewicht vom Heilichtum jemoakt woaren; 20 Graum saul een Lot haben.

²⁶Daut ieeschtjebuarne bie Rinda, Schop ooda Kosen kaun däm HARN nich derch een besondret Vespräakjen äwajäft woaren, wiels daut soo aus soo däm HARN jehieet.

²⁷Wan daut orreine Tieren sent, dan kjennen dee loosjekoft woaren, wan dee Ieejendeema bie däm jeschazten Pries noch een Feftel tootolt. Wan daut Tia nich loosjekoft woat, dan woat daut von de Priesta fa däm jeschazten Pries vekoft.

²⁸Wan eena däm HARN waut von sien Hab un Goot aun Menschen, Vee ooda Launt opp emma jeweit haft, kaun daut nich mea loosjekoft un uk nich aun aundre vekoft woaren. Daut steit dan unja däm Baun un es waut utnoms heiljet, waut fa emma däm HARN jehieet.

²⁹Uk Menschen, waut opp soonen Wajch däm HARN jeweit woaren, derwen nich loosjekoft woaren; dee motten dootjemoakt woaren.

³⁰Daut tieende Deel von jieda Arnt vom Jeträajd un de Frucht von de Beem jehieet däm HARN aus eene heilje Aufgow.

³¹Well wäa waut von dän Tieenden looskjeepen, dan mott hee opp dän Pries noch een Feftel toojäwen.

³²Un aul daut tieende von Rinda, Schop un Kosen, waut unja däm Hoad sienen Stock derchjeit, saul däm HARN jeweit sennen.

³³Doa saul nich no jefroacht, auf daut goode ooda schlajchte sent, un dee sellen uk nich omjetuscht woaren. Wan daut wäa omtuscht, sellen dee beid däm HARN jehieren un derwen nich trigjekoft woaren.

³⁴Dit sent de Jebooten, waut de HAR Moses opp dän Boajch Sinai jeef, om dee aun daut Volkj Israel wiedatojäwen.