Read Plautdietsch (Low German) – De Bibel 3. Mose 3 Bible Online

3. Mose 3 - Plautdietsch (Low German) – De Bibel bible

3. Mose 3

¹Es sien Opfa een Dankopfa un hee well een Rint opfren, dan kaun daut een menlichet ooda een weiblichet Tia sennen, hee saul fa däm HARN oba een Tia opfren, waut onen Fäla es.

²Hee saul siene Haunt opp dän Kopp von daut Opfatia lajen un daut ver däm Engank von daut Vesaumlungszelt schlachten. Un de Priesta, Aaron siene Säns, sellen daut Bloot runtom aun dän Aultoa spretzen.

³Un hee saul von daut Dankopfa däm HARN een Fiaopfa brinjen; daut Fat, waut daut Enjeweide bedakjt, un aul daut Fat waut aun daut Enjeweide es,

⁴de beid Nieren met daut Fat, waut doaraun es, un daut waut aun de Hinjaschinkjes es, un dän Fatlaupen äwa de Läwa, bie de Nieren loosjetrant.

⁵Un Aaron siene Säns sellen daut opp däm Aultoa en Ruak oppgonen loten toom Brauntopfa opp daut Holt, waut opp daut Fia licht, aus een Fiaopfa to een scheenet Jeroch fa dän HARN.

⁶Well hee däm HARN een Dankopfa von Schop ooda Kosen brinjen, kaun hee een menlichet ooda een weiblichet Tia nämen; daut saul oba onen Fäla sennen.

⁷Wan daut een Laum es, dan saul hee daut ver däm HARN brinjen

⁸un saul siene Haunt opp dän Kopp von sien Opfa lajen un daut ver daut Vesaumlungszelt schlachten. Un Aaron siene Säns sellen daut Bloot runtom aun dän Aultoa spretzen.

⁹Un hee saul däm HARN von daut Dankopfa een Fiaopfa brinjen, von aul daut Fat, daut gaunze Fatsträmel, waut doa dicht biem Zoagel loosjetrant woat, un doatoo daut Fat, waut daut Enjeweide bedakjt, un aul daut Fat aun daut Enjeweide,

¹⁰de beid Nieren met daut Fat, waut doaraun es, un waut aun de Hinjaschinkjes es, un dän Fatlaupen aun de Läwa, bie de Nieren loosjetrant.

¹¹Un de Priesta saul daut opp däm Aultoa en Ruak oppgonen loten aus een Äten vom Fiaopfa fa dän HARN.

¹²Es sien Opfa eene Kos, dan saul hee dee ver däm HARN brinjen

¹³un siene Haunt opp äaren Kopp lajen un dee ver daut Vesaumlungszelt schlachten. Un Aaron siene Säns sellen daut Bloot runtom aun dän Aultoa spretzen.

¹⁴Un hee saul doavon siene Opfagow aus Fiaopfa fa dän HARN brinjen: Daut Fat, waut daut Enjeweide bedakjt, un aul daut Fat waut aun daut Enjeweide es,

¹⁵de beid Nieren met daut Fat, waut doaraun es, un daut waut aun de Hinjaschinkjes es, un dän Fatlaupen äwa de Läwa, bie de Nieren loosjetrant.

¹⁶Un de Priesta saul daut opp däm Aultoa en Ruak oppgonen loten aus een Äten vom Fiaopfa to een scheenet Jeroch. Aul daut Fat jehieet däm HARN.

¹⁷Daut es eene Ordnunk fa emma fa aul june Nokomen, äwaraul wua jie wonen, daut jie nich Fat uk nich Bloot äten.