Read Plautdietsch (Low German) – De Bibel 3. Mose 6 Bible Online

3. Mose 6 - Plautdietsch (Low German) – De Bibel bible

3. Mose 6

¹De HAR räd met Moses un säd:

²Saj Aaron un siene Säns: Dit es daut Jesaz äwa de Brauntopfa. Daut Brauntopfa saul de gaunze Nacht äwa opp däm Aultoa bliewen, un daut Fia saul aum brennen jehoolen woaren.

³Un de Priesta saul sien Hamd un siene Bekjsen von Lienzeich auntrakjen un daut Ausch waut daut Fia von daut Brauntopfa opp däm Aultoa jemoakt haft, nämen un biesied Aultoa hanschedden.

⁴Un no däm saul hee siene Kjleeda wakjslen un daut Ausch ut daut Loaga rutdroagen no eene reine Städ.

⁵Un daut Fia opp däm Aultoa saul aum brennen jehoolen woaren, un nich utgonen. De Priesta saul aun jieda Morjen Holt doabowen trajchtlajen un doabowen daut Brauntopfa reedmoaken un de Fatstekja von de Dankopfa doabowen en Ruak oppgonen loten.

⁶Daut Fia opp däm Aultoa saul bestendich aum brennen jehoolen woaren un niemols utgonen.

⁷Un dit es daut Jesaz fa daut Ätesopfa: Aaron siene Säns sellen daut ver däm HARN nom Aultoa brinjen.

⁸Un eena saul eene Hauntvoll nämen von daut Mäl un Eelj vom Ätesopfa un dän gaunzen Weiruak, waut opp daut Ätesopfa licht, un saul daut opp däm Aultoa en Ruak oppgonen loten aus een Jedenkjopfa to een scheenet Jeroch fa dän HARN.

⁹Daut äwaje sellen Aaron un siene Säns oppäten. See sellen daut onen Suadieech äten opp eene jeweide Städ em Väahoff von daut Vesaumlungszelt.

¹⁰See sellen daut nich met Suadieech baken, wiels daut es äa Poat, waut ekj an jejäft hab von miene Fiaopfa. Daut sent heilje Gowen, krakjt soo aus daut Sindopfa un daut Schultopfa.

¹¹Wäa een menlicha Nokomen von Aaron es, dee saul daut äten. Daut es jun Rajcht aun däm HARN siene Fiaopfa fa june Nokomen. Wäa daut aunfot, saul toom Heilichtum jehieren.

¹²De HAR räd wieda met Moses un säd:

¹³Dit saul daut Opfa fa Aaron un siene Säns sennen, waut see däm HARN opfren sellen, von däm Dach wan see jesaulft woaren: Een Tieendel von een Efa wittet Mäl aus een pinkjeljet Ätesopfa, de eene Halft zemorjes, un de aundre Halft aum Owent.

¹⁴Daut Mäl saul met Eelj enjerieet un en eene Plot reesch jebakt woaren; un dan saul daut en Stekja jebroaken un aus Opfa jebrocht to een scheenet Jeroch fa dän HARN.

¹⁵Un de Priesta, dee von Aaron siene Nokomen en siene Städ jesaulft woat, mott dit Opfa reedmoaken un gaunz fa däm HARN opp däm Aultoa vebrennen. Dit es eene Ordnunk fa emma.

¹⁶Jieda Ätesopfa waut een Priesta fa sikj brinjt, saul gaunz vebrent un nich jejäten woaren.

¹⁷De HAR räd met Moses un säd:

¹⁸Saj Aaron un siene Säns: Dit es daut Jesaz fa daut Sindopfa. Opp de Städ, wua du daut Brauntopfa schlachten deist, saust du uk daut Sindopfa ver däm HARN schlachten, wiels daut sent heilje Gowen.

¹⁹De Priesta, waut daut Sindopfa opfat, saul daut opp eene jeweide Städ em Väahoff von daut Vesaumlungszelt äten.

²⁰Daut saul nich väakomen daut irjentwäa daut Fleesch aunschieet, dee nich toom Heilichtum jehieet. Un wäm von daut Bloot waut opp een Kjleet sprezt, dee saul de Plak opp eene jeweide Städ rutwauschen.

²¹Wan daut Fleesch en eenen ieednen Gropen jekoakt woat, dan saul dee nohäa entweijeschloagen woaren. Wan daut een koppana Gropen es, dee saul jeschieet un jrintlich met Wota jespeelt woaren.

²²Bloos wäa menlich es von de Priesta äare Famieljes, doaf doavon äten, wiels daut sent heilje Gowen.

²³Oba von aul de Sindopfa, wuavon waut Bloot en daut Vesaumlungszelt jebrocht woat, om de Veseenunk en daut Heilje to volbrinjen, doaf kjeena von daut Fleesch äten; daut mott vebrent woaren.