Read Plautdietsch (Low German) – De Bibel 3. Mose 7 Bible Online

3. Mose 7 - Plautdietsch (Low German) – De Bibel bible

3. Mose 7

¹Dit es daut Jesaz fa daut Schultopfa. Dit Opfa es eene heilje Gow.

²Opp de Städ, wua daut Brauntopfa jeschlacht woat, saul uk daut Schultopfa jeschlacht woaren, un daut Bloot saul runtom aun dän Aultoa jesprezt woaren.

³Un aul daut Fat saul jeopfat, daut Fatsträmel biem Zoagel un daut Fat, waut daut Enjeweide bedakjt,

⁴de beid Nieren met daut Fat, waut doaraun es, daut von de Hinjaschinkjes, un de Fatlaupen aun de Läwa; bie de Nieren saul hee dee loostranen.

⁵Un de Priesta saul daut opp däm Aultoa en Ruak oppgonen loten to een Fiaopfa fa dän HARN; daut es een Schultopfa.

⁶Wäa menlich es en de Priesta Famieljes, doaf daut opp eene jeweide Städ äten, wiels daut sent heilje Gowen.

⁷Soo aus daut Sindopfa, soo saul uk daut Schultopfa sennen; fa dee beid jelt eent un dautselwje Jesaz; dee sellen däm Priesta jehieren, wäa doamet de Veseenunk derchfieet.

⁸Däm Priesta, dee eenem sien Brauntopfa opfat, saul daut Fal von daut Brauntopfa jehieren, waut hee jeopfat haft.

⁹Un aule Ätesopfa, waut em Owen jebakt, ooda em Gropen ooda enne Paun jereet sent, sellen däm Priesta jehieren, dee daut opfat.

¹⁰Aul de aundre Ätesopfa, waut met Eelj enjerieet ooda onen Eelj sent, woaren mank de Priesta vedeelt.

¹¹Dit es daut Jesaz fa daut Dankopfa, waut däm HARN jeopfat woat.

¹²Wan see daut aus Dankopfa brinjen wellen, dan sellen see buta daut Opfatia noch Kuaken, waut met Eelj jemischt un onen Suadieech sent, un Kuaken onen Suadieech, waut met Eelj bestrikjt sent un doatoo noch von wittet Mäl, met Eelj derchjerieede Kuaken opfren.

¹³Buta de Kuaken sellen see uk noch onjesuadet Broot to een Dank un Heelopfa aus Opfagow brinjen.

¹⁴Un see sellen von jiedret eenen Deel aus Opfagow fa dän HARN brinjen; daut saul däm Priesta jehieren, dee daut Bloot von daut Opfatia aun dän Aultoa sprezt.

¹⁵Un daut Fleesch von een Dankopfa saul aun dämselwjen Dach jejäten woaren, wan daut jeopfat woat. Doa doaf nuscht bat däm näakjsten Morjen äwabliewen.

¹⁶Es daut een Opfa fa waut eena vesproaken haft, ooda een frieweljet Opfa, dan saul daut uk aun dämselwjen Dach wan daut jeopfat woat, jejäten woaren; wan oba waut äwablift, doaf daut uk aum näakjsten Dach jejäten woaren.

¹⁷Oba waut von daut jeopfade Fleesch noch bat däm dredden Dach äwablift, saul vebrent woaren.

¹⁸Un wan wäa aum dredden Dach von daut jeopfade Fleesch von sien Dankopfa äten woat, woat däm HARN daut nich aunjenäm sennen, un däm, wäa daut jeopfat haft, woat daut nich aunjeräakjent woaren, wiels daut es däm HARN jäajenaun. Wäa doavon at, dee lot eene Schult opp sikj.

¹⁹Uk daut Fleesch, waut aun irjent waut orreinet aunjeschieet haft, doaf nich jejäten woaren; daut saul met Fia vebrent woaren. Bloos dee wäa rein es, doaf vom Opfafleesch äten.

²⁰Wäa von daut Fleesch vom Dankopfa äten woat, waut däm HARN jehieet, un eene Onreinheit aun sikj haft, dee saul ut sien Volkj utjerot woaren.

²¹Un wan eene Persoon irjent waut orreinet aunschieet, auf daut een orreina Mensch, een orreinet Tia ooda waut aundret oppscheiseljet es, un dan von daut Fleesch vom Dankopfa at, waut däm HARN jehieet, dee saul ut sien Volkj utjerot woaren.

²²De HAR räd met Moses un säd:

²³Räd met de Israeliten un saj to an: Jie sellen kjeen Fat äten, nich von Rinda, uk nich von Schop ooda Kosen.

²⁴Daut Fat von dootjegonen ooda verätne Tieren derw jie to aulahaunt brucken; oba äten derw jie daut nich.

²⁵Wäa daut Fat von soone Tieren at, wuavon däm HARN Fiaopfa jebrocht woaren, dee woat utjerot woaren ut sien Volkj.

²⁶Jie sellen uk kjeen Bloot äten, nich vom Vee uk nich von Väajel, daut jelt äwaraul wua jie wonen.

²⁷Jieda eena, waut Bloot at, woat ut sien Volkj utjerot woaren.

²⁸De HAR räd met Moses un säd:

²⁹Räd met de Israeliten un saj: Wäa däm HARN sien Dankopfa brinjen well, dee saul daut doahan brinjen, waut däm HARN von daut Dankopfa jehieet.

³⁰Hee saul daut met siene ieejne Henj toom Fiaopfa fa dän HARN brinjen; daut Fat saul hee met de Brost toopbrinjen, om daut aus een Opfa, waut oppjehowen woat, ver däm HARN opptohäwen.

³¹Un de Priesta saul daut Fat opp däm Aultoa en Ruak oppgonen loten, oba de Brost saul Aaron un siene Säns jehieren.

³²Dän rajchten Schinkjen sell jie däm Priesta aus Aufgow von june Dankopfa jäwen.

³³Wäa von Aaron siene Säns daut Bloot un daut Fat von de Dankopfa opfat, däm saul de rajchta Schinkjen aus sien Aundeel jehieren.

³⁴De Brost, aus daut Opfa, waut oppjehowen woat, un dän Schinkjen, aus Aufgow Opfa, näm ekj de Israeliten von äare Dankopfa un jäw de Priesta, Aaron siene Säns, dee aus een bestemdet Poat bie de Israeliten fa emma.

³⁵Daut es daut Poat fa Aaron un siene Säns aun däm HARN siene Fiaopfa, waut an aun däm Dach bestemt wort, aus see aunträden durwen, om dän HARN aus Priesta to deenen.

³⁶Daut Poat, waut de HAR aun däm Dach, aus hee an ensad, väasajen deed, daut an daut von de Israeliten jejäft woaren sull, es een Poat fa aul äare Nokomen opp emma.

³⁷Dit sent de Jesazen fa daut Brauntopfa, daut Ätesopfa, daut Sindopfa, daut Schultopfa, daut Ensatungsopfa un daut Dankopfa,

³⁸soo aus de HAR Moses daut aun däm Dach opp däm Boajch Sinai aunjeordnet haft, aus hee de Israeliten aunordend, äare Opfa däm HARN en de Sinai Wiltnis to opfren.