Read Plautdietsch (Low German) – De Bibel 3. Mose 8 Bible Online

3. Mose 8 - Plautdietsch (Low German) – De Bibel bible

3. Mose 8

¹De HAR räd met Moses un säd:

²Nemm Aaron un siene Säns, de Kjleeda, de Saulweelj, dän jungen Boll toom Sindopfa, de beid Schopsbakj un dän Korf met daut onjesuade Broot,

³un vesaumel de gaunze Jemeent ver däm Engank von daut Vesaumlungszelt.

⁴Un Moses deed, waut de HAR am jesajcht haud, un vesaumeld de Jemeent ver däm Engank von daut Vesaumlungszelt

⁵un säd to an: Dit es daut, waut de HAR väajesajcht haft to doonen.

⁶Un Moses leet Aaron un siene Säns väakomen un wosch an met Wota

⁷un trock Aaron daut Priesta Hamd aun un bunk am de Binj om un trock am dän Äwarock aun un bunk am dän Efod om. Hee bunk am daut Schalduak om met daut jewowne Strämel, waut doatoo wia.

⁸Dan muak hee am de Brosttausch aun un läd de Lessa “Urim un Tummim” en de Tausch

⁹un bunk am de Koppbinj om un muak doa väaren daut goldne Schilt naun, daut heilje Schmuckstekj, krakjt soo aus de HAR am daut väajesajcht haud.

¹⁰Un Moses neem de Saulweelj un saulwd daut Heilichtum un aules, waut doabennen wia, un weid daut en.

¹¹Hee sprezt von de Eelj säwen mol aun de Waunt vom Aultoa un saulwd dän Aultoa un aul daut Jereetschoft un daut Wotadinkj met Jestal toop, daut aules enjeweit wia.

¹²Un hee goot Aaron von de Saulweelj opp sienen Kopp un saulwd am, daut hee jeweit wort.

¹³Un hee leet Aaron siene Säns väakomen un trock an daut Priesta Hamd aun, un bunk an de Binj om un rold an de Koppbinj opp däm Kopp toop to eene huage Metz, soo aus de HAR am daut väajesajcht haud.

¹⁴Dan leet Moses dän Boll toom Sindopfa doahan brinjen. Un Aaron un siene Säns läden äare Henj opp dän Boll sienen Kopp.

¹⁵Un Moses schlacht däm un neem daut Bloot un strikjt daut met sienen Finja runtom aun de Hieena von däm Aultoa, toom dän enweien; daut äwaje Bloot goot hee unjen aun dän Aultoa. Soo weid hee däm Aultoa un veschauft Veseenunk fa däm von de Veorreinjunk derch menschliche Vefälungen.

¹⁶Un hee neem aul daut Fat von daut Enjeweide, dän Laupen aun de Läwa, un de beid Nieren met daut Fat doaraun, un leet daut opp däm Aultoa en Ruak oppgonen.

¹⁷Oba daut äwaje von däm Boll, daut Lada, daut Fleesch un daut Aufgank, vebrend hee buta daut Loaga met Fia, soo aus de HAR daut väajesajcht haud.

¹⁸Dan leet hee dän Schopsbock fa daut Brauntopfa doahan brinjen. Un Aaron un siene Säns läden äare Henj opp däm sien Kopp.

¹⁹Un Moses schlacht däm un sprezt daut Bloot runtom aun dän Aultoa.

²⁰Dan veschneet hee dän Bock en Stekja un vebrend de Stekja met däm Kopp un daut Fat toop opp däm Aultoa.

²¹Daut Enjeweide, un de unjaschte Been Enja wosch hee met Wota rein un soo leet Moses dän gaunzen Bock opp däm Aultoa en Ruak oppgonen. Daut wia een Brauntopfa to een scheenet Jeroch, een Fiaopfa fa dän HARN, soo aus de HAR am daut aunjeordnet haud.

²²Hee leet uk dän aundren Schopsbock brinjen toom Ensatungsopfa. Un Aaron un siene Säns läden äare Henj opp däm sien Kopp,

²³un Moses schlacht däm un neem waut von daut Bloot un deed Aaron doa waut von aun sienen rajchten Uabommel un opp dän Dumen aun siene rajchte Haunt un opp de groote Tee aun sienen rajchten Foot.

²⁴Dan leet hee Aaron siene Säns väakomen un muak an uk von daut Bloot aun dän rajchten Uabommel, aun dän rajchten Dumen un aun de groote Tee aum rajchten Foot. Un daut äwaje Bloot sprezt hee runtom aun dän Aultoa.

²⁵Dan neem hee daut Fat, daut Fatsträmel von dicht biem Zoagel, un aul daut Fat vom Enjeweide un dän Laupen aun de Läwa, de beid Nieren met daut Fat doaraun un dän rajchten Schinkjen.

²⁶Un von däm Korf met onjesuadet Broot, waut ver däm HARN stunt, neem hee eene Kuak, waut onen Suadieech wia, un eene Brootkuak met Eelj un eene Pankuak. Un läd daut opp daut Fat un dän rajchten Schinkjen.

²⁷Un hee jeef Aaron un siene Säns daut aula en äare Henj. Un dee hoowen daut opp aus een Opfa, waut oppjehowen woat ver däm HARN.

²⁸Dan neem Moses wada aules ut äare Henj un leet daut opp Däm Aultoa en Ruak oppgonen, bowen opp daut Brauntopfa. Daut wia een Ensatungsopfa to een scheenet Jeroch, een Fiaopfa fa dän HARN.

²⁹Un Moses neem de Brost un hoof dee opp aus een Opfa, waut oppjehowen wort ver däm HARN; un dee hilt Moses aus sien Poat von däm Bock vom Ensatungsopfa, soo aus de HAR am daut väajesajcht haud.

³⁰Dan neem Moses von de Saulweelj un waut von daut Bloot opp dän Aultoa un sprezt von beides opp Aaron un siene Kjleeda, un opp siene Säns un äare Kjleeda; soo weid hee Aaron un siene Kjleeda, un siene Säns un äare Kjleeda.

³¹Dan säd Moses to Aaron un siene Säns: Koakt daut Fleesch ver däm Engank von daut Vesaumlungszelt! Un doa sell jie daut uk äten, uk daut Broot ut däm Korf von daut Ensatungsopfa. Soo haft de HAR daut väajesajcht, daut Aaron un siene Säns daut äten sellen.

³²Waut äwablift von daut Fleesch un Broot, daut sell jie met Fia vebrennen.

³³Un jie sellen säwen Doag lank nich von däm Engank von daut Vesaumlungszelt wajchgonen, bat de Doag von jun Ensatungsfast äwa sent. June Henj sellen säwen Doag enjeweit woaren.

³⁴Soo aus jie daut aun däm vondoagschen Dach jedonen haben, haft de HAR väajesajcht, daut wieda to doonen, om junt to veseenen.

³⁵Jie sellen säwen Doag un säwen Nacht ver däm Engank von daut Vesaumlungszelt bliewen un däm HARN siene Aunordnunk jehorchen, sest mott jie stoawen. Soo haft de HAR mie daut väajesajcht.

³⁶Un Aaron un siene Säns deeden aules, waut de HAR derch Moses aunjeordnet haud.