Read Plautdietsch (Low German) – De Bibel Jeremia 13 Bible Online

Jeremia 13 - Plautdietsch (Low German) – De Bibel bible

Jeremia 13

¹Dit es waut de HAR to mie säd: Go emol un kjeep een Stekj Lienzeich, waut du die romnämen kaust, un nemm die daut om. Oba duck daut nich en Wota en.

²Un ekj jinkj, opp daut waut de HAR jesajcht haud, un koft mie een Stekj toom romnämen, un neem mie daut om.

³Un de HAR säd een tweedet mol to mie:

⁴Nemm daut Stekj toom romnämen, woont du die jekoft hast, un daut du drajchst, un go no däm Eufrat Riefa un vestäakj daut doa en eenen jespoolden Steen.

⁵Un ekj jinkj no däm Eufrat Riefa un vestuak daut Stekj toom romnämen, krakjt soo aus de HAR mie jesajcht haud.

⁶Dan no eene lenjre Tiet, säd de HAR to mie: Nu go no däm Eufrat Riefa, un hol die daut Stekj toom romnämen, daut ekj die säd, daut du daut doa vestäakjen sust.

⁷Un ekj jinkj no däm Eufrat Riefa un groof dee Städ no, un neem daut Stekj toom romnämen wada opp, von wua ekj mie daut vestoaken haud. Oba soo aus du die denkjen kaust, wia daut Stekj toom romnämen vedorwen un nich mea to brucken.

⁸Dan wort mie kloa waut de HAR sajen wull, un ekj säd:

⁹Dit es waut de HAR sajcht: Krakjt soo, woa ekj aul daut vekomen loten, met woont Juda un Jerusalem sikj soo väl meenen.

¹⁰Dit es een beeset Volkj, un horcht nich no waut ekj saj. Dee läwen no äa ieejenkopjet Väanämen, un gonen no framde Jetta, un kjneeen sikj ver dee, un deenen dee. Nu woaren see soo sennen, aus dit Stekj toom romnämen, daut to nuscht to brucken es.

¹¹Krakjt soo aus daut Stekj, waut eena sikj omnemt, sikj aun dän Mensch helt, soo hab ekj, sajcht de HAR, aule Israeliten un aul de Lied von Juda, aun mie naun jehoolen. Ekj deed dit soo daut see mien Volkj sennen sullen, un daut ekj sull aunerkjant sennen, un jeloft un jeieet woaren.

¹²Un dan saj an dit: Dit es waut de HAR, dee Israel äa Gott es, sajcht: Jieda Wienbuddel sull voll Wien jefelt sennen. Un dan woaren see to die sajen: Wäa weet daut nich, daut aule Wienbudlen sullen voll Wien jefelt sennen?

¹³Un dan saj an: Dit es waut de HAR sajcht: Horcht emol, ekj woa aul dee, dee en dit Launt wonen, de Kjennichs, dee opp dän Davidstroon setten, de Priesta un de Profeeten, un aule Menschen en Jerusalem, voll un bedrunken moaken.

¹⁴Un ekj woa dee eenen jäajen däm aundren schmieten, auf daut Elren ooda Kjinja sent, sajcht de HAR, un ekj woa an kjeen Metlieden bewiesen. Mie woat daut nich schod sennen om an, un ekj woa nich nojäwen an to vedoawen.

¹⁵Horcht emol häa. Doot junt nich too groot, wiels de HAR haft sien Wuat jejäft.

¹⁶Ieet däm HARN junen Gott, ea hee daut lat diesta äwa junt woaren, un jie em tweediesta oppe Boaj, junt vestaupen un hanfaulen. Jie luaren, daut saul dach woaren, un hee moakt daut diesta fa junt, un soo daut nuscht to seenen es.

¹⁷Wan jie nich horchen woaren, woa ekj en mie hielen, wiels jie soo prauzich sent. Miene Uagen woaren dikj woaren, un miene Tronen sea ranen, wiels däm HARN siene Häad wajchjefieet woat woaren.

¹⁸Saj däm Kjennich un siene Mutta: Sat junt gaunz läach han, wiels june straume Kroonen sent junt von de Kjap jekomen.

¹⁹De Städa em Sieden sent beloagat; doa es kjeena, wäa dee raden kaun. Daut gaunze Juda es wajchjeschlapt; doa es nuscht jebläwen.

²⁰Kjikjt emol opp. Seet doch wäa vom Nuaden kjemt. Waut es met june scheene Lied jeworden, dee jie leiden sullen?

²¹Waut woa jie sajen, wan dee woone jie junt kroagden, de Macht äwa junt nämen? Woa jie daut nich beduaren, aus eene Fru, dee en äare Weeen benomen es?

²²Un wan jie junt froagen sullen: Wuarom es ons dit jeworden? dan es de Auntwuat: Wiels jie soo väl Sind haben. Jun Kjleet woat oppjehowen woaren, un jie woaren en Schaund jebrukt woaren.

²³Kaun eena, dee von Kusch kjemt, siene Hut aundasch moaken, ooda een Leopard siene Plaken wajchnämen? Daut wudd junt krakjt soo schwoa sennen goodet doonen, dee jie en Sind jeeeft sent.

²⁴Ekj woa junt vestreien, soo aus de Wint vonne Wiltnis daut Stroo vepitscht.

²⁵Dit es waut jie doafäa kjrieen; soo woa ekj junt daut toomäten, sajcht de HAR. Wiels jie mie vejäten haben, un junt opp Läajes jestett haben,

²⁶woa ekj junt dän Rock opphäwen, un june Schaund seenen loten,

²⁷woo jie romjeschwient haben, un aulem hanjekroacht haben, un woo onveschämt un ontru jie jewast sent, un soo oppscheislich oppe Humpels un Stapen jewast sent. Woo saul daut noch met die, Jerusalem, wan du daut nich oppriemst? Woo lang saul daut noch dieren?