Read Plautdietsch (Low German) – De Bibel Jeremia 19 Bible Online

Jeremia 19 - Plautdietsch (Low German) – De Bibel bible

Jeremia 19

¹Dit es waut de HAR säd: Go un kjeep die eenen Leemtopp biem Toppstrikja, un nemm eenje von de Leidasch vom Volkj un väaschte von de Priesta,

²un got rut no daut Ben Hinnom Tol, jrod buta daut Schoawel Puat. Doa saj an waut ekj die saj.

³Saj to an: Horcht no waut de HAR sajcht, jie Kjennichs en Juda un Lied von Jerusalem. Dit es waut de HAR, dee aules rejieet, un Israel äa Gott es, sajcht: Horcht emol, ekj woa soon Schoden äwa dise Staut brinjen, daut dee, dee daut hieren, daut enne Uaren zinjren woat.

⁴Ekj woa dit doonen, wiels see mie veloten haben, un haben dise Städ wadalich jemoakt, doaderch daut see hia Opfa jemoakt haben fa aundre Jetta, soone aus see un äare Elren, un de Kjennichs von Juda nich kjanden, un wiels see opp disen Plauz väl mol oschuldje äa Bloot vegoten haben.

⁵See haben de huage Opfastäden fa Baal oppjebut un doa äare Kjinja vebrent en Brauntopfa fa Baal, un soont hab ekj nich velangt ooda jesajcht, un soont es mie nich emol biejefollen.

⁶Un doawäajen woat daut soo romkomen, daut see dit Tol nich mea daut “Ben Hinnom Tol”, ooda daut “Tofet Tol” nanen woaren, oba daut “Schlacht Tol”.

⁷Un ekj woa daut vedoawen, waut Juda un Jerusalem opp disen Plauz väahaben, un ekj woa an loten unja daut Schwieet von äare Fiend, dee waut an nom Läwen stonen, omkomen. Un ekj woa äare Doodes loten von de Väajel enne Loft, un von de wille Tieren oppe Stap vefräten.

⁸De Schoden, dee äwa dise Staut komen woat, woat soo groff sennen, daut dee waut doa vebie komen, daut schudren woat, un dee woaren sikj tieren, äwa waut doa aules jeworden es.

⁹Un ekj woa daut soo wiet brinjen, daut see daut Fleesch von äare ieejne Kjinja äten woaren. Menschen woaren daut Fleesch von aundre Menschen äten, wiels de Noot soo groff sennen woat. Soo woat daut sennen wan de Fient, dee an nom Läwen steit, an beloagren un toosaten woat.

¹⁰Un du saust dän Leemtopp ver de Mana, dee met die jegonen sent, tweibräakjen

¹¹un to an sajen: Dit es waut de HAR, dee aules rejieet, sajcht: Soo aus eena, eenen Toppstrikja sienen Leemtopp tweibrakjt, soo daut dee nich wada foadich jemoakt kaun woaren, soo woa ekj dit Volkj un dise Staut tweibräakjen. Un see woaren en Tofet begrowen, wiels sest kjeen Plauz mea es.

¹²Daut es waut ekj met dise Städ, un de Lied von hia doona woa, sajcht de HAR, bat dise Staut no Tofet lat.

¹³Un de Jebieda en Jerusalem, un däm Kjennich von Juda siene Jebieda, un aule Hiesa wua oppem Dak Weiruak jebrent woat fa de Stierns, un wua Wien jeopfat woat to framde Jetta, dee woaren krakjt soo orrein sennen aus Tofet.

¹⁴Un aus Jeremia trigj kjeem von Tofet, daut es je wua de HAR am hanschekjt, daut hee doa profezeien sull, don jinkj hee em Väahoff vom HARN sien Hus, un säd doa to daut gaunze Volkj:

¹⁵Dit es waut de HAR, dee aules rejieet, un Israel äa Gott es, sajcht: Ekj woa nu aul dän Schoden opp dise Staut brinjen un opp aul de Städa hia, woonen ekj wäajen an jerät hab, wiels see soo ieejenkoppich sent, un nich no miene Wieed horchen wellen.