Read Plautdietsch (Low German) – De Bibel Jeremia 25 Bible Online

Jeremia 25 - Plautdietsch (Low German) – De Bibel bible

Jeremia 25

¹Dit es de Norecht dee Jeremia kjrieech, wäajen de Lied en Juda. Daut wia en daut vieede Joa, daut Jojakim, Josia sien Sän, Kjennich en Juda wia. Daut wia uk daut ieeschte Joa, daut Nebukadnezar Kjennich en Babel wia.

²Un de Profeet Jeremia räd to aule Lied en Juda, un dee waut en Jerusalem wonden, un säd:

³Von daut 13. Joa, daut Josia, Amon sien Sän, Kjennich en Juda wia, daut sent dan nu aul fa 23 Joa, haft de HAR mie emma wada sien Wuat jejäft, un ekj hab junt daut pinkjlich wiedajejäft, bloos jie haben nich doano jehorcht.

⁴Wan de HAR uk emma wada siene Deena, de Profeeten, no junt jeschekjt haft, hab jie nich no an jehorcht, un nich jedonen waut jesajcht wort.

⁵Dee säden, daut jie sullen junt wajch dreien von dän beesen Wajch un schlajchte Sachen, dee jie doonen. Dan woa jie en daut Launt bliewen, woont de HAR junt un june Elren lang trigj opp emma jejäft haft.

⁶Dee säden junt, daut jie nich sullen aundre Jetta deenen ooda aunbäden, un jie sullen am nich met de Jetta, dee jie selfst moaken, reizen, bat hee doafäa strofen mott.

⁷Oba jie jehorchten mie nich, säd de HAR, un jie haben mie enjeoajat, to junen ieejnen Schoden, met daut waut jie met june Henj jemoakt haben.

⁸Un nu sajcht de HAR, dee aules rejieet, daut wiels jie nich jehorcht haben, no waut ekj junt säd,

⁹woa ekj aul de Velkja vom Nuaden un uk Nebukadnezar, dän babelonischen Kjennich, dee fa mie schauft, hia häa schekjen, daut dee äwa dit Launt, un dee waut hia wonen, äwahäagonen woaren, sajcht de HAR. Dee woaren junt un de Lenda hiarom gaunz vedoawen. Daut woat de Lied veschrakjen, woo junt daut jegonen es, un dit woat junt opp emma eene Schaund bliewen.

¹⁰Un ekj woa een Enj moaken von aul äa spossen un lostich sennen, von de Stemm vom Briegaum un de Brut, un von daut rummuaren von de Mäl, un daut dachen von Laumpen.

¹¹Dit gaunze Launt woat ladich un vedorwen ligjen bliewen fa 70 Joa. Soo lang woaren dise Velkja däm babelonischen Kjennich deenen.

¹²Dan wan de 70 Joa om sent, woa ekj jan Volkj, un dän babelonischen Kjennich, un de Chaldäa bestrofen, fa daut waut see orrajcht jedonen haben, sajcht de HAR. Un ekj woa daut Launt opp emma vedoawen.

¹³Dan woa ekj aul daut, waut ekj jesajcht hab, daut waut Jeremia äwa aul de aundre Velkja jeprofezeit haft, un en dit Buak oppjeschräwen sent, opp jan Launt brinjen.

¹⁴Un dee woaren dan selfst uk motten väle Lenda un groote Kjennichs deenen, un ekj woa an fa daut waut see vedeent haben, un waut see jedonen haben, trigjtolen.

¹⁵Dit es waut de HAR, dee Israel äa Gott es, to mie sajcht: Hia es een Kuffel met Wien von mienen Oaja. Nemm daut von en miene Haunt un moak aul de Velkja, no dee ekj die schekj, von daut drinkjen.

¹⁶See sellen daut dolschlucken un stolpren un errsennich woaren, von daut Schwieet, daut ekj mank an schekj.

¹⁷Un ekj neem daut Kuffel von en däm HARN siene Haunt, un muak aul de Velkja, no dee de HAR mie jeschekjt haud, doavon drinkjen.

¹⁸Jerusalem un de Städa en Juda, äare Kjennichs un aunjestalde, musten daut drinkjen. Dee wudden vedorwen woaren un ladich ligjen, un veacht sennen un äaren Fluch droagen, soo aus daut vondoag noch es.

¹⁹Un ekj jinkj no dän ägiptischen Kjennich, met siene aunjestalde un Volkjsleida un sien gaunzet Volkj,

²⁰un aul daut Mischvolkj, waut doa es. Un ekj jinkj no aul de Kjennichs en daut Launt Uz, aul de Kjennichs mank de Filista en Aschkelon, Gaza, Ekron un waut äwajebläwen es von Aschdod;

²¹dee von Edom, von Moab un von de Amonita;

²²aul de Kjennichs en Tierus, aul de Kjennichs von Sidon, un de Kjennichs von äare Inseln un Kolonien äwa daut Mäa;

²³de Städa Dedan, Tema, un Bus un dee, wua see sikj de Hoa aufschäaren;

²⁴aul de Kjennichs mank de Araba un mank daut Mischvolkj, daut enne Wiltnis läft;

²⁵aul de Kjennichs en Simri, aul de Kjennichs en Elam, aul de Kjennichs en Medien;

²⁶eena nom aundren aul de Kjennichs vom Nuaden, dee waut dicht bie wieren un dee waut wiet auf wieren. Aul de Kjennichrikjs von aulawäajen oppe Ieed. Un no daut, saul de Kjennich von Scheschach drinkjen.

²⁷Un saj to de Kjennichs: Dit es waut de HAR, dee aules rejieet, un Israel äa Gott es, sajcht: Drinkjt bat jie bedrunken sent un kolkjen motten, bat jie hanfaulen un nich wada oppstonen kjennen, wäajen daut Schwieet, woont ekj mank junt schekjen woa.

²⁸Un wan see nich von daut Kuffel drinkjen, waut du an jefst, dan saj an: De HAR, dee aules rejieet, sajcht, jie motten drinkjen.

²⁹Horcht emol, bie de Staut, dee no mienen Nomen veneemt es, fang ekj met daut Onheil aun, un meen jie, dan woa jie veschoont bliewen? Jie woaren nich veschoont bliewen. Ekj brinj daut Schwieet opp aule Menschen oppe Ieed, sajcht de HAR, dee aules rejieet.

³⁰Dit es waut du an aules profezeien un sajen saust: De HAR woat von huach rauf brellen, un sikj von en siene heilje Städ hieren loten; hee woat äwa de Häad opp siene Stapen schrieen, un aus eena, dee siene Wiendruwen enne Tonn veklunjt, opp aule Menschen, dee opp Ieed wonen, sikj hieren loten.

³¹Un siene Stemm woat bat de Kaunt von de Ieed to hieren sennen. De HAR brinjt een Jerecht opp aule Velkja; hee woat äwa aule Menschen rechten, un de schuldje met daut Schwieet ombrinjen, sajcht de HAR.

³²Dit es waut de HAR, dee aules rejieet, sajcht: Kjikjt emol, doa es waut schlemmet, daut von een Volkj no daut aundre jeit; een grootet Owwada kjemt opp, von wiet auf oppe Ieed.

³³Wan dee Tiet kjemt, woaren de Doodes von een Enj bat daut aundre oppe Ieed ligjen. Kjeena woat äwa dee hielen, kjeena woat dee opphäwen, un kjeena woat dee begrowen. Dee woaren oppe Stap ligjen, un doa aus Mest vekomen.

³⁴Jie, dee jie de Leidasch sent, hielt un schriet; jie, dee jie de Häad väastonen, sält junt en Ausch. De Tiet es jekomen, daut jie jeschlacht un vestreit woaren; jie woaren vefaulen aus een dieret Kauntje.

³⁵De Hoads woaren kjeen Utwajch haben, un de aunjestalde woaren nich wajch komen.

³⁶Woo woaren de Hoads doch hielen, un de Leidasch von daut Volkj schrieen, wiels de HAR äare Weid vedoaft;

³⁷un wiels de scheene frädelje Jäajent to nuscht jeworden es, derch däm HARN sien growen Oaja.

³⁸Aus een Leiw ut siene Heel, es hee nu rutjekomen, un äa Launt es nu eene Wiltnis von sien growet Schwieet, un derch sienen grooten Oaja.