Read Plautdietsch (Low German) – De Bibel Jeremia 26 Bible Online

Jeremia 26 - Plautdietsch (Low German) – De Bibel bible

Jeremia 26

¹Boolt no däm, daut Jojakim, Josia sien Sän, de Kjennich en Juda wort, wort Jeremia daut kloa, waut de HAR to sajen haud.

²De HAR wull haben, daut hee en däm Väahoff vom Tempel gonen sull, un to dee räden, waut von de veschiedne Städa en Juda toom aunbäden, doa hanjekomen wieren. Hee sull aules sajen, waut de HAR to am jesajcht haud un nuscht utloten.

³Veleicht wudden de Menschen aula toop horchen, un sikj von äaren schlajchten Wajch kjieren, un hee wudd kjennen daut vedoawen, woont hee em Senn haud, trigjhoolen. Hee haud em Senn, daut hee an bestrofen wudd fa daut schlajchte, waut see jedonen hauden.

⁴Dit es waut ekj an sajen sull: Dit es waut de HAR sajcht: Jehorcht miene Jesazen, un haundelt doano, aus ekj junt daut väajelajcht hab.

⁵Horcht no daut waut de Profeeten, dee mie deenen, sajen. Ekj hab dee emma wada no junt jeschekjt, wan jie uk nich no dee jehorcht haben.

⁶Wan jie daut nich doonen, woa ekj met disen Tempel krakjt soo doonen aus met Silo, un woa dise Staut to een Fluchwuat moaken fa aul de Velkja oppe Ieed.

⁷Un de Priesta un de Profeeten un daut gaunze Volkj hieeden Jeremia dise Wieed en däm HARN sien Hus räden.

⁸Aus Jeremia doa aules jesajcht haud, waut de HAR am oppjejäft haud, neemen de Priesta un Profeeten, un daut gaunze Volkj, am faust un säden: Du hast dän Doot vedeent.

⁹Wuarom sajchst du em HARN sien Nomen, daut dis Tempel woat daut soo gonen aus Silo, un dise Staut woat eene Wiltnis woaren, wua kjeena mea wonen woat? Un aul de Menschen em Tempel saumelden sikj rom Jeremia.

¹⁰Dan aus de Rejierungsmana von Juda hieeden, waut doa väajinkj, kjeemen see von däm Kjennich sien Hus, un jinjen nopp em HARN sien Hus nenn. Un see vesaumelden sikj bie daut niee Puat vom Tempel.

¹¹Un de Priesta un Profeeten säden to de Rejierungsmana un daut gaunze Volkj: Dis Maun haft dän Doot vedeent. Hee haft jäajen dise Staut jeprofezeit, soo aus jie daut aula selfst jehieet haben.

¹²Oba Jeremia säd to aul de Rejierungsmana un daut gaunze Volkj: De HAR säd ekj sull aul dit sajen, waut jie jäajen dit Hus un dise Staut jehieet haben.

¹³Nu es daut opp to junt, daut jie bäta haundlen un doonen, un daut jehorchen, waut de HAR, jun Gott, jesajcht haft. Dan woat däm HARN daut leet sennen, daut hee soonen Schoden jäajen junt jedreift haft.

¹⁴Oba ekj wäa mie hia nich. Doot met mie soo aus junt daut goot un rajcht schient.

¹⁵Oba lot junt dit jesajcht sennen, wan jie mie doot moaken, dan sent jie un dise Staut un dee, dee hia wonen, schuldich eenen oschuldjen Mensch doot jemoakt to haben. Wiels daut es opp iernst soo, daut de HAR mie no junt jeschekjt haft, aul dit to junt to sajen.

¹⁶Dan säden de Rejierungsmana un daut gaunze Volkj to de Priesta un Profeeten: Dis Maun haft nich dän Doot vedeent. Hee haft en dän Nomen von dän HARN ons Gott to ons jerät.

¹⁷Un een poa Mana von de aundre Städa, dee goot aunjeseenen wieren, stunden opp un säden to dee, dee doa toopjekomen wieren:

¹⁸En dee Tiet aus Hiskia de Kjennich en Juda wia, kjeem de Profeet Micha, von Moreschet, un säd en Juda to daut gaunze Volkj: “Dit es waut de HAR, dee aules rejieet, sajcht: Zion woat jeplieecht woaren aus een Flekj, un Jerusalem woat een Steenhupen woaren, un de Tempel Boajch woat met Struck bewaussen.”

¹⁹Leeten Hiskia un aul de Menschen en Juda don werkjlich dän Profeet doot moaken? Ferchten dee sikj nich fa dän HARN, un sochten trajcht to moaken, waut see orrajcht jedonen hauden? Un wort däm HARN daut nich leet, daut hee soonen Schoden jäajen an jedreift haud? Wie kunnen hia grooten Schoden opp ons brinjen.

²⁰Doa wia to dee Tiet uk noch eena, dee en däm HARN sien Nomen profezeien deed. Daut wäa Uria, Schemaja sien Sän, von Kirjat Jearim. Dee kjeem un profezeid, soo aus Jeremia, jäajen de Staut un jäajen daut Launt.

²¹Un aus de Kjennich Jojakim, un de väaschte von de Armee, un de Rejierungsmana hieeden, waut Uria säd, wullen see am loten doot moaken. Aus Uria daut enwort, enjst hee sikj un hee muak sikj utem Launt un rand no Ägipten.

²²Oba de Kjennich Jojakim schekjt Elnatan, Achbor sien Sän, un aundre met am no Ägipten,

²³daut see Uria trigj brochten. Un de Kjennich Jojakim leet Uria met daut Schwieet doot moaken, un see schmeeten sienen Kjarpa en daut Grauf, wua see daut jeweenelje Volkj begrowden.

²⁴Oba Ahikam, Schafan sien Sän, holp Jeremia soo daut daut Volkj am nich doot moaken kunn.