Read Plautdietsch (Low German) – De Bibel Jeremia 36 Bible Online

Jeremia 36 - Plautdietsch (Low German) – De Bibel bible

Jeremia 36

¹En daut vieede Joa daut Jojakim, Josia sien Sän, Kjennich en Juda wia, kjrieech Jeremia dise Norecht vom HARN.

²Nemm eene Schreftroll un schriew aul daut opp waut ekj to die äwa Israel un Juda un aul de Velkja jesajcht hab. Schriew aules dol, von don aus ekj emol aunfunk to die to räden, aus Josia noch Kjennich wia, bat vondoag.

³Veleicht woaren de Lied en Juda sikj omkjieren wan see von aul dän Schoden hieren, dän ekj em Senn hab jäajen an to brucken. Veleicht woaren see dan aula, een jiedra von sienen beesen Wajch dreien, daut ekj an äare Schult un äare Sind vejäwen kaun.

⁴Dan roopt Jeremia Baruch, Nerija sien Sän, un dee schreef aul de Wieed, woone de HAR to Jeremia jerät haud, opp en eene Schreftroll, soo aus Jeremia am dee väasäd.

⁵Un Jeremia säd to Baruch: Wiels mie daut aufjesajcht es, em Tempel nentogonen,

⁶well ekj haben, daut du saust aun eenen Faustdach em Tempel gonen un doa väaläsen, waut de HAR to mie jesajcht haft. Du saust dise Schreftroll, dee du soo jeschräwen hast aus ekj die daut väajesajcht hab, ver daut Volkj, daut von de veschiedne Städa en Juda jekomen es, väaläsen.

⁷Veleicht woat de HAR äa Jebäd aunnämen, wan see sikj von dän beesen Wajch, dän see gonen, wajchdreien. Daut es groff woo veoajat un veläajen de HAR äwa dit Volkj es.

⁸Un Baruch, Nerija sien Sän, jinkj un deed daut krakjt soo aus de Profeet Jeremia am jesajcht haud. Hee jinkj nom Tempel un laus en de Schreftroll, daut waut de HAR Jeremia jesajcht haud.

⁹Dan enne 9. Moonat von daut 5. Joa daut Jojakim, Josia sien Sän, Kjennich en Juda wia, worden aule Menschen en Jerusalem, un dee waut von de Städa en Juda no Jerusalem kjeemen, oppjeroopt, daut see ver däm HARN fausten sullen.

¹⁰Un Baruch jinkj nom Tempel no de Stow, dee dän Schriewa Gemarja, Schafan sien Sän, siene wia, un laus Jeremia siene Wieed doa väa. Dise Stow wia em Bowahoff, dicht bie daut niee Puat vom Tempel.

¹¹Dan aus Michaja, Gemarja sien Sän, un Schafan sien Grootsän, däm HARN siene Wieed von de Schreftroll jehieet haud,

¹²jinkj hee rauf no däm Kjennich sien Hus, wua Elischama, de Schriewa, Delaja, Schemaja sien Sän, Elnatan, Achbor sien Sän, Gemarja, Schafan sien Sän, un Zidkija, Hananja sien Sän un aul de aundre Rejierungsmana toop wieren.

¹³Un Michaja säd an aules waut hee jehieet haud, aus Baruch de Schreftroll haud ver daut Volkj väajeläst.

¹⁴Dan schekjten de Rejierungsmana Jehudi, Netanja sien Sän, dee von Schelemja un Kuschi aufstaumd, no Baruch, daut hee de Schreftroll, dee hee daut Volkj väajeläst haud, sull met brinjen un no an komen. Un Baruch neem de Schreftroll un jinkj no de Rejierungsmana.

¹⁵Un dee kroagden am doltosaten un de Schreftroll väatoläsen, daut see daut hieren kunnen. Un Baruch laus an de Schreftroll väa.

¹⁶Aus see aules hieeden, waut Baruch laus, kjikjten see eena dän aundren vebleft aun un säden to Baruch: Dit mott wie aula däm Kjennich sajen.

¹⁷Un see fruagen Baruch, woo hee doatoo jekomen wia, daut hee dit, waut Jeremia jesajcht haud, doljeschräwen haud.

¹⁸Un Baruch säd an, daut Jeremia haud am daut aula väajesajcht, un hee haud daut met Tint opp de Schreftroll jeschräwen.

¹⁹Dan säden de Rejierungsmana to Baruch, daut hee un Jeremia sullen wajchgonen, wua kjeena wist wua see wieren.

²⁰See läden sikj de Schreftroll en däm Schriewa Elischama siene Stow wajch, un jinjen no de Kjennichstow, un säden däm Kjennich aules, waut en de Roll wia.

²¹Un de Kjennich schekjt Jehudi dee Schreftroll to holen. Dee hold dee von däm Schriewa Elischama siene Stow, un laus däm Kjennich dee väa. Un aul de Rejierungsmana stunden biesied däm Kjennich.

²²Wiels dit en de näajende Moonat wia, saut de Kjennich em Wintahus bie een opnet Hieet, wua see een Fia brennen hauden.

²³Oba aus Jehudi dree ooda vea Rieej von de Roll jeläst haud, neem de Kjennich een Schriewamassa un schneet daut Stekj, waut hee jeläst haud, auf, un schmeet daut em Hieet em Fia nenn. Hee deed daut emma wada bat de gaunze Roll em Fia vebrent wia.

²⁴Un kjeena wia vebleft, un kjeena, nich de Kjennich un uk nich de Leida, reeten sikj de Kjleeda twei, aus see aul dise Wieed hieeden.

²⁵Elnatan un Delaja un Gemarja hauden dän Kjennich noch jeprachat, daut hee de Schreftroll nich vebrennen sull, oba dee haud doa nich no jehorcht.

²⁶Dan schekjt de Kjennich sienen Sän, Jerachmeel, un Seraja, Asriel sien Sän, un Schelemja, Abdeel sien Sän, daut see sullen dän Schriewa Baruch un dän Profeet Jeremia gonen faustnämen. Oba de HAR haud an vestoaken.

²⁷No däm daut de Kjennich de Schreftroll met de Wieed, woone Baruch opp Jeremia sien väasajen jeschräwen haud, vebrent haud, kjrieech Jeremia dise Norecht vom HARN.

²⁸Nemm die noch eene Schreftroll un schriew aul de Wieed dol, waut opp de ieeschte Roll wieren, woone de Kjennich Jojakim vebrent haft.

²⁹Un saj, äwa Jojakim, däm Kjennich von Juda: Dit es waut de HAR sajcht: Du hast de Schreftroll vebrent, un hast jefroacht, wuarom dee säd, daut de Kjennich von Babel komen wudd un dit Launt vedoawen, soo daut kjeene Menschen ooda Vee mea doa wonen wudden.

³⁰Nu sajcht de HAR äwa Jojakim, dän Kjennich von Juda: Kjeene von diene Nokomen woaren opp däm Davidstroon to setten komen, un wan du stoafst, woascht du rutjeschmäten woaren, daut du äwadach enne heete Sonn un enne Nacht em Frost lichst.

³¹Ekj woa am un siene Nokomen un siene Rejierungsmana bestrofen fa waut see orrajcht jedonen haben. Un ekj woa daut beese loten opp an un opp de Lied von Jerusalem un Juda komen, von waut ekj aul ea räd, un see nich doano horchten.

³²Un Jeremia neem eene aundre Schreftroll, un jeef Baruch, sienen Schriewa, dee. Un Jeremia säd wada väa, un Baruch schreef aules dol, waut Jeremia am väasäd, soo aus daut opp de Schreftroll jewast wia, woone Jojakim, de Kjennich von Juda, em Fia vebrent haud, un noch välet aundret krakjt soont mea.