Read Plautdietsch (Low German) – De Bibel Jeremia 38 Bible Online

Jeremia 38 - Plautdietsch (Low German) – De Bibel bible

Jeremia 38

¹Schefatja, Matan sien Sän, un Gedalja, Paschhur sien Sän, un Juchal, Schelemja sien Sän, un Paschhur, Malkija sien Sän hieeden daut Jeremia to daut gaunze Volkj jesajcht haud:

²Dit es waut de HAR sajcht: Wäa en dise Staut blift, dee woat vom Schwieet un Hunga un Krankheit stoawen motten, un dee waut rutgonen no de Chaldäa, woaren met daut Läwen doavon komen aus een Schauz, daut em Kjrich veschoont blift.

³De HAR sajcht, daut dise Staut woat bestemt enne Macht von däm babelonischen Kjennich komen, un dee woat dee ennämen.

⁴Dan säden de Rejierungsmana to däm Kjennich: Du sust disen Maun aufschaufen, wiels, met daut, waut hee sajcht, moakt hee dee Soldoten, dee ons noch jebläwen sent, oppjäwrich, un uk daut gaunze Volkj. Dis Mensch prooft nich daut Volkj to halpen, hee brinjt daut bloos Schoden.

⁵Un de Kjennich Zedekia säd: Nämt am un doot waut jie wellen. De Kjennich kaun junt von nuscht opphoolen.

⁶Dan neemen see Jeremia un leeten am met Strenj en eene Zista nenn, opp däm Hoff von de Wajchta. De Zista jehieed däm Kjennich sien Sän Malkija. Doa wia kjeen Wota en de Zista oba Blott, un Jeremia sunk en dän Blott nenn.

⁷Em Paulaust hieed Ebed Melech, dee von Kusch en Afrika kjeem, un een jeschnädna Deena vom Kjennich wia, daut see Jeremia en eene Zista jeschmäten hauden. De Kjennich saut don jrod bie daut Benjamin Puat.

⁸Un Ebed Melech jinkj vom Paulaust nom Kjennich un säd to am:

⁹Mien HAR un Kjennich, daut es nich rajcht, waut dise Mana Jeremia aunjedonen haben. See haben am en eene Zista jeschmäten, wua hee vehungren un stoawen woat, wiels doa nich mea Broot enne Staut es.

¹⁰Un de Kjennich säd to Ebed Melech, dee von Kusch kjeem: Nemm die dree Mana met un häw dän Profeet Jeremia ut de Zista rut, ea dee stoaft.

¹¹Un Ebed Melech jinkj met de Mana no eene Stow em Paulaust, wua Sachen oppbewoat wieren, un hold waut Kodren, un dan leeten see dee met eenen Strank en de Zista nenn, no Jeremia.

¹²Un Ebed Melech, dee von Kusch kjeem, säd Jeremia hee sull sikj de Kodren unjare Oarms doonen, wua de Strenj kjeemen. Un Jeremia deed daut.

¹³Un see trocken Jeremia met de Strenj ut de Zista rut. Un Jeremia kunn oppem Hoff von de Wajchta bliewen.

¹⁴Noch een aundret mol, leet de Kjennich Zedekia Jeremia no am komen. See troffen sikj biem dredden Engank vom Tempel. Un de Kjennich säd to Jeremia: Ekj well waut von die weeten. Du saust nuscht trigjhoolen.

¹⁵Un Jeremia säd to Zedekia: Wan ekj waut säd, wurscht du mie nich ombrinjen? Wan ekj die Rot jäw, horchst du doa nich no.

¹⁶Un doa unja vea Uagen, vespruak de Kjennich Zedekia Jeremia: Soo kloa aus de HAR läft, dee ons daut Läwen jejäft haft, woa ekj die nich loten ombrinjen, un ekj woa die uk nich dee Mana enne Macht jäwen, dee die ombrinjen wellen.

¹⁷Un Jeremia säd to Zedekia: Dit es waut de HAR, dee aules rejieet, un Israel äa Gott es, sajcht: Wan du woascht rutgonen no de bowaschte von däm Kjennich von Babel, dan woascht du aum Läwen bliewen, un dise Staut woat nich vebrent woaren. Dan woaren du un diene Menschen aum Läwen bliewen.

¹⁸Oba wan du die nich ver de bowaschte von däm Kjennich von Babel oppjefst, dan woat dise Staut en de Chaldäa äare Macht jejäft woaren, un see woaren dee dolbrennen. Un du woascht selfst nich von an wajchkomen.

¹⁹De Kjennich säd to Jeremia: Ekj sie besorcht daut ekj woa enne Macht von de Menschen von Juda jejäft woaren, dee no de Chaldäa äwajegonen sent, un daut dee mie kjwälen woaren.

²⁰Un Jeremia säd: Du woascht nich en dee äare Henj jejäft woaren. Wan du daut deist, waut de HAR sajcht, soo aus ekj die daut saj, dan woat die daut goot utkomen, un du woascht aum Läwen bliewen.

²¹Oba wan du nich rutjeist, dan es dit waut de HAR mie jesajcht haft:

²²Horch emol, dan woaren aule Frues, dee noch en dien Paulaust sent, faustjenomen woaren von de bowaschte Mana von däm babelonischen Kjennich, un de Frues woaren sajen: Diene goode Frind haben die väajeloagen un die em Bosch jeleit; nu daut du met diene Feet em Blott jesunken best, gonen see dän aundren Wajch.

²³De Chaldäa woaren aul diene Frues un Kjinja faustnämen, un du selfst woascht nich wajchkomen von an. Du woascht von dän babelonischen Kjennich faustjenomen woaren. Un de Staut woat doljebrent woaren.

²⁴Un Zedekia säd to Jeremia: Lot kjeenem weeten waut du mie jesajcht hast, un dan woat die kjeena waut aundoonen.

²⁵Un wan de Rejierungsmana doahinja komen, daut ekj met die toopjewast sie, woaren see weeten wellen, waut du met däm Kjennich jerät hast. Dee woaren froagen, waut wie jesajcht haben un vespräakjen daut see die nich ombrinjen, wan du an aules sajchst waut wie säden.

²⁶Oba saj an bloos, du hast däm Kjennich jeprachat, daut hee die nich wada wudd en Jonatan sien Hus nämen loten, wiels doa wurscht du stoawen.

²⁷Dan kjeemen aul de Rejierungsmana no Jeremia un fruagen am ut, un hee säd an, waut de Kjennich am jesajcht haud, daut hee sajen sull. Un aus see nuscht ut am rut kjrieejen, leeten see am toch.

²⁸Jeremia bleef opp däm Hoff von de Wajchta gaunz bat Jerusalem enjenomen wort.