Read Plautdietsch (Low German) – De Bibel Jeremia 39 Bible Online

Jeremia 39 - Plautdietsch (Low German) – De Bibel bible

Jeremia 39

¹En de 10. Moonat von daut 9. Joa aus Zedekia Kjennich en Juda wia, kjeem de babelonischa Kjennich Nebukadnezar met siene Armee bat Jerusalem un loagad rom de Staut.

²Un aum 9. Dach von de 4. Moonat von daut 11. Joa daut Zedekia Kjennich wia, bruaken see en Jerusalem nenn.

³Aus see de Staut enjenomen hauden, trocken dän babelonischen Kjennich siene väaschte Mana en Jerusalem nenn, un muaken sikj doa tus bie daut Meddel Puat. Doa wieren Nergal Sarezer, Samgar Nebo, Sar Sechim, de väaschta Kaussenfiera, Nergal Sarezer, de bowaschta von de Rotjäwa, un aundre.

⁴Aus Zedekia, de Kjennich von Juda, un siene Soldoten sagen waut doa wort, veleeten see de Staut enne Nacht derch däm Kjennich sien Goaden un derch daut Puat tweschen de twee Mieren, un muaken sikj opp dän Wajch nom Jordan Tol opptoo.

⁵Oba de chaldäische Soldoten juagen an hinjaraun un holden an en, opp de Stapen bie Jericho. See neemen am faust un brochten am no däm babelonischen Kjennich Nebukadnezar en de Staut Ribla em Launt Hamat. Un Nebukadnezar spruak daut Jerecht äwa am.

⁶Zedekia must daut tookjikjen, woo siene Säns ver am omjebrocht worden, un de väaschte von siene Armee worden uk en Ribla aufjeschauft.

⁷Un dan leet hee noch Zedekia siene Uagen utstäakjen, ea see am en een Spaunsel no Babel neemen.

⁸De Chaldäa brenden däm Kjennich sien Hus dol, un uk de Hiesa von de Lied en Jerusalem, un see bruaken de Stautsmia dol.

⁹Un Nebusaradan, de väaschta von de Wajchta, neem de Menschen, dee äwajebläwen wieren enne Staut, un dee waut aul no am äwajegonen wieren, aula no Babel.

¹⁰Waut von de oamste Menschen, soone waut nuscht hauden, jeef hee dan noch Wiengoades un Flekja, daut see en Juda bliewen kunnen.

¹¹Nebukadnezar, de babelonischa Kjennich, haud aun Nebusaradan, dän väaschten von siene Wajchta, bestalt, daut hee sull Jeremia

¹²utsieekjen un am goot behaundlen. Hee sull am kjeen Schoden aundoonen, un sull am krakjt daut jäwen no waut hee fruach.

¹³Un soo kjeem daut, daut Nebusaradan, de väaschta von de Wajchta, Nebuschasban, de väaschta Kaussenfiera, Nergal Sarezer, de bowaschta von de Rotjäwa, un de aundre aunjestalde von däm babelonischen Kjennich

¹⁴am leeten von däm Hoff von de Wajchta holen. Un see leeten am bie Gedalja, Ahikam sien Sän un Schafan sien Grootsän, daut hee doa wonen kunn. Un soo bleef Jeremia bie daut Volkj.

¹⁵Un Jeremia haud eene Norecht vom HARN jekjräajen, aus hee noch opp dän Hoff von de Wajchta wia,

¹⁶daut hee sull no Ebed Melech, dee von Kusch kjeem, gonen un am sajen: Dit es waut de HAR, dee aules rejieet, un Israel äa Gott es, sajcht: Horch emol, ekj woa daut, waut ekj wäajen dise Staut jesajcht hab, loten romkomen, an toom schoden un nich toom gooden. Un du woascht doa sennen, un daut selfst seenen.

¹⁷Oba die woa ekj dän Dach raden, sajcht de HAR. Ekj woa die nich loten en de Macht von dee komen, ver woone du Angst hast.

¹⁸Ekj woa die raden un nich loten ombrinjen. Du woascht met dien Läwen doavon komen, soo aus een Schauz, dee em Kjrich veschoont blift, wiels du mie dien vetruen jeefst, sajcht de HAR.