Read Plautdietsch (Low German) – De Bibel Jeremia 41 Bible Online

Jeremia 41 - Plautdietsch (Low German) – De Bibel bible

Jeremia 41

¹Jischmael, dee Netanja sien Sän un Elischama sien Grootsän wia, wia eena von däm Kjennich siene aunjestalde, un hee wia em Frintschoft met de Kjennichs Famielje. Hee kjeem emol met tieen Mana no Mizpa, un see saden sikj han to eene Moltiet met Gedalja, Ahikam sien Sän. Dit wia en de säwende Moonat.

²Un aus see doa toop wieren, neemen Jischmael un siene tieen Mana äare Schwieed un schluagen Gedalja doot, wan hee uk von dän babelonischen Kjennich äwa daut Launt jesat wia.

³Un see brochten uk aul de Menschen von Juda om, dee doa en Mizpa met Gedalja wieren, un uk de chaldäische Soldoten, dee doa aunjestalt wieren.

⁴Dän Dach no däm daut Gedalja omjebrocht wort, un de Norecht sikj noch nich runtjerät haud,

⁵wieren doa 80 Mana waut von Sichem un Silo un Samaria kjeemen, un oppem Wajch no Jerusalem wieren. Dee hauden sikj, wiels an daut äwa äare Sinden Leet wia, een jiedra sienen Boat aufjeschoaren, siene Kjleeda veräten, un sikj de Hut wund jeräten, un wullen biem Tempel Speisopfa un Ruakopfa brinjen.

⁶Un Jischmael, Netanja sien Sän, jinkj an von Mizpa entjäajen un hield. Un aus hee de 80 Mana troff, säd hee an see sullen enne Staut nenn, no Gedalja, Ahikam sien Sän, komen.

⁷Aus dee dan bat medden enne Staut wieren, brochten Jischmael un siene Mana dee 80 uk om. Un see schmeeten de Doodes aula en eene Zista.

⁸Oba 10 von de 80 säden to Jischmael, hee sull an nich ombrinjen, wiels see kunnen am eenen Väarot von Weit un Joascht un Eelj un Honnich buta de Staut wiesen. Un soo leet hee dee 10 von de 80 aum Läwen.

⁹Un aul de Doodes, von dän Faul äwa Gedalja un uk äwa de 70, schmeet Jischmael en de Zista, woone de Kjennich Asa haud en sienen Kjrich jäajen Bascha, dän Kjennich von Israel, moaken loten.

¹⁰Nebusaradan, de väaschta von de Wajchta, haud veschiedne Menschen, un uk däm Kjennich siene Dajchta en Mizpa unja Gedalja siene Oppsecht jeloten. Dise neem Jischmael nu aula faust, un muak sikj met dee toop oppem Wajch no de Amonita.

¹¹Aus Johanan, Kareach sien Sän, un de aunjestalde enne Armee, dee met am wieren, hieeden, waut fa schlajchte Dinja Jischmael jedonen haud,

¹²muaken see sikj met äare Mana toop oppem Wajch, daut see met Jischmael eenen Kaumf fieren wullen. Un see troffen dee bie daut groote Wota bie Gibeon.

¹³Aus daut Volkj, daut met Jischmael wia, Johanan, Kareach sien Sän, un aul de aunjestalde von de Armee sagen, un uk de Mana, dee met an wieren sagen, freiden see sikj.

¹⁴Un aul de Menschen, dee Jischmael von Mizpa wajchjefieet haud, jinjen äwa no Johanan.

¹⁵Oba Jischmael un acht von siene Mana kjeemen Johanan wajch un muaken sikj oppe Flucht no de Amonita.

¹⁶Un Johanan un de aunjestalde von de Armee, dee met am wieren, äwaneemen de Soldoten, Frues, Kjinja, un Rejierungsmana, waut äwajebläwen wieren, von daut Volkj woont Jischmael von Mizpa wajchjefieet haud, aus hee Gedalja omjebrocht haud.

¹⁷Un see muaken sikj oppem Wajch un kjeemen no Kimham siene Wirtschoft, un wullen wieda no Ägipten gonen,

¹⁸wäajen de Chaldäa. See wieren sikj aula nich secha, wiels Jischmael, Netanja sien Sän, haud däm babelonischen Kjennich sienen aunjestalden Leida, Gedalja, Ahikam sien Sän, omjebrocht.