Read Plautdietsch (Low German) – De Bibel Jeremia 42 Bible Online

Jeremia 42 - Plautdietsch (Low German) – De Bibel bible

Jeremia 42

¹Dan kjeemen aul de aunjestalde von de Armee, met Johanan, Kareach sienen Sän, un Asarja, Hoschaja sienen Sän, un daut gaunze Volkj

²no Jeremia un säden: Horch emol no waut wie haben wellen. Froag däm HARN, dee dien Gott es, wäajen aul dee, dee äwajebläwen sent. Du kaust je seenen, doa sent mau weinich von aul dee äwajebläwen.

³Froag däm HARN, dee dien Gott es, auf hee die woat weetenloten, wua wie sellen hantrakjen, un waut wie doonen sellen.

⁴Un Jeremia, de Profeet, säd an: Daut freit mie, daut jie dit froagen. Ekj woa däm HARN, dee jun Gott es, daut froagen waut jie weeten wellen. Un ekj woa junt aules sajen, waut de HAR mie weeten lat, un woa nuscht von junt trigjhoolen.

⁵Un see säden to Jeremia: Mucht de HAR, een Zeij sennen opp woonen eena sikj veloten kaun, un dee bie de Woarheit blift, un jäajen ons zeijen, wan wie nich aules soo doonen aus de HAR, dee dien Gott es, ons derch die sajen woat.

⁶Krakjt eendoont auf wie eene goode ooda eene schlajchte Norecht kjrieen von däm HARN, dee ons Gott es un no wäm wie die schekjen, wie wellen ons doano rechten. Ons saul daut derch onsen Jehuarsom jäajen dän HARN, dee ons Gott es, goot gonen.

⁷Daut dieed dan tieen Doag bat Jeremia eene Norecht vom HARN kjrieech.

⁸Un don roopt hee Johanan, Kareach sien Sän, un aul de aunjestalde von de Armee, waut met am wieren, un daut gaunze Volkj toop.

⁹Un Jeremia säd: De HAR, dee Israel äa Gott es, un no däm jie mie schekjten met june Froag, dee sajcht:

¹⁰Wan jie woaren en dit Launt bliewen, dan woa ekj junt oppbuen un nich dolrieten, un ekj woa junt enwartlen un nich utrieten, wiels mie es daut too groff, daut ekj soon Schoden opp junt jebrocht hab.

¹¹Habt nich angst fa dän babelonischen Kjennich, ver dän jie junt nu enjsten, sajcht de HAR. Habt nich angst fa am, wiels ekj woa met junt sennen un woa junt halpen un junt von siene Macht raden.

¹²Ekj woa Metleet met junt haben, soo daut hee junt woat jenstich sennen, un junt wada woat loten june Flekja haben.

¹³Jie oba, kunnen junt eenich woaren, daut jie nich en dit Launt bleewen. Jie kunnen onjehuarsom sennen to daut waut de HAR, dee jun Gott es, sajcht.

¹⁴Jie kunnen sajen: “Wie wellen no Ägipten trakjen, daut wie nich mea Kjrich seenen un nich mea daut blosen von de Trompeet hieren brucken, un nich mea no Broot hungren. Wie wellen dort wonen.”

¹⁵Horcht no waut de HAR, dee aules rejieet, un Israel äa Gott es, to dee sajcht, dee en Juda jebläwen sent: Wan jie jun Ziel opp Ägipten saten woaren, un woaren doahan trakjen un doa wonen,

¹⁶dan woat junt en Ägipten daut Schwieet trafen, fa woont jie angst haben. Un de Hungaschnoot, om woone jie beduat sent, woat uk en Ägipten met junt gonen, un jie woaren doa stoawen.

¹⁷Aule Menschen dee äa Ziel opp Ägipten saten un doahan trakjen un doa wonen woaren, dee woaren von daut Schwieet, de Hungaschnoot un Krankheit omkomen. Doa woat kjeena äwabliewen von dän Schoden, dän ekj äwa an brinjen woa.

¹⁸Dit es waut de HAR, dee aules rejieet, un Israel äa Gott es, sajcht: Krakjt soo aus ekj mien Oaja un miene Veläajenheit äwa Jerusalem oppflaumen leet, krakjt soo woat dee uk äwa junt flaumen, wan jie no Ägipten trakjen. De Lied woat daut schudren, wäajen dän Fluch dee junt trafen woat, un see woaren junt vespotten un veachten. Un jie woaren dise Städ nich mea to seenen kjrieen.

¹⁹Dit es waut de HAR sajcht to dee, dee en Juda äwajebläwen sent: Got nich no Ägipten. Hoolt daut em Denkj, daut ekj junt vondoag jewoarnt hab,

²⁰wiels jie haben jun Läwen opp Spell jesat, doamet daut jie mie nom HARN, dee jun Gott es, jeschekjt haben un jesajcht haben, ekj sull däm HARN, dee ons Gott es, fa junt froagen, un junt daut aula sajen. Un jie vespruaken, daut jie aules doonen wudden, waut de HAR, dee ons Gott es, mie weeten leet.

²¹Ekj hab junt daut vondoag jesajcht, oba jie wellen nich daut doonen waut de HAR, dee jun Gott es, velangt.

²²Nu lot junt daut jesajcht sennen, daut opp dee Städ, wua jie hantrakjen un wonen wellen, woa jie derch daut Schwieet un Hungaschnoot un Krankheit stoawen.