Read Plautdietsch (Low German) – De Bibel Jeremia 49 Bible Online

Jeremia 49 - Plautdietsch (Low German) – De Bibel bible

Jeremia 49

¹Dit es waut hee äwa de Amonita säd: Dit es waut de HAR sajcht: Sent doa en Israel kjeene Säns? Es doa kjeena, waut daut Launt oawen kaun? Ooda wuarom läft Milkom en Gad, un siene Lied en de Städa en dee Jäajent?

²Doa woat onbedinjt noch eene Tiet komen, wan ekj daut Kjrichsjeschrech woa hieren loten, äwa Raba, de amonitische Staut. Dee woat dan een Schunt Klompen sennen, un de Städa doarom gaunz vebrent woaren. Oba Israel woat sien Launt besiedlen, sajcht de HAR.

³Hielt en Heschbon, wäajen Ai es vestieet; lot de Frues en Raba truaren, un aula Sakkjleeda droagen. Hielt un rant han un häa; vewipt junt, daut jie Wund woaren. Milkom woat faustjenomen woaren un met Priesta un Leidasch toop wajchjefieet woaren.

⁴Wuarom meest du die soo väl, met dien fruchtboaret Tol? Du velatst die opp dien Hab un Goot, un jleefst kjeena woat die aunjriepen.

⁵Gott de HAR, dee aules rejieet, sajcht: Ekj woa die von aule Sieden veschrakjen von aul dee runtom die; du woascht en aule Rechtungen ranen un kjeena woat diene vestade oppnämen.

⁶Doch wan de Tiet ieescht kjemt, woa ekj Amon daut wada loten bäta gonen, sajcht de HAR.

⁷Dit es waut hee äwa Edom säd: De HAR, dee aules rejieet, sajcht: Es doa kjeen Vestentnis mea en Teman? haben de weise Mana kjeen Rot mea? Es äa Vestentnis veschwungen?

⁸Jie, dee jie en Dedan wonen, nu schwind, rant un vestäakjt junt; de Tiet toom veräakjnen es hia. Ekj woa eenen grooten Schoden opp Esau siene Nokomen schekjen.

⁹Loten de Wiendruwen Plekja nuscht äwa em Goaden? Nemt een Stäla nich bloos daut waut am jankat?

¹⁰Oba ekj woa Edom aules nämen; nuscht woat vestoaken bliewen. Kjeena woat sikj vekrupen; aula sent see omjekomen. Doa woaren kjeene Kjinja, Jeschwista ooda Nobasch noch sajen:

¹¹Lot de Weisen bie mie; ekj woa dee fläajen; un de Wätfrues kjennen sikj opp mie veloten.

¹²De HAR sajcht: Horcht emol, dee waut daut nich vedeent hauden, haben must dän betren Wien drinkjen. Meest du, daut du dän nich drinkjen woascht motten? Du woascht nich onen Strof bliewen; du woascht dän uk drinkjen.

¹³Soo kloa aus ekj läw, vesprakjt de HAR, woat de Menschen daut äwa Bozra schudren, un see woaren äwa dee spotten. Lied woaren äare Fiend soonen Schoden wenschen aus dee kjrieech. Bozra un aul de Städa doarom woat eene Wiltnis sennen, opp emma.

¹⁴Ekj hab eene Norecht vom HARN, daut eena es jeschekjt mank de Velkja, un sajcht see sellen sikj toopsaumlen un Kjrich jäajen Edom fieren.

¹⁵Ekj moak die daut kjlanste von de Lenda, un de Lied woaren die aula veachten.

¹⁶Wäajen aundre sikj fa die enjsten, best du em Hoat prauzich jeworden, du, dee du enne Boaj mank de Steena wonst un de hechste Boaj ennemst. Un wan du dien Nast soo huach muakst, aus de Odla daut deit, wudd ekj die doch uk von doa raufsteeten, sajcht de HAR.

¹⁷De Schoden, dee äwa Edom kjemt, woat soo groff sennen, daut dee waut doa vebie komen daut schudren woat un sikj äwa dän grooten Schoden tieren woaren.

¹⁸Daut woat dise Jäajent soo gonen aus de Jäajent von Sodom un Gomorra, sajcht de HAR. Doa woat kjeena mea wonen un kjeena doa nenn trakjen.

¹⁹Daut woat krakjt soo sennen, aus wan een Leiw utem Woolt aum Jordan oppe opne Weid sprinjt. Soo haustich woa ekj Edom vejoagen, un woa dämjanjen äwa de Jäajent saten, wäm ekj mie wäl. Wäa meen jie es soo aus ekj sie? Wäa woat mie aufwäaren? Woon Hoad woat sikj jäajen mie stalen?

²⁰Nu horcht no waut de HAR wäajen Edom jeplont haft un waut hee äwa de Menschen von Teman jedocht haft. Bat opp daut kjlanste woaren dee veschlapt woaren; de Weid woat sikj schudren äwa woo daut häajeit.

²¹Wan dee felt, woat daut krachen, daut de Ieed doavon scheddat; dee woaren soo schrieen, daut et aum Schelpmäa to hieren es.

²²De Fient woat enne Hecht stieen un soo haustich opp Bozra faulen, aus een Odla met utjespreede Flichten. Daut Hoat von de stoakje Soldoten woat dän Dach en Edom soo sennen, aus daut Hoat von eene Fru en Weedoag.

²³Dit es waut hee äwa Damaskus säd: Hamat un Arpad sent veduzt äwa de schlemme Norecht. See sent aus een willet Mäa, daut sikj nich berujen kaun.

²⁴Damaskus es met Forcht benomen, un jeft sikj oppe Flucht; dee zettat un litt un haft Angst aus eene Fru en äare Weedoag.

²⁵De bekaunde Staut, dee emma soo jlekjlich wia, steit nu ladich.

²⁶Aus de Tiet kjeem, sajcht de HAR, lagen äare junge Mana doot oppe Gaus, un äare Soldoten worden omjebrocht.

²⁷Ekj woa de Wenj rom Damaskus aunstekjen, un Ben Hadad siene Paulausten dolbrennen.

²⁸Dit es waut hee äwa Kedar un däm Kjennich Hazor sien Rikj säd, woone de babelonischa Kjennich Nebukadnezar schluach: Dit es waut de HAR sajcht: Moak die reed un go no Kedar un de Lied em Oosten un venicht dee.

²⁹Nämt dee äare Zelten un Häaden, äare Dakjen un aules waut see haben; leit aul äare Kameelen wajch un schriet: Jefoa, runtom!

³⁰Velot, un got wiet, vekrupt junt deep, jie Lied von Hazor, sajcht de HAR. De babelonischa Kjennich Nebukadnezar haft em Plon jäajen junt to komen, un haft bie sikj jedocht:

³¹Moakt junt reed, un got no daut Volkj daut soo ruich un secha läft; dee haben kjeen Puat, un nuscht es veräajelt, un wonen gaunz auleen, sajcht de HAR.

³²Nämt junt äare Kameelen un aul äa Vee. Ekj woa dee, dee sikj runtom de Hoa aufschnieden, en aule Rechtungen vespreeden. Äa vedoawen woat von aule Sieden komen, sajcht de HAR.

³³Hazor woat opp emma eene Wiltnis bliewen, un de wille Tieren woaren doa husieren; kjeene Menschen woaren doa läwen un kjeene woaren doa nentrakjen.

³⁴Dit es waut de HAR, dee aules rejieet, to Jeremia, däm Profeet, äwa Elam säd, aum Aunfank von de Tiet aus Zedekia Kjennich von Juda wia:

³⁵Dit es waut de HAR, dee aules rejieet, sajcht: Horcht emol, ekj woa de Elamita äare jratste Macht, soo aus see met äare Boages kjriejen, wajchnämen.

³⁶Un ekj woa von aule Sieden dän Wint äwa an komen loten, un an en aule Rechtungen vestreien. Doa woat kjeen Volkj sennen, wua nich waut von de vejoagde von Elam sent.

³⁷Ekj woa Elam loten angst woaren von dee, dee jäajen an sent, un an no äa Läwen stonen. Ekj woa en mienen grooten Oaja eenen Schoden äwa an komen loten, sajcht de HAR, un woa am met daut Schwieet vejoagen, bat see gaunz enjenomen sent.

³⁸Ekj woa mienen Troon en Elam hansaten un mien Jerecht fieren äwa äare Kjennichs un Leidasch, sajcht de HAR.

³⁹Oba dee Tiet woat noch wada komen, wan ekj Elam daut woa loten bäta gonen, sajcht de HAR.