Read Plautdietsch (Low German) – De Bibel Jeremia 52 Bible Online

Jeremia 52 - Plautdietsch (Low German) – De Bibel bible

Jeremia 52

¹Zedekia wia 21 Joa oolt aus hee Kjennich wort, un hee wia fa alw Joa Kjennich en Jerusalem. Zedekia siene Mutta wia Hamutal, un äa Voda wia Jirmeja von Libna.

²Zedekia deed waut däm HARN schlajcht jefoll, krakjt soo aus Jojakim jedonen haud.

³Daut wort soo groff met Jerusalem un Juda, daut de HAR an en sienen Oaja von ver sikj veschmeet. Zedekia bleef dän babelonischen Kjennich nich unjadon,

⁴un soo kjeem daut, daut aun däm 10. Dach von de 10. Moonat en daut 9. Joa, aus Zedekia Kjennich wia, kjeem de babelonischa Kjennich, Nebukadnezar, met siene gaunze Armee aun Jerusalem naun. Un runtom de Staut stalden see äa Loaga opp un buden äare Torms.

⁵Bat en daut 11. Joa daut Zedekia Kjennich wia, hilden see äa Loaga doa,

⁶un dan aum 9. Dach von de 4. Moonat wort de Hungaschnoot enne Staut soo groot, daut de jeweenelje Menschen nuscht mea to äten hauden.

⁷Un dan bruaken de babelonische Soldoten derch de Stautswaunt derch. Un de gaunze Armee veleet Jerusalem enne Nacht derch daut Puat, tweschen de twee Mieren waut aun dän Wajch sent, dee no däm Kjennich sien Goaden jeit. See wullen dän wajch nom Jordan Tol flichten. De Chaldäa hauden äa Loaga runtom de Staut,

⁸un see juagen dän Kjennich Zedekia hinjaraun, un holden am en de Jäajent von Jericho en. Dan veleeten am aul siene Soldoten, un jinjen jieda äaren ieejnen Wajch.

⁹Un de Kjennich von Juda wort faustjenomen un no Ribla jenomen, wua de babelonischa Kjennich sikj opphilt. Ribla es en daut Launt Hamat, un doa spruak de babelonischa Kjennich daut Uadeel äwa Zedekia.

¹⁰See brochten Zedekia siene Säns ver am om, un see schauften aul dee, dee en Juda en de Rejierunk aunjestalt wieren, en Ribla auf.

¹¹Un Zedekia worden de Uagen utjestoaken un hee wort en een Spaunsel jehoolen. Soo neem de babelonischa Kjennich am no Babel un hilt am doa en een Jefenkjnis bat hee storf.

¹²En daut 19. Joa daut Nebukadnezar Kjennich en Babel wia, aun dän 10. Dach von de 5. Moonat, kjeem Nebusaradan, no Jerusalem. Hee wia de väaschta von de Wajchta, un kjeem en dän Kjennich siene Städ.

¹³Hee leet dän Tempel un dän Kjennich sien Paulaust dolbrennen, un aule Hiesa en Jerusalem. Hee leet aule groote Hiesa en Jerusalem dolbrennen.

¹⁴Un de Chaldäa äare Armee, dee met däm väaschten von de Oppsechta wia, reet de Stautswaunt runtom Jerusalem dol.

¹⁵Un Nebusaradan, de väaschta von de Wajchta, leet de eefache Menschen, dee noch enne Staut wieren, un dee waut aul no de babelonische Menschen äwajegonen wieren, un de äwaje von de fäje Oabeida, faust nämen un wajchfieren.

¹⁶Nebusaradan leet waut von de jeweenelje Menschen oppem Launt, daut see de Wiengoades un daut Akalaunt besorjden.

¹⁷De bronsne Past, waut ver däm Tempel wieren un de Deschen un dee groote bronsne Komm, waut see “Daut Mäa” nanden, neemen de Chaldäa vom Tempel un neemen daut no Babel.

¹⁸See neemen uk de Tap, Scheflen, daut Jereetschoft toom de Laumpen besorjen, Kommen, un Schleew un aules waut doa von Brons jemoakt wia, waut de Priesta em Tempel brukten, met no Babel.

¹⁹Un de väaschta von de Wajchta neem uk aul de goldne un selwane Kommen, Auschbehelta, Betten, Tap, Laumpen, Schleew un Kauntjes.

²⁰Aul daut Brons, waut en de twee groote Past, daut Mäa, de twalw Bolles opp woone daut Mäa stunt, un de Deschen, dee Salomo haud fa dän Tempel moaken loten, wia soo väl, daut see daut nich wäajen kunnen.

²¹De twee groote Past wieren näajen Meeta huach, un mauten sas Meeta runtom. Dee wieren holl un de Wenj wieren acht Zentimeeta dikj.

²²Jieda eena von de Past haud een Koppstekj. Jieda Koppstekj wia von Brons jemoakt un wia twee un een haulwet Meeta huach, un haud een Nat un de Apel runtom. Een Post wia krakjt soo aus de aundra, Apel un aules.

²³Doa wieren 100 Apel aun jieda Koppstekj, 96 von dee wieren von unjen to seenen.

²⁴De väaschta von de Wajchta neem Seraja, dän väaschten von de Priesta, un Zefanja, dee daut tweede mank de Priesta stunt, un de dree Oppsechta von de Tempelpuaten.

²⁵Von enne Staut neem hee dän väaschten von äwa de Armee, säwen von däm Kjennich siene Rotjäwa, waut en Jerusalem jefungen worden, dän Schriewa von däm Kommandaunt äwa de Soldoten von en Juda buta Jerusalem, un 60 Mana von buta Jerusalem, dee enne Staut wieren.

²⁶Dise neem Nebusaradan, de väaschta von de Wajchta, un brocht dee no dän babelonischen Kjennich en Ribla,

²⁷en daut Launt Hamat. Doa worden dise aula omjebrocht. Soo wort Juda faustjenomen un von en äa Launt wajchjefieet. Dit es de Berecht von woo de Menschen von Juda wajchjefieet worden.

²⁸Nebukadnezar neem en sien 7. Joa 3.023 Menschen von Juda wajch,

²⁹un en sien 18. Joa 832 Menschen wajch von Jerusalem,

³⁰un dan en Nebukadnezar sien 23. Joa neem Nebusaradan, de väaschta von de Wajchta, 745 Menschen von Juda. Daut wieren aules toop 4.600 Menschen.

³¹Dan en daut 37. Joa no däm daut Jojachin, de Kjennich von Juda, wajchjefieet wort, don aum 25. Dach von de 12. Moonat, wort Ewil Merodach Kjennich en Babel, un aun dän Dach leet hee Jojachin, dän Kjennich von Juda ut daut Jefenkjnis rutkomen.

³²Un hee räd frintlich met am un jeef am eene Städ toom setten, hecha aus de aundre Kjennichs, dee bie am en Babel wieren.

³³Un Jojachin brukt nich mea de Kjleeda von eenen faustjenomnen brucken, un eet aule Dach, soo lang aus hee läwd, aun dän Kjennich sienen Desch.

³⁴De babelonischa Kjennich jeef am aule Dach von aules jenuach, soo lang aus hee läwd.