Read Plautdietsch (Low German) – De Bibel Jeremia 9 Bible Online

Jeremia 9 - Plautdietsch (Low German) – De Bibel bible

Jeremia 9

¹Ekj wensch mie eene Bood enne Wiltnis, daut ekj kunn von mien Volkj wajchgonen, un dee nich mea seenen. See sent mie aula ontru jeworden, un sent eene Baund von Vebräakja.

²See vedreien äare Wieed un lieejen; daut es goot bekaunt, daut see Lied väalieejen, un nich bekaunt, daut see opprechtich sent. See moaken daut emma oaja un oaja, un rechten sikj nich no mie, sajcht de HAR.

³Een jiedra mott sikj wäaren fa sien Noba, un kaun sien ieejnet Frintschoft nich truen; een Mensch fieet dän näakjsten hinjat Licht, un een Frint vetalt no, waut sikj nich jehieet.

⁴Eena schmäat dän aundren väa, un kjeena blift bie de Woarheit; see eewen sikj daut lieejen, un moaken sikj meed met Sinden.

⁵See läwen dän tietäwa met Lest; en äare Lest sajen see, see kjanen mie nich, sajcht de HAR.

⁶Doawäajen sajcht de HAR, dee aules rejieet: Horcht emol, ekj woa an schmelten aus Blie, un fauststalen, waut hia noch goot es. Waut kunn ekj sest noch doonen, met mien scheenet Volkj?

⁷See haben eene Tung aus eene jefäadelje Feil; waut see sajen, es nich to jleewen; see räden met dän näakjsten aus goode Frind, oba em Hoat muchten see däm eent äwaholen.

⁸Sull ekj soont nich bestrofen, sajcht de HAR, sull ekj nich veräakjnen, met soon Volkj aus dit?

⁹Ekj mott hielen äwa de Boaj, un en Trua schrieen äwa de Stapen, wiels dee soo vedrieecht sent; doa jeit aul kjeena kjikjen, un kjeen Vee schricht doa noch. De Väajel enne Loft sent vefloagen, un de wille Tieren sent veschwungen.

¹⁰Ekj woa von Jerusalem een Steenaklompen moaken, wua de Fas un Wilw sikj tus moaken. Ekj woa de Darpa en Juda to eene Wiltnis moaken, wua kjeena mea bennen wont.

¹¹Wua es een Mensch dee dit vesteit? To wäm haft de HAR jerät, daut hee ons sajen kaun, wuarom daut Launt vedrieecht, un wuarom daut eene Wiltnis jeworden es, wua kjeena mea derchjeit?

¹²Un de HAR säd: Daut es wiels see mien Jesaz, daut ekj an jejäft haud, veschmäten haben; see haben nich jehorcht no waut ekj säd, un haben sikj nich doano oppjefieet.

¹³See sent äaren ieejnen stekjsennjen Wajch jegonen, un haben de Baal Jetta aunjebät, soo aus äare Vodasch an daut lieeden.

¹⁴Un doawäajen, sajcht de HAR, dee aules rejieet, un Israel äa Gott es: Horcht emol, ekj woa dit Volkj betre Bläda to äten jäwen, un een Kuffel met Jeft drinkjen loten.

¹⁵Ekj woa an mank Velkja vestreien, von woone see un äare Vodasch nich ea jehieet haben; un ekj woa an met daut Schwieet vejoagen, bat doa nuscht von an jebläwen es.

¹⁶Dit es waut de HAR, dee aules rejieet, sajcht: Roopt schwind, dee waut sinjen, wan doa wäa jestorwen es, un lot de Sinja komen.

¹⁷Sajcht see sellen sikj spooden, un een Bejrafnis Leet sinjen, soo daut ons de Uagen dikj woaren, un ons de Tronen ranen.

¹⁸Eena kaun een hielen en Zion hieren, aules es vedorwen, woo mott wie ons schämen! Wie motten ons Launt veloten. Onse Jebieda sent aula doljebroaken.

¹⁹Lot de Frues no däm HARN horchen, un oppaussen no waut hee sajcht; lieet june Mejales daut hielen, un de Nobafrues dit Trualeet:

²⁰“De Doot es derch onse Fenstren jekomen, bat gaunz en onse vesechade Städen; onse Kjinja stoawen oppe Gaus, un de junge Mana ligjen doot oppem Moakjt.”

²¹Saj an, dit es waut de HAR sajcht: De Doodes ligjen oppe Stap, soo aus Mestklompes, un aus Goawen hinjarem Binja, dee kjeena oppjehowen haft.

²²Dit es waut de HAR sajcht: Lot däm wäa kluak es, sikj doa nuscht met meenen; lot däm wäa stoakj es, sikj doa nich met puchen; lot däm wäa rikj es, sikj nich groot doonen.

²³Daut eensje, von waut wieet to räden es, es daut jie mie vestonen un om mie weeten. Ekj sie de HAR, un ekj wies mie opp de Ieed met truhoatich leeftolich sennen, met jerajcht sennen, un nom rajcht seenen; un dit es krakjt waut mie jefelt, sajcht de HAR.

²⁴Horcht emol, doa kjemt eene Tiet, sajcht de HAR, wua ekj dee, dee bloos aum Fleesch beschnäden sent, bestrofen woa,

²⁵en Ägipten un Juda un Edom, de Amonita, Moab, un aul dee enne Wiltnis, waut sikj de Hoa runtom aufschnieden. Aul dise Velkja sent onbeschnäden, un de Israeliten sent uk em Hoat onbeschnäden.